Sauni le SSIC e faafofoga i ni molimau se to’afa e tusa ai ma le mataupu i le Kite Runner

Pago Pago - AMERIKA SAMOA

O le aso Lua na se’i mavae atu ne, sa soalaupuleina ai e le Komiti Su’esu’e a le Senate (SSIC), ina ua mae’a a latou tauaofiaga masani, ia le ripoti sa tu’ufaatasia e le Ofisa o le Homeland Security (DHS), e tusa ai ma le faigamalaga a le Kite Runner lea na alu i Samoa ma toe fo’i mai.

Na fa’ailoa atu e le taitaifono a le SSIC, le afioga Senatoa Togiola T. A. Tulafono, i le mamalu o le komiti, le le atoatoa o lenei ripoti, ona e iai nisi o mataupu taua e le o aofia ai i totonu, aua sa tatau i le DHS ona suesueina nisi o taitai ole malo o lo o a’afia i lenei mataupu.

Sa faatula’i e Togiola se manatu ina ia a’ami fa’atulafono (subpoena) mai le sui faatonusili o le Ofisa mo le Faasaoina o Tala Faasolopito a Amerika Samoa (ASHPO), ia Letitia Tish Peau, le Supavaisa o Femalagaiga i luga o sami, ia Loleni Faiai faapea le taitai o le uafu a le Matagaluega o Uafu ma Malaevaalele, ia Chester Manaea, mo ni a latou molimau ina ia mafai ona maua uma faamatalaga lea o lo o manaomia.

Sa saunoa Togiola, e foliga mai o lo o a’afia foi Manaea i lenei mataupu ma e na te silafia mea sa tutupu, ae peitai, e le o manino faamatalaga sa ia tu’uina atu i le DHS, lea e le o manino ai ana mea sa fai ma faaiuga na faia, i le taimi na tulai mai ai lenei faafitauli.

Sa fa’aalia e Togiola, e tusa ai ma le ripoti mai i le DHS, na toe taunuu mai le Kite Runner i ogasami o le teritori, i le 3:30 i le vaveao, ae na fa’ato’a kilia le va’a i le 6 i le taeao.  E le gata i lea, o lo o ta’ua i le lisi, e toafitu le pasese a le va’a, ae peitai, ina ua kilia le va’a, e na o le to’afa tagata na iai.  O le kapeteni ma le auva’a e to’atolu.  E leai foi ni faamaumauga o ta’u mai ai se uta mai Samoa.

Na saunoa foi Togiola, e leai se mea o ta’ua i ripoti mai i le Ofisa a Faatoaga ma le Ofisa o Tiute, ma e taunuu mai foi le va’a, e leai ni pepa kilia mai Samoa. 

Ma o lea ua fautuaina ai e le susuga i le taitaifono, ia le a’ami uma o i latou ia e toatolu, e molimau i luma ole komiti, i le taeao nei, ina ia mafai ona faia ai se faaiuga a le komiti, pe tatau ona faaooina atu lenei mataupu i le Loia Sili ma le Kovana, ma se fautuaga ina ia o’o lenei mataupu i luma o le faamasinoga.

Sa lagolagoina e le afioga i le Senatoa ia Malaepule Saite Moliga le manatu o le taitaifono, ma sa ia ta’ua foi e faapea, ua mae’a ona ia faitau i le ripoti a le DHS ma e le i manino foi ia te ia, ma o lea na ia faatuina ai loa se manatu ina ia pasia le fautuaga a le afioga Togiola.

Ae peitai, na faatula’i e le afioga i le Peresetene o le Senate, ia Tuaolo Manaia Fruean, se mau, ina ia valaau ma se molimau lona fa.  Na talosaga Tuaolo ina ia faaopoopo iai ma le suafa o le alii o Sheehan Samuela Seigafo i le lisi o molimau, aua e na te silafia uma mea na tutupu.

Na saunoa le alii peresetene, o Seigafo o se tagata o lona aiga, ma e iai sona talitonuga, o le a mafai ona maua mai se ata manino i le mea na tupu, i le molimau a Seigafo.  Sa faamatala e Tuaolo, na ia aamia Seigafo ina ua ia fa’alogo i le tala, o Seigafo na sainia le pepa e kilia ai le Kite Runner.   Ma e tusa ai ma se faamatalaga a Seigafo, na taunuu le Kite Runner i Samoa, e leai ni pepa kilia, ae o Tish Peau lea sa valaau atu i lo latou ofisa mo le kilia.  Ma sa ta’uina e Seigafo ia Tuaolo, o le tagata na sainia le kilia, o Likitoa Sopoaga, i lalo o le faatonuga a Juliano Falaniko, le sui pule o le Ofisa o Tiute.  O lo o i atunuu i fafo i le taimi nei, ia Sopoaga.

E tusa ai ma tulafono a le Matagaluega o Uafu ma Malaevaalele (DPA), o so’o se va’a lava e folau ese atu ma Amerika Samoa, e tatau ona faaulu mai le lisi o lana auva’a faatasi ma kopi o a latou tusi folau, ona fa’ato’a tu’u mai lea e le DPA ia le fa’atanaga e folau ese atu ai se va’a.  O le pepa lea, e alu ma le pule o le va’a po o le kapeteni foi, i le Ofisa o Tiute e pasia mai, ona maua mai ai lea o le kilia (COC).

Ae peitai, e tusa ai ma le ripoti a le DHS lea na faaulu ia Aukuso, na malaga le vaa i Samoa ia Aperila 25, e aunoa ma se kilia (COC) ae na fa’atoa maua mai i le Ofisa o Tiute ia le kilia (COC) ina ua taunuu le va’a i Samoa, lea na mafai ai ona taula i Matautu, ona toe malaga ai lea i Savaii.

O le kilia (COC) lea, o lo o tusia ai le aso 25 o Aperila, le aso lava e tasi lea na malaga ese atu ai le Kite Runner mai i Amerika Samoa, ma o lo o sainia ai le pule o le Ofisa o Tiute.  Ae peitai, o le faamatalaga a le pule o le Ofisa o Tiute i vaega su’esu’e, e na te le i sainia se pepa, ona o le taimi lea sa iai o ia i atunu’u i fafo.

Ae sa faamatala e Juliano Falani, le sui pule o le Ofisa o Tiute, sa taofia le kilia a le Kite Runner, ma na faimalaga ese atu le va’a e aunoa ma se kilia.  Ma o se tasi mai i le vaega o le ‘Customs Vessel Unit’ sa na ia sainia le kilia.  Na iloa mulimuli ifo i isi suesuega na faia, o le susuga ia Sheehan Samuela Seigafo, sa na ia sainia le kilia.

O lea, na toe suia ai e le taitaifono a le SSIC ia le mau, ma fa’aatoa ai le to’afa o molimau o le a amia (subpoena), lea na faaluaina e le afioga i le Senatoa ia Ponemafua Tapeni, lea na saunoa, e na te le talitonu i le ripoti mai i le DHS.

O le taeao nei lea ua fuafua e toe fa’aauau ai iloiloga a le SSIC pe a mae’a tauaofiaga masani a le Senate.