TALA I VAIFANUA

Pago Pago - AMERIKA SAMOA

AMATAINA FONOTAGA FAALETAUSAGA ‘ATOA O SAMOA’

O le aso Faraile o le vaiaso ua tuanai na faimalaga atu ai taitai o le Malo o Amerika Samoa, i le motu tuaoi o Samoa Tutoatasi, aua le faapaiaga o le laufanua o le a fausia ai nei le ofisa o le Amepasa a Amerika Samoa, atoa ai ma le amataina o fonotaga faaletausaga, a le ‘Atoa o Samoa’ lea na amataina i le aso ananafi, mo aso e lua.

Na ta’ua e le afioga i le kovana sili ia Lemanu P. S. Mauga, o mataupu o le a soalupuleina i nei fonotaga, e aofia ai le tulaga ua iai mataupu sa talanoaina i le ‘Atoa o Samoa’ i le fa tausaga ua tuanai.  Lea e aofia ai mataupu i eria, e pei o Femalagaiga, puipuia o Tuaoi, Faigamalaga, Tupe ma Suega Tusi, suiga o le siosiomaga ma lona tau, Tulafono tau i puipuiga o le saogalemu lautele, Soifua maloloina, Turisi ma isi lava mataupu, mo le lelei o faigamalo e lua.

MALU PUIPUIA TAGATA SAMOA I ISARAELU

I se ripoti mai i le nusipepa a Samoa, o le Samoa Observer, ua ta’ua ai le saogalemu o ni tagata Samoa se to’a 22 o lo o iai nei i Isaraelu mo ni fuafuaga faalelotu.  O lenei aumalaga na taunuu i Tel Aviv i le aso 29 o Setema, ae lilo i manatu o le a tulai mai le faafitauli lea o lo o vevesi ai nei malo i Sasa’e Tutotonu, talu mai le Aso Toonai na sei mavae atu nei.  I le to’a 22 o tagata Samoa o iai nei i Isaraelu, e toaiva e malaga mai i Niu Sila, ae o leisi 13 e mai i Ausetalia ma Amerika. 

Sa mafai ona maua se fesootaiga a le Samoa Observer ma le taitai o le aumalaga, ia Shivani Sharma ma sa mafai ona faamaonia mai lo latou saogalemu i totonu o le latou faletalimalo.  Ae e le o mautonu i le taimi nei, se aso e mafai ona o latou tu’ua ai Isaraelu, ae o lo o iai se manatu e latou i totonu o Fiti i le Aso Faraile.

FAAMANATU LE TUTOATASI O TAGATA FITI

O le aso ananafi, Oketopa 10, 2023, sa faamanatuina ai le 53 tausaga talu ona tutoatasi le malo o Fiti, talu ona i lalo o le puleaga a le malo  o Peretania.

Sa auai uma tagata Fiti o lo o aumau i totonu o Amerika Samoa i le faamanatuina o lea aso taua i o latou tagata, e ala i se pati tele na mafai ona auai ai, e le gata i tagata Fiti mao’i, ae faapea foi ia tagata Rotuma. 

Sa saunoa le alii fomai o Dr. Koli Niumataiwalu, lea ua 25 tausaga o aumau i totonu o Amerika Samoa ma lona aiga, o so’o se mea lava e faapotopoto ai tagata Fiti, e faia ai foi ma le latou ‘yagona’ ia po o le inuga ‘ava.  O isi taimi e aoina lava lenei inuga ava, ma e pepese ma talatalanoa ai lava.

O le faatasiga sa faataunuuina i le aso ananafi, na maua ai foi ma se avanoa e fa’aalia ai le lagolago malosi o tagata Fiti i le latou au lakapi lea o lo o feagai nei ma taamilosaga lakapi mo le Ipu o le Lalolagi.

Sa ta’ua e Dr. Niumataiwalu, ua toatele lava nisi o ona uso ma tuafafine mai i Fiti, ua galulue nei i le malo o Amerika Samoa, e le gata i totonu o le falemai ae faapea foi totonu o le ASPA ma le ASTCA, ma nisi o ofisa ma matagaluega a le malo.