TALA MAI I LE FONO FAITULAFONO

Pago Pago - AMERIKA SAMOA

FAAOPOOPO SE TOATASI I LE KOMITI FAAFOE A LE TBAS, TE’ENA SUI FAAULU A LE DBAS

I le amataga o le vaiaso, ae e le i alo atu le Maota Fono mo la latou malologa umi, na pasia ai e le Senate ia le susuga ia Maae Tuiasosopo, e avea ma se totino o le komiti faafoe o le Faletupe a le Teritori o Amerika Samoa (TBAS).

Na ta’ua i se tusi mai i le Peresetene o le Senate, le afioga Tuaolo Manaia Fruean, i le aso 27 o Setema 2023, le faaulufaleina e le afioga i le sui kovana ia Talauega E. V. Ale ia ni suafa se tolu, e aofia ai Maae Tuiasosopo, Leilua Stevenson ma Ruth Matagi, e faatumuina avanoa e tolu, lea na faamutaina ia Fepuari 14, 2023.

Ua suitulaga nei ia le susuga Tuiasosopo ia Manu’a Chen lea na faamutaina ia Fepuari 14, 2023 lona tofiga.  O Stevenson ma Matagi, ua toe pasiaina ma o le a fa’aauauina o la tiute i totonu o le komiti faafoe a le TBAS, ina ua faamutaina le aoga o a la tofiga ia Fepuari 14, 2023.  

O le umi o le a tautua ai i latou nei, o le a au atu ia Fepuari 14, 2027.

Na ta’ua e le afioga i le kovana sili, o i latou uma nei, ua lava le tomai faapitoa i tulaga tau tupe, pisinisi ma faletupe, e mafai ai ona o latou taitaia le TBAS.

Sa na o le susuga Maae na mafai ona auai atu i le iloiloga puupuu a le Senate.

Na ta’ua e le afioga i le Peresetene o le Senate, lea o lo o avea ma taitaifono o le Komiti Faafoe o Litaea mot agata faigaluega a le Malo, le lava o le tomai i le susuga a Maae, ona o ia foi o se tasi o totino o la latou komiti faafoe, ma o ia foi o se tagata fa’atuatuaina.

Sa mafai ona pasiaina e le Senate nei tofiga, i se palota 14 ioe, ma le leai o se faatu’iese.

TE’ENA SUI FAAULU MO LE KOMITI FAAFOE A LE DBAS

I le tauaofiaga ale Maota Fono i le vaiaso ua mavae, sa te’ena ai e le Senate ia le suafa o Eseneiaso Liu, lea na faaulufaleina mai e le kovana, e avea ma totino o le Komiti Faafoe a le Faletupe o Atinae a Amerika Samoa (DBAS).

Sa le umi lava le iloiloga o le tofiga a Liu, ma sa aloaia e afioga Senatoa lana tautua i le tele o tausaga mo le malo o Amerika Samoa ma ona tagata.

Ae peitai, ina ua tu’u atu i le palota lona suafa, e toafitu Senatoa na tali i le Ioe, ae toatolu sa te’ena lona tofiga.  E sefulu ni palota ioe e manaomia le pasia ai o lenei tofiga.

O lea na talosagaina ai e le Taitaifono o le Komiti o Tulafono, le afioga i le Senatoa ia Malaepule Saite Moliga, faapea totino o le komiti faafoe a le DBAS, ina ia ta’atia iloiloga mo isi totino o le komiti faafoe, seia toe taliu mai sui faitulafono mai i le latou malologa umi, ua alo atu nei iai.

Ae peitai, sa finauina e le afioga i le Peresetene o le Senate le fa’aauauina pea o iloiloga ona e manaomia ona fa’aauau galuega a le malo.

E na o le Senate e palotaina totino mo komiti faafoe a le TBAS ma le DBAS.

ILOILOGA A FAIPULE I GALUEGA I LUGA O ALATELE

O le aso Lulu o le vaiaso ua mavae, Oketopa 4, 2023, sa auai atu ai le tamaitai faatonusili o le DPW, ia Faleosina Voigt ma lana soa tau, le sui faatonusili ia Fa’alavai Taase, i se iloiloga a le Komiti o Galuega Lautele a le Maota o Sui, aua se ripoti lata mai i galuega mo le faaleleia o le alatele a Amerika Samoa.

Ina ua fesiligia e le afioga i le Faipule mai Vaifanua, ia Shawn O. Va’a ia se ripoti lata mai i le teuteuina o la’au i tafa ala mai Afono e pa’ia Vatia, lea o lo fai ma faafitauli i femalagaiga o pasi aoga, sa saunoa Voigt, e tusa ai ma se tala mai i le pulesili o le ASPA, o Wallon Young, e le o lava ni a latou ta’avale e iai ato e mafai ona au i luga o la’au e faia lea galuega.  O lea ua o latou a’apa atu nei i le ASTCA ma nisi o pisinisi tua mo se fesoasoani i lea tulaga.  

O se fesili mai i le afioga i le Faipule o le itumalo a Sua #1, ia Luaitaua Gene Pan mo Voigt, sa ia fia malamalama ai i galuega o lo o faia i luga o alatele, po o le tulaga faaletonu o alatele ona o nei galuega, ma o lo o ia fia malamalama po o faapefea ona fofoina ia faafitauli.

Na saunoa Faleosina, o so’o se galuega lava e fai e kamupani tua, mo le malo o Amerika Samoa, e tusa lava pe totogi i tupe a le malo lotoifale pe feterale, o le tiute lea a lena kamupani e fai pe a mae’a le latou galuega i luga o le alatele, o le toe faaleleia lea o le auala.

Na fesiligia e le afioga i le Faipule mai i Manu’a, ia Fa’auifono Vaitautolo, po o ai lea o lo o gafa ma le vaaia o galuega ia e fai e kamupani tua.  Sa tali Faleosina, o le DPW.  Na saunoa le tamaitai faatonusili, o so’o se taimi lava e mae’a ai se galuega a nei kamupani faakonakarate, ona o latou aumai lea o a latou pili e totogi, ma o ai lava o le latou ofisa e gafa ma ia galuega, e na te sainia muamua nei pili, e faamautinoa ai ua mae’a le galuega.

Sa faamanatu mai e le afioga i le Faipule o le itumalo o Sua #2, ia Avagafono Tuavao Vaimaga Maiava, ia le galuega o loma nei mo le alatele i Masausi, lea e amata atu i le fale faatali pasi seia taunuu i le falesa i Masausi.  Na fautuaina e Avagafono le tatau ona faamuamua o lea galuega, ona o lea ua fa’ato’a pasia le pili mo le faatupeina o lea galuega.

Na fia iloa e le afioga i le Faipule ia Vailoata Eteuati Amituanai, po o iai se fuafuaga a le tamaitai faatonusili ma lana ofisa, mo le toe faaolaina o le ‘tramway’ lea i Utulei.  Na tali mai le sui faatonusili o le DPW, e leai se fuafuaga a le DPW  mo le faaleleia o fanua lea o lo o iai le ‘tramway’ ona o lologa ia e a’afia ai aiga o lo o nonofo i lea vaega o Utulei.

Na toe fesili Vailoata po o ai e gafa ma uaea o le ‘tramway’ lea o lo o iai lava i luga o le mauga i Utulei ona o lo o tete’e mai le ofisa o lo o gafa ma le puipuiga o tala faasolopito o le teritori.

ISI MATAUPU A LE MAOTA O SUI

Ua malolo nei le Maota Fono mo le latou malologa umi lea fa’ato’a toe tatala aloaia i le tausaga fou, seia vagana e talo e le Kovana Sili se tauaofiaga faapitoa.

I se iugafono aufaatasi a le Senate, o lo o faatonuina ai le Loia Sili ina ia talosagaina le Faamasinoga Maualuga, e filifilia se loia tutoatasi, e na te suesueina le faaaogaina o le $36 miliona, e aunoa ma le pasiaina mai e le Fono Faitulafono.

Ua tu’uina atu nei e le afioga i le Fofoga Fetalai, ia Savali Talavou Ale, ia lea pili i le taitaifono o le Komiti o Paketi ma Tupe Fa’asoasoa a le Maota o Sui, le susuga Vailoata Amituanai faapea le taitaifono o le Komiti o Faamasinoga ma Tulafono, le susuga Tapai Alailepule Tapai.

O le masina o Ianuari i le tausaga fou, o le a toe tatalaina aloaia ai tauaofiaga lona 38 a le Fono Faitulafono.