TALA I VAIFANUA

Pago Pago - AMERIKA SAMOA

TAPUNIA VAIASO TAUTUA A LE BLUESKY I SE LATOU FOA’I MO LE FAALAPOTOPOTOGA A LE KANESA

O le vaiaso ua mavae, na tapunia aloaia ai le vaiaso tautua a le ofisa telefoni a le Bluesky, lea sa amataina i le amataga o Oketopa.

O le masina foi o Oketopa, ua lauiloa ai i le lalolagi atoa, o le masina o le Kanesa o le Susu, lea e laei ai e tagata le lanu piniki e fa’aali ai lo latou lagolago mo i latou ua a’afia pe ua maliliu foi, ona o le kanesa o le susu.

Ma i le tapunia aloaia o le latou polokalama mo le tautuaina o le mamalu lautele, sa faapea ona foaiina ai e le Bluesky se vaegatupe e $3,000 i le faalapotopotoga o le Kanesa a Amerika Samoa.

E le na o le pau lea o se foai a le Bluesky mo le faalapotopotoga a le Kanesa.  E pei ona sa saunoa le pulesili a le Bluesky, le susuga Justin Tuiasosopo, o lo o iai se faamoemoega i le Bluesky, e ala i nei foai, o le a mafai ona fesoasoani i taumafaiga a le faalapotopotoga o le Kanesa a Amerika Samoa, e atinaeina ni auala sili atu ona lelei, e tautuaina ai tagata lautele ua aafia i le Kanesa.

TOE IAI SE FAAOPOOPOGA I PENEFITI SAOGALEMU

I se tala fiafia mo le tausaga fou 2024, ua fa’alauiloa mai ai le toe iai o se faaopoopoga i penefiti o le Saogalemu ma tupe maua faaopoopo (SSI) mo le silia ma le 71 miliona tagata o Amerika.  O lona uiga, o le a amata i le masina o Ianuari o le tausaga fou, o le a vaaia se faaopoopoga e $50 i penefiti o le Saogalemu ma le SSI.

O le a mafai ona mauaina e i latou o lo o tali a latou siaki saogalemu ma le SSI (ia po o penefiti uma e lua), se fa’aaliga e uiga i lenei suiga, e ala i ni tusi i totonu o pusa meli, i le masina o Tesema, o le tausaga nei.

AFEA E TURISI E 2,600 IA LE TERITORI

I le aso Faraile o le vaiaso ua mavae, na afea ai e le meli o le Grand Princess ia le teritori ma sana pasese e pe a ma le 2,600 mai Europa ma Amerika.  E to’a 3,750 turisi ae to’a 1,150 le auva’a.

I lena 2,600, e to’a 700 sa mafai ona auai i tafaoga lea e faatautaia e ave pasi, e faataamilo i le motu.  Sa iai foi nisi na o latou fa’aaogaina taxi e fai ai a latou matamataga.

O le Grand Princess sa muai afea ia Tahiti ma Hawaii ae e le i agai mai i Amerika Samoa.  Ma a mae’a lea, o le a faapea ona folau atu agai i Niu Sila ma Ausetalia.

Sa mafai foi ona fai faatauga a turisi i nisi o oloa a faipisinisi o le atunu’u.

O nisi o maimoaga sa tapenaina mo turisi, na aofia ai se ava o feiloaiga sa faataunuuina i le afioaga o Fagasa, ma le umu masani lava i Pavaiai.

Na iai foi nisi o turisi na va’aia i le matafaga i Utulei ma Fatu ma Futi.

O leisi vaa turisi o le a soso’o mai ai nei, o le meli lea ua fuafua e taunuu mai i le Aso Tofi o le vaiaso nei.