Fa’aalia e le polokalama mo Taitai Talavou a le Pasefika le agai i luma

Pago Pago - AMERIKA SAMOA

I le faamanatuina o le 10 tausaga talu ona fa’avaeina le polokalama mo Taitai Talavou a le Pasefika (YPL), ua fa’aautuina ai nei se polokalama mo le aloaia o le alualu i luma o lenei polokalama faapea ai ma le aloaia o nisi o taitai o le pasefika tulaga ese.

O le a aofia i lenei polokalama faamanatu ia nisi o taitai o le YPL sa auai i koneferenisi ua mae’a atu, o tupe maua, polokalama fesuiai, faapea galuega taulima, talu ona faavaeina lenei polokalama i le 2013.

Ua mafai ona faamaonia le auai mai o alii ma tamaitai tuai o le YPL, mai i Ausetalia, le atu Kuki, Fiti, Micronesia, Polenisia Falani, Kiribati, le atu Malesala, Nauru, Niu Kaletonia, Niu Sila, Niue, Palau, Papua Niu Kini, Samoa, atu Solomona, Tonga, Tuvalu, Vanuatu, Wallis ma Futuna ma ua faapea foi ona tuuina atu le avanoa I nisi o teritori a Amerika, e pei o Amerika Samoa, Guam, le atu Mariana ma Hawaii, e latou te auai foi.

E toalua ni sui filifilia mai i Amerika Samoa, lea e aofia ai le faletua ia Sabrina Suluai-Mahuka ma sa mafai ona auai atu o ia i lenei polokalama i le tausaga e 2019, lea na filifilia ai o ia ma leisi sui o Amerika Samoa, le faatonusili o le Matagaluega o Fefaatauaiga, o Petti Matila, e auai atu i lenei fuafuaga o le a faataunuuina i Suva i le motu o Fiti.

Talu mai le 2019, o lo o fa’aauau ona u’unaia le faletua ia Suluai-Mahuka e faamautu le fesootaiga ma lenei polokalama ma le fa’aaogaina o lona atamai aoaoina mai i a latou polokalama, ua mafai ai ona ia faamautuina faatasi ma nisi, ia se vaega tupe lea ua fa’avaeina ai nei le polokalama ua faaigoaina o le ‘Finafinau’, o se polokalama mo fanau talavou o le teritori e fiafia i polokalama tau i le siosiomaga.

Sa avea foi Suluai-Mahuka ma sui o Amerika i se faatasiga a le YPL sa faia i Ausetalia, i le tausaga ua tuanai, faapea ma ni polokalama sa faia i le Aoga Matata Eseese i Niu Sila faapea ai ma se polokalama tau i le gataifale, sa faia i Hawaii.

I le atoa ai o le sefulu tausaga o lenei polokalama, ua filifilia ai nei le faletua ia Suluai-Mahuka, lea sa faavaeina le polokalama o le ‘Finafinau’, o ia foi o le puleaoga a le South Pacific Academu, o se tasi foi ua ta’uta’ua i tusitusiga ma o ia o se Faatonu o tusitusiga faalePasefika, e avea ma sui o Amerika Samoa i le polokalama mo le faamanatuina o le 10 tausaga a le YPL.

Na fa’aalia e Suluai-Mahuka lona agaga faafetai i le avea o ia ma se vaega o lenei polokalama mo fanau talavou ma sa ia ta’ua foi e faapea, o le autu moni lea o lona naunau i lenei polokalama, ina ia mafai ona fesoasoani ma uunaia fanau talavou a le teritori, ina ia mafai foi ona o latou tutulai mai e avea ma ni taitai i le lumanai.

O le polokalama mo le faamanatuina o le 10 tausaga a le YPL, o se tauvaga po o se miliga lea i le va o ni au, ae tigi i Niu Sila ia Novema 2023.

O Suluai-Mahuka o lo o i totonu o le ‘au #1, faatasi ma se alii mai Fiti, o Karan Narayan faapea Winona Lennin mai Niu Sila.  O le taimi nei, o lo o ripotia mai le tulaga muamua o lenei ‘au ma se faamoemoega o le a mafai ona uluai taunuu i le tini i le masina fou.