TALA I VAIFANUA

Pago Pago - AMERIKA SAMOA

ASIASI ATU TAITAI O LE TERITORI I LE MOTU TELE I SALAFAI MO FONOTAGA ‘ATOA O SAMOA’

O le aso Lulu na se’i mavae atu nei, na faimalaga ai taitai o le malo o Amerika Samoa, i le motu tele i Salafai, aua fonotaga i va o malo e lua, o le ‘Atoa o Samoa’.  E lata i le to’a 40 le aumalaga mai i Amerika Samoa, i lalo o le taitaiga a le afioga i le Kovana Sili ia Lemanu P. S. Mauga, sa mafai ona asiasi atu i Savaii.  Mo nisi o i latou, o le latou uluai taimi lea ua o latou asia ai le motu o Safotulafai.

E tolu ni nofoaga mautu sa mafai ona vaevaeina ai le aumalaga.  O le afioga i le kovana sili sa malaga i le nofoaga lona lua, le afioaga o Siutu, lea sa mafai ona maimoaina ma aoaoina ai le gaosiga o le siapo.  E amata mai lava i le totoina o le u’a, o le saeina ma le taina, seia o’o lava i le gaosiga o le siapo.  Mo nisi o i latou sa auai atu i lenei faataitaiga, o le uluai taimi lea ua o latou molimauina ai lenei galuega taulima taua i le olaga o tagata Samoa.

O lenei galuega taulimaina o lo o fa’aauau pea ona ola ma faatinoina i totonu o lenei afioaga i Savaii, e ala i le lagolago malosi o polokalama faatupeina mai e le faigamalo a Samoa Tutoatasi.

O isi nofoaga na o’o atu iai asiasiga a totino o le ‘Atoa o Samoa’, o le malae vaalele i Maota, faasolo mai i le uafu tele i Salelologa, faapea ma le malae vaalele o lo o tu lata i Asau, i le mea o iai leisi uafu i Savaii.

Na mafai foi ona asiasi atu taitai o malo e lua i Samalaeulu ma maimoa ai i le auala laupapa tele lea o lo o i luga tonu o le vaitafe o le Mali’oli’o, lea ua avea ma fesoasoani tele i tagata o le motu tele, i femalagaiga aemaise lava i taimi o timuga ma lologa tetele.

O le susuga ia Solia Mutini, le faatonusili o le Ofisa o Atinae a Amerika Samoa, ma nisi o le aumalaga, sa mafai ona asiasi atu i le fale o lo o faagaioia ai a’ano o manu fasi, faapea le faato’aga tele a Tupa’i Lui, ma le Lata, o le faatoaga Koko a Savaii faapea ma le kamupani e tao ma gaosi ai le popo i Ulimasao.

O le aso Tofi, na tapunia aloaia ai le fonotaga a le Atoa o Samoa i Manase, le mea o lo o iai le tele o fale tafafao mo turisi, lea e iai le faletalimalo a Stevenson ma Tanu.  Ma toe taliu mai ai lea o le aumalaga i Apia, i le aso ananafi.

ALOAIA E LE STARKIST SAMOA IA LE PALEMIA O SAMOA

I le aso Lulu na se’i mavae atu nei, na faameaalofaina atu ai e le pulesili a le kamupani a le StarKist Samoa Co., ia se fa’ailoga (Charlie the Tuna Faafetai Award), e aloaia ai le Palemia o Samoa, le afioga i le Sao Faapito ia Fiame Naomi Mataafa, i lana lagolago malosi i le aufaigaluega a le kamupani i’a, aemaise i latou ua faapea ona malaga mai i lalo o le polokalama mo tagata faigaluega (Guest Worker Program).

Na iai se faamoemoe a le kamupani a le StarKist e tauaaoina le meaalofa fa’afetai i le Palemia i le faamanatuina o le latou 60 tausaga, ae peitai, sa le i mafai ona auai mai le afioga i le Sao Faapito.

Ae sa mafai ona maua e le pulesili o le Starkist, le susuga ia Injoo Ha, ia le avanoa e auai atu ai i le fonotaga tele a le ‘Atoa o Samoa’, lea na maua ai loa le avanoa e fa’ao’o atu ai le latou meaalofa i le tamaitai palemia.

Na faameaalofa mai e le afioga i le Palemia ia se $60 fou, le tupe fou a Samoa, i le faamanatuina o le 60 tausaga o le tutoatasi o Samoa.  I se tala tausua a le tamaitai Palemia o Samoa, na ia faapea mai ai, o lea ua faamanuiaina Ha ua na maua lona ata, ma e mafai foi ona faatauina atu i luga o a’upega tafa’ilagi.

O le tausaga ua mavae na mafai ona asiasi mai ai le tamaitai palemia i le kamupani a le StarKist Samoa i Satala, ma feiloai ai ma nisi o tagata Samoa sa faimalaga mai i lalo o le polokalama faapitoa, e galulue i le kamupani i’a.

SISI FAAVAELOTO TAGAVAI O LE TERITORI E MANATUAINA AI LE SUSUGA DAVID P. VARGAS

O le Aso Lulu na sei mavae atu nei, sa faataunuuina ai toe sauniga a le susuga David Vargas i le malumalu a le ekalesia Katoliko i Fatuoaiga, ae o le aso ananafi, i lalo o se malelega a le afioga i le sui kovana, ia Talauega E. V. Ale, sa faapea ona sisi faavaeloto ai tagata o le malo tele faapea Amerika Samoa, e aloaia ai le tautua a le alii loia a le malo, lea na maliu ia Setema 12, 2023 i le 77 tausaga o lona soifua.

I sana fa’aaliga fa’alauaitele, na ta’ua ai e le susuga Talauega le tuuto o le alii loia i le tautuaina o le teritori ma ona tagata.  Ma o le a le faagaloina ana galuega uma sa faia.