TALA MAI I LE PASEFIKA

Pago Pago - AMERIKA SAMOA

TOE TOTOGI E TAGATA PASEFIKA MAI ISARAELU A LATOU LAVA PASESE

Ua fa’aalia le faanoanoa tele o tagata Tonga i Niu Sila lea na ave’ese faatopetope mai i Isaraelu ona o le taua i Sasa’e Tutotonu, ina ua faatonuina i latou e le malo o Niu Sila, le totogi lava e le tagata o lona pasese, pe a fia malaga mai i Niu Sila.

E pe a ma le 90 nofoa sa totogi e le malo, e fesoasoani i tagata Niu Sila ma le Pasefika, na fia tu’ua Isaraelu, ae o le mamao na mafai ona o’o iai le vaalele, le Etihad Airways, u ana o Abu Dhabi.  O lona uiga, afai ae fia o’o mai i Niu Sila i latou ia, e tatau ona totogi lava e latou ia a latou pasese, e fa’aauau mai ai le latou faigamalaga.

Sa saunoa Torisse Laulu, o se uo lelei a Pesi Sikalu, o se tamaitai e 26 tausaga sa iai i le aumalaga lenei e to’a 44, faatasi ma nisi sitiseni o Niu Sila, o ni tagata matutua – e aofia ai se tasi sa manaomia vave se fesoasoani ona o lo o aafia i le kanesa, sa matuai faigata tele lenei fuafuaga na fausia e le malo o Niu Sila.

Sa ta’ua e le palemia faavaomalo, o Nanaia Mahuta, o lo o tumau pea pagatia o tulaga i Isaraelu faapea teritori o Palesitina.  Ae peitai, e pa’u lava i luga o tagata Niu Sila ma le atu Pasefika, le sailiga o se auala e mafai ai ona malaga ese mai i ia atunu’u.

Ua i aao nei o le RNZ Pasefika ia ni imeli mai i le Minisita o Malo Ese ma Fefaatauaiga, o lo o ma’oti mai ai le tatau i pasese o le Etihad Airways, ona sainia se maliliega e toe totogi ai tupe fa’aaluina mo a latou pasese, ae e latou te le i faimalaga ese mai.

O lo o ta’ua ai e faapea, e gafa lava le tagata malaga ma le totogia o lona pasese mai i Abu Dhabi.

O lea ua ofoina atu ai e le Konesula a Tonga ia le totogia atoa o pasese mo le aumalaga ina ia mafai ai ona taunuu saogalemu i Niu Sila.  E ui ina taofi Laulu, e le o se tiute lea a le Konesula a Tonga, o le tiute lea a le malo a Niu Sila.

MAUA E EA FOSI A NIU SILA NI ALII FAIFAIVA MAI FITI

Na tu’ua e ni alii faifaiva ia le a’ai o Lautoka, i Fiti, pe a ma le lua vaiaso ae e o’o mai i le aso Lulu na sei mavae atu, e le i toe maua se tala, ina ua pe le ma’a o le latou telefoni feaveai.

Ona o le tulaga faaletonu o le tau, sa faafaigata ai sailiga a tagata Fiti, ma o lea na o latou tapa ai i se fesoasoani mai i le malo.  O le aoauli o le aso Lulu na mafai ona maua ai se fesootaiga ma le va’a fagota.

MAUA SE VA’A FA’AOLA MO TAGATA O LE ATU KUKI I ISARAELU

Ua fa’alauiloa mai e le Palemia o le atu Kuki, le mauaina o se fesoasoani mai i le malo o Ausetalia, mo le ave’esea o a latou tagatanu’u o lo o i totonu o Isaraelu.

E pe a ma le to’a 28 ni tagata o le atu Kuki o lo o sulufai nei i Ieriko.

Sa ta’ua e Mark Brown i vaega fa’asalalau a le atu Kuki, ua maea ona faia se fesootaiga a le malo ma tagata atu Kuki o totoe i totonu o Isaraelu, ma se faamoemoega e latou te malaga ese mai i le aso Faraile.

Ae afai e le mafai, o le a faapea loa ona galulue faatasi le malo o le atu Kuki ma Ausetalia, mo le sailiga o se auala e mafai ai ona ave’ese mai tagata o lo o totoe i Ieriko.

FAAMANUIAINA AOGA I SE FESOASOANI TUPE MAI IAPANI

E lua ni aoga i Samoa ua faamanuiaina i se fesoasoani tau tupe e $630,000 (tupe Amerika) mai se faalapotopotoga i Iapani.

O le Kolisi a Avele, ua mauaina le $601,000 WST mo le toe faafouina o le latou ‘hall’ e aofia ai ma se umukuka.

Ae o le aoga tulaga muamua i Lalomalava i Savaii, ua faamanuiaina i se vaegatupe e $582,000WST mo le toe faaleleia o a latou faleaoga, o se faletusi, o le ofisa a le puleaoga, o se potu a faiaoga ma fale le ta’ua.