E FAI O LENEI AE O LENA

“O LE TUPUA A LE FAATAUOLOA”

I aso a la ua leva sa nofo ai i se vanu se ulugalii faatauoloa ma se la tamaititi.  O lenei tamaititi, o se faanoanoaga tele lea i le tama o le aiga, ona e fai o le paie ae o le matua’i vaivai o le mafaufau.  Ae e alofa faamaoni lava iai le fafine i le tamaititi. 

Ina ua o’o i tausaga ua tatau ona saili ai se to’alua o lenei atalii, sa augani atu iai lona tina, e saili se teine lelei la te faaipoipo.  Ae peitai, o le maasiasi o le tamaloa faatauoloa i le paie, toe vaivai o lona atalii, na manatu ai e le faia se to’alua a lona atalii.  Ae sa le te’a ai lava le viga o le tina ole aiga, ina ia saili se tamaitai e faaipoipo iai le la tamaititi.

Na fiu lava si loomatua e tau si’i i luga si ana tama, ae tasi lava le tali a le toeaina, e leai.  Ua faasaga atu le toeaina i le otegia le loomatua.   Ma na i’u lava ina o’o i se tasi aso, ua tiga taliga o le toeaina i le viga a lona toalu, na ia faapea atu ai, “Ia ua lelei, valaau le tama e sau.” 

Ua sau nei le atalii ma tu’u iai se tupe apamemea e tasi ma faatonu e alu i le maketi e faatau mai ai se mea e mafai ona ai, toe mafai ona inu, o se mea e mafai ona lamu, ma toe mafai ona toto i le palapala, ma e mafai foi ona ‘ai ai le povi.

Ua alu nei le alii talavou i le maketi, e le’i umi lava ae tau atu i se vaitafe.  Ua nofonofo ai iina lenei alii talavou ma tau mafaufau le tupua a lona tama.  Ua amata na tiga le ulu o le tamaititi i le tau mafaufauina o le tali o le tupua a lona tama, ae savali atu loa se teine ma fesiligia o ia po o le a le me aua tupu.  

Ua tago le alii talavou ma faamatala uma le tala i lenei teine.  Ma sa faapea atu le teine, “Alu e faatau mai se meleni, o le meleni e mafai na ai, e mafai foin a inu, e mafai na e lamuina ma e mafai ona toto i le palapala ma e mafai foi na ‘ai ai ma lau povi.”

Ua alu fiafia le alii lenei ma faatau mai le meleni, ma toe fo’i i ona matua.  Na le iloa le mea n agata ai le fiafia o le tina ina ua toe fo’i atu si ana tama ma le meleni ma le tali o le tupua a lona to’alua.

“Vaai i le poto o si a’u tama,” o le tala fiafia lea a le tina.

Ae oso atu le alii talavou, “Oi, o le teine na ma fetaui i tafatafa o le vaitafe sa ta’uina mai ia te a’u le tali o le tupua.”

Ae peitai, sa le kea le toeaina po o ai na ta’uina i lona atalii le tali o lana tupua, ona ua fiafia tele ua toe fo’i atu lona atalii ma le tali.  O lea na valaaulia ai e le ulugalii si teine lea na tu’uina le tali i le la tama, e latou te talisua faatasi.