O OE O LO’U TAMA?

VAEGA 12

Taeao Manuia, Taeao Toto’a i le mamalu o le tatou aufaitau nusipepa i lenei taeao fou.  Tatou te tau fai si’i le Viiga ma le Faamanu i le Atua Silisili Ese i lana tausiga alofa ma lana tausiga mamana ia i tatou uma, ua mafai ai ona o tatou toe fesilifai i luma o nu’u, ae le o tua o nu’u, i lenei taeao fou.  E faafeiloai atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapa’au i le Lagi.  Ae saga’i mai loa, o le a toe soso’o atu le tatou fagogo “O OE O LO’U TAMA?” i lona vaega 12.

***************************************

Na pei a pe le fatu o le tina ia Eseta ina ua alu atu i le potu o lana tama o Naomi, ae ua leai se Naomi o iai.  “Kagielu! Kagielu! Ua leai se Gaomi!” O le valaau leotele atu lea a Eseta i lona toalua o Tanielu, ma tamo’e atu lava i le la faleaiga, i le mea o lo o tapena mai ai e Tanielu ia gasu o le ti o le taeao.

“E a lau tala?” o le fesili mai lea a Tanielu ma le popole o lona loto.

“Ua leai se Naomi mai lona potu.  Ae ou te le i vaai foi ua usu,” o le tali mai lea a Eseta.  “Se’i valaau ia Ruta ma Iakopo pe la te le’i vaai ia Naomi ananei i le taeao.  Ma siaki le falemai pe ua taunuu.” 

O le avaavau atu lava lea a Naomi ma tago i lana telefoni e valaau lana fanau matutua pe na vaai i le teine laititi, ae o le taimi lea ua vili ai e le tamaloa o Tanielu ia le falemai e vaai pe u ausu Naomi.

“Oi, faamalie atu Papa,” o le tali mai lea a Naomi mai i le falemai.  “O lea na ou usupo mai ananei e ma te talanoa ma la’u pule.  Faamalie atu ua ou faapopoleina oulua ma Mama.  Ae e se’i uma ona ou alu atu lea tatou te talanoa.”

Ua tau alu ifo i lalo suka a le ulugalii o Tanielu ma Eseta, ina ua la iloa, o la e okay si a la tama.

Ae o le taimi lea, o lo o tau sema lava se taimi o Naomi e alu ai e talanoa ma lana pule, e faamavae iai, ona ua tonu i lona loto, o ia o le a faamavae mai i lana galuega, ae e le i iloa e Salome, o ia lea na la aooga faatasi.

Manatua foi, o le taimi lea na aooga faatasi ai Salome ma Naomi, o la e lapo’a si teine o Naomi.  Ma o leisi lea mea na matuai fuli ai lava Salome e fai, o le ula i le tino lapo’a o si teine o Naomi.

Ua o’o i le malologa o le aoalu, ae savali atu loa Naomi e agai atu i le ofisa a lona pule, ae o la fetaui tutu lava ma le alii fomai o Taki o lo o savali atu agai i le potu malolo a fomai ma tausima’i.  

Na tilotilo atu Taki ia Naomi ma ona manatua ai le teine lea sa tamo’e ausulusulu i le fale faatali pasi i le aso lea na se’i mavae atu, ae o lo o tagi.  Ua pupula to’a atu Taki ia Naomi ma ia iloa ai, o le tamaitai lea sa ona vaai iai.

Ua ata atu Taki ia Naomi, ae ona o lo o mamafa lava si avega o lo o amo nei e Naomi, sa leai ma se ata mai i le alii fomai, ae ua na o le savali ese atu.

Ua tu le alii fomai o Taki ma tilotilo mai i le savali ese atu o Naomi.  Ona ia liliu lea ma alu agai i le potu o iai fomai ma tausimai.

A’o iai Taki i totonu o lea potu, sa faasolo lana vaai i luga o le laupapa lea o lo o faapipi’i ai fa’aaliga ma puletini a fomai ma tausimai.  Ma tau ai lana vaai i le pepa lea sa faapipi’i ai e Naomi le fa’aaliga a lona tama.

Ua a’apa atu nei Taki ma se’i mai le pepa ma faitau.  Na vaaia le ataata lemu o Taki ma ia lilium ai ma fesili i fomai ma tausima’i na i totonu o le potu, pe o ai e ana lea pepa.

Sa tali atu se tasi o tausimai, “Oi o le pepa e si teine o Naomi.  Ae pei uma lava o la e alu i le ofisa a le pule o le falemai.”

Ua savali faatopetope mai nei ia Taki ma agai atu loa e tuliloa ia Naomi, i le ofisa o le pule ale falemai.

E FAIA PEA!