TALA I VAIFANUA

Pago Pago - AMERIKA SAMOA

TAUNUU VAALELE FOU A LE TALOFA AIRWAYS

O le aso Lulu na sei mavae atu nei, na taunu’u ai i le malae vaalele i Faleolo ia le vaalele fou, e atoa iai vaalele e tolu, a le ofisa vaalele a le Talofa Airways.

Sa pailateina mai e le susuga Thomas Lobex, le pule o le Gateway Company i Kalefonia faapea le alii kapeteni ia Jeffrey Hunter, le taitaifono o le Talofa Airways, ia le va’alele fou.

Na fa’aalia mai e le faletua ia Maria Westerland Hunter, se tasi o le pulega a le Talofa Airways, o lenei vaalele fou, e leai sona eseesega ma vaalele e lua o iai nei a le latou ofisa vaalele.  Ma o le a faafaigofie ai ona lesitala ma e mafai foi ona lele i so’o se motu o le Pasefika.

O le masina o Novema lea ua faamoemoe e amatalia ai faigamalaga a le Talofa Airways i le motu o Tonga.  

Ae mo le taimi nei, o le a fa’aauau pea le tautua a lenei ofisa vaalele i le va o malaevaalele a Faleolo ma Tafuna, ma se faamoemoega o le a mafai ona tulaueleele a latou vaalele i Fagalii.

Na saunoa Westerland Hunter, e mafai ona o latou fa’aaogaina le malae vaalele i Fagalii, ae o si ona faaletonu, o le a tele se tupe e alu ai. 

Ae o le taimi nei, o lo o tele pea ni a latou pasese mai Amerika Samoa o lo o malaga agai i Fiti, Hawaii, Niu Sila ma Ausetalia faapea ma pasese e fia malaga i Savaii ma nu’u tulata i Faleolo.

Na saunoa foi Westerland Hunter i le iai foi o se talosaga mo ni a latou faigamalaga i motu o Wallis ma Futuna.

NOFOAGA SULUFA’I MAI SAUAGA

Ua tatala aloaia nei se ofisa autu mo sulufaiga mai sauaga, i le fogafale tolu o le Tedi o Samoa i Fagatogo, ua fa’aigoaina o le “Jessica’s Place”.  O lea nofoaga e mafai ona sulufa’i iai i latou ua faapea ona feagai ma faigata ma tiga o lenei lalolagi.

Ua fetaui le tatalaina o lenei nofoaga o sulufaiga, i le aso Faraile o le vaiaso ua tuanai, ma lo tatou tuvae i le masina o Oketopa, le masina e faamamafaina ai le nofo uta i sauaga.

O lenei nofoaga o sulufaiga, ua fa’aigoa lea i se tina talavou na maliu fasia i lima o lona lava toalua, ia Mati 2020, ma tu’ua ai na o si a la fanau iti e toalima.

Faatasi ai ma se faamanuiaga mai i le tina o Jessica, ua faaigoaina ai lenei nofoaga o sulufaiga i si ona alo, e avea ma faamanatu e le gata mo Jessica, ae faapea foi i latou uma ua maliliu ona o sauaga.

Sa saunoa le pule o le ‘Jessica’s Place’, le tamaitai foi sa faavaeina lenei fale o sulufaiga, o Mona Uli, e faapea, e le tatau ona tatou fulitua mai ia i latou ua sauaina, pe tatou te faapea foi, e le o se tatou feau.  O le sauaina o tagata, o le feau lea a tagata uma.

E toatele i latou sa mafai ona auai atu i le tatalaina aloaia o lenei nofoaga o sulufaiga, ma sa faitauina ai foi e Uli le Fa’aaliga Aloaia mai i le Kovana sili, e fa’alauiloa ai le masina o Oketopa, e avea ma masina e nofo uta ma galulue faatasi ai tagata o le teritori, ina ia faasaga tau atu i sauaga.

O lenei nofoaga o sulufaiga, o lo o lagolago malosi iai se faalapotopotoga ua faaigoaina o le ‘Back on Track’, ma e fa’alagolago malosi i fesoasoani mai i tagata lautele.

O le alii o Derek Helsham, lea o lo o avea nei ma polofesa i le Kolisi Tuufaatasi a Amerika Samoa (ASCC) ma le sui faatonusili o le ‘Back on Track’, sa tatalaina aloaia le sauniga i le aso Faraile, e ala i se minute o le filemu, e aloaia ai tagata uma ua maliliu ona o sauaga, a’o faitauina e Mary Anne Peck ia ni solo filifilia, ona tataloina ai lea o le sauniga e Rachel Tilo-Leiato, e faamanuiaina ai le ‘Jessica’s Place’.

E pei ona fa’ailoa mai e Uli i le Samoa News, sa maualuga foi lea taeao, i le auai o sui o le Ofisa a Leoleo faapea nisi mai i le Ofisa a le Loia Sili, ma sa mafai ona o latou saunoa ai ma u’unaia tagata uma ina ia mafai ona galulue faatasi, ina ia taofia sauaga ma amioga mataga, i totonu o Amerika Samoa.

O lenei nofoaga o sulufaiga (Jessica’s Place) e faapitoa lava mo i latou ua a’afia i sauaga, e mafai ona maua ai se fesoasoani i o latou mafatiaga.  E mafai foi ona maua ai se fesoasoani tau i le tulafono mo i latou ia.

Na saunoa Uli, o le tele o taimi, e leai se nofoaga saogalemu e mafai ona mapu iai i latou o lo o feagai ma nei mafatiaga.  Sa ia ta’ua e faapea, a o galue o ia i le ofisa loia tutoatasi, sa masani ona ia fa’afeaoina atu i latou ua a’afia i sauaga ina ia puipuia i latou.  Ae a mae’a le faamasinoga, e leai se puipuiga mo nei tagata.   O le mafuaaga lea ua o latou filifilia ai lea nofoaga mo le ‘Jessica’s Place’.

O lea ua mafai ai ona fa’afaigofie ona o latou malaga atu ma malaga ese mai i le fale faamasino.

Na ta’ua e Uli, e leai ni faamaumauga i totonu o Amerika Samoa e iloa ai pe toafia ni tagata ua a’afia pe maliliu foi i sauaga, ae i totonu o le Pasefika atoa, mai i le toalima o tamaitai, e toatolu lava i latou ua a’afia i sauaga.

O lo o galulue so’otau’au nei le Jessica’s Place ma le vaega a le DHSS i le latou polokalama e puipuia ai tagata matutua, faapea i latou ua a’afia i sauaga i totonu o aiga.  O lo o ua maua foi se fesoasoani mai i le malo, e ala lea i le totogia o le lisi o le latou nofoaga o sulufaiga, i tupe o le ARPA.

Fa’atasi ai ma le fesoasoani ma foai mai i le tele o tagata ma pisinisi i totonu o le o le teritori.

Afai e te manaomia se fesoasoani, valaau i le 272-3213 po o le 633-2222.  O lenei nofoaga o sulufaiga e matala mai i le 8 i le taeao seia pa’ia le 3 i le aoauli, i le Aso Gafua e tau i le Aso Tofi.