E FAI O LENEI AE O LENA

“O LE FAIFAATOAGA MANATU FAAMAUALUGA”

I se faatoaga i se tasi o a’ai, sa nonofo ai se faifaatoaga talavou ma sona toalua.  E ui lava i le alofa o leisi i leisi, ae a finau nei lenei ulugalii, e pei lava e leai se alofa i totonu o le aiga.

O se tasi aso, na manava mai ai le faifaatoaga ma fa’aalia lona le fiafia i lona toalua.

“Oka se palapala o lenei fale!” o lana ote atu lea i le tina o lo o tau kuka mai le meaai o le afiafi.

“Ia o le a lou manatu, e fai o le lalagaina o fala, o le kukaina o meaai, ia ma le pepe e tausi.  O le manatu a o oe e faigofie na mea?” o le tali ita mai lea a le fafine.

“E foliga mai na tafao i totonu o le fale ia le tatou povi,” o le tomumu a lea a le faifaatoaga.

“E a?  E leaga pe a tafao foi le povi i totonu o le fale!” o le avaavau mai lea a le fafine.

“E leai seisi e fia vaai i se fale faapegei pe a magava mai.  Ou ke usu i kaeao uma ma galue i le aso akoa!” o le tala ita lea a le faifaatoaga.

‘E a? O le a le mea e fai iai? O lea ou ke ala e le i vivigi moa e kuka lau meaai e ke ai ai ae ke lei alu e faigaluega!” o le tali mai lea a le fafine.

“A ga e leai lava se paka e faapaka ai se falaoa!” o le toe e’e mai lea a le tamaloa.

“OI, siaula, ga e ke silafia e umi le gaosiga o le paka.  Ae a mea e ke le alu ai oe e fai?” o le tali mai lea a le fafine.

“E faapea oe e faigaka le ga mea?” o le valaau atu lea a le tamaloa.  “Akogu e sili aku ai oga ou kausia le kakou fale!”

“Ia ua lelei la. Saugi la, kaeao, alu a’u i le faako’aga ae gofo oe e kapega le fale, kuka meaai, gaosi le paka ma vaai le pepe.” O le tala lea a le tina.

“Ua lelei!” o le toe valaau mai lea a le tamaloa.

O le taeao na soso’o ai, ua usu le fafine ma u’u lana agaese ia ma agai atu loa i le faatoaga.

Ae o le tamaloa, ua nofo a’e i luga ma faapea si ana tala.  “E vaai iai le kamaikai le la.  O le a le faigaka o aga mea e fai.  Ia lea la’a muamua ga vili se paka.”  Ona ia tago loa lea ua toso mai le masini e vili ai le pata. Ua vili vili le pata a le alii, ua faapea ifo.  “Ua ou fia inu.”

E savali atu le tamaloa i fafo e ki mai se tipoti vai, ae ona faalogoina le pa’o mai o le masini lea e vili ai le pata, ua taia i le tamo’e a lana pua’a.

E tamo’e atu le tamaloa, ua masa’a uma i fafo le susu lea e vili e gaosi ai le pata, ae ua fa o mai ai lana fagafao.  Ua ita tele le tamaloa ma e’e atu i lana pua’a e alu ese, ae peitai, na avea lana e’e ma mea na ala mai ai le pepe ma amata ona tagi.

Ua tamo’e atu le tamaloa e faanana le pepe, ae ona ia manatua le povi e le i tatalaina mai i fafo, i le taeao atoa.  Ma e le i fafagaina le povi, pe tatau le susu, ae o lea o le a ta le 12 i le aoauli.

Na manatu ifo le tamaloa, ua tuai ona tata’i le povi i le vaomatua e ai ai ana vao, ae la e tele vao o lo o ola i luga o lona fale, e mafai lava ona tata’i iai le povi e ai ai.  Oka se fiafia o le tamaloa i lana fuafuaga lea ua fai.

Ae ua va’ai atu le tamaloa, ua amata ona totolo solo mai le pepe i luga o le fola o le fale.  Ae o la lava e fa o le pua’a i le susu o lo o gaosi ai le pata.

Ua tago atu nei lenei tamaloa atamai tele, ua si’i mai le masini lea e gaosi ai le pata ma fafa i lona patua, ma savali atu e ki mai se vai e faainu ai le povi.  Ae punou atu i lalo e ki le paipa, ae taele uma i le kulimi o le pata.

Oka! Oka e!  Ua o’o i le taimi e tatau ona kuka ai le meaai o le afiafi, ua toeitiiti manava mai le fafine.

I le ogatotonu o le kuka a le tamaloa, ae ona toe manatua le povi la e i luga o le fale.   Ua popole ne’i pa’u le povi, o lea na alu ai ma le mano aua sai ai le manava o le povi, ona sau lea ma leisi itu o le manoa, ua nonoa i lona vae.

E fetaui lava le punou atu o le tamaloa e sa’eu le kaleve i luga o le ogaumu, ae sese’e mai ma le povi i lalo, ae manatua foi o leisi itu o le manoa lea e nonoa i le vae o le tamaloa.

E taunuu mai le fafine i le fale, oka se mea ina a matautia.  O lo o taupeupe atu lona toalu i luga o le fa’alo o le fale ma lona vae o lo o saisai i se manoa.  E le i matala atu le fesili a le tamaloa, ae pa’u mai loa ma le povi mai luga o le fale, o mai faatasi lava i lalo ma lona toalua.

Ua tamo’e atu nei le fafine ma taumafai e tatala ese le manoa mai i le vae o lona toalua.  Ae lagona loa le manogi o se mea manumeamu.  Ma le tilotilo atu i luga o le ogaumu, ia ua mu mai le kaleve a le tamaloa sa kuka.

Ua saofa’i ifo le tamaloa ma faapea mai i si ona toalua, “E faapefea ona e faia lenei faigata i aso taitasi?”

Ua savali atu le fafine ma si’i mai si ana pepe e le i faata’elea i le aso atoa, ma faapea atu i si ona toalua.  “Ou te taumafai lava e fai sina galuega e mafai ona ou faia i lea aso ma lea aso.” 

Ua faapea atu nei le tamaloa, “Sau e nofo i lalo ma fai sau malologa ae o lea o le a ou tago e laulau mai le ta kaleve mu.” Ua ata si fafine. 

“Ou te faafetai ia te oe ma lau galuega fita o lo o faia i aso uma, i le tausiga o le ta aiga,” O le tala lea a le faifaatoaga i si ona toalua.

Ua na o le ataata o le fafine ma milimili le lima o si ona toalua.  Ma na amata mai i lena aso, e le i toe lagona lava se ote po o se tomumu mai i le faifaatoaga.