POU TIUTE A LEOLEO

Pago Pago - AMERIKA SAMOA

TOE MOLIA NISI E TOALUA MAI I OSOFAIGA A LEOLEO I PAGO PAGO

E pei ona sa ripotia e le Samoa News i se taimi ua fano, e to’a 15 i latou sa ave faapagotaina e leoleo mai i Pago Pago, i ni nai vaiaso ua tuanai, ina ua osofai e leoleo le maota o Monte Carlo Ieremia.  E toalua i la’ua na maua atu e leoleo i le fale o Ieremia, o Togi Fereti ma Fa’afili Lesa, lea na loka mai ai iina e leoleo, ina ua maua ai e leoleo ia vaega o fualaau faasaina, o le Aisa.

Ua molia nei Fereti ma Lesa i le umia faasolitulafono o vaega o fualaau faasina ma e ta’i $2,000 le tinoitupe faatulagaina e mafai ona tatala ai i la’ua mai i le falepuipui.

ETI MUAGUTUTIA

Na o’o atu i le ofisa o leoleo i Fagatogo se tamaitai talavou faatasi ma se tagata matua, e faauluina se tagi e faasaga i le alii o Eti Muagututi’a, i lona faia o ni uiga mataga i le tamaitai talavou ia Setema 17, 2023.

Sa faamatala e le tamaitai talavou, na faalua ona faia e le ua molia ia uiga mataga ia te ia.  O le taimi muamua na tupu ai lenei faalavelaev, o le masina o Oketopa 2022, a o iai le tamaitai talavou ma sona tausoga laititi i totonu o le potu a le ua molia.  Na ta’ua e le tamaitai talavou, ina ua alu atu le ua molia i totonu o lona potu, sa ia tago ua tuli i fafo le tausoga laititi ae faatonu le tamaitai talavou e nofo i totonu o le potu.

Sa ta’ua e le tamaitai talavou le titinaina o ia e le ua molia, agai i le sima o le fale ma faatonu o ia e aua ne’i faamatalaina le mea na tupu, i seisi.  Ona amata loa ona faia e lenei alii amioga mataga i le tamaitai talavou, ae na te’i ua tu’itu’I mai e le atalii o le ua molia ia le faitoto’a o le potu.

Sa faamatalaina e le tamaitai talavou i le atalii o Muagututia le mea sa faia e lona tama ia te ia, ma na ita le atalii o le ua molia ma faapea mai, “O lea foi ua toe fai.”

O le faalavelave lona lua, e tusa ai ma le faamatalaga a lenei tamaitai talavou, sa tulai mai i le aso 13 o Setema, 2023.  Sa faatonuina e le ‘Aunty’ ia le tamaitai talavou e vaai lona tausoga laititi, ae se’i alu i le faleoloa.  Ae alu atu foi le ua molia ma tuli i fafo le tausoga laititi mai le potu ma loka le potu.

Na toe amata foi ona faamalosia e le ua molia le tamaitai talavou.  Ma sa faamatalaina e le tamaitai talavou mea na tupu ia te ia, i ana uo ma sa faamatalaina e ama uo i a latou matua.  Ma sa sau se tasi o matua o uo a le tamaitai talavou, ua faamatala le mea sa tupu i le ‘Aunty’ a le tamaitai talavou.  Ma o iina na faamatala ai loa e le ‘Aunty’ ma le tamaitai talavou i matua o matua, le mea sa tupu.

O le aso 17 o Setema, 2023 i le 3:00 i le afiafi, na lokaina mai ai e leoleo ia Muagututia mai lona maota ma aveina atu i le ofisa a leoleo i Fagatogo mo le suesueina o lenei mataupu.

Sa faamatala e le ua molia, i le masina o Oketopa 2022 sa ia vaaia ai le tamaitai talavou ma lona tausoga i totonu o se potu o le fale ma sa ia suesueina le tamaitai talavou e uiga i se fesili na fesiligia ai o ia, e le uso laititi a le ua a’afia i lenei mataupu, ae o lo o iai le tausoga laititi i totonu o le potu.

Sa ta’ua e le ua molia, na ia fesiligia le tamaitai talavou po o le a le uiga o le fesili a lona uso laititi lea sa ia fesiligia ai o ia (le ua molia), e uiga i se “alii na faia ni uiga ma’oti”, ma sa tali le tamaitai talavou o tala tausua a lona uso.  Sa ta’ua e le ua molia, sa ia faatonuina le tamaitai talavou, e aua le pepelo ma ia faatonuina le tamaitai talavou e sisi i luga lona ofu, ona o lona fia iloa pe na faia e seisi ni uiga faafeusuaiga ma le tamaitai talavou.

E le gata i lea, sa faamatala e le ua molia, na ia faalogo i ni tala mai isi tagata, ua ia faia ni uiga mataga i le tamaitai talavou, ma na tete’e le ua molia, i lona faia o nei tulaga i le tamaitai talavou.

Ua molia nei Muagututia i faitauga e valu, e aofia ai le faia o ni uiga mataga i se fanau talavou, o le faia o amioga faasotoma, o le faaoolima ma le taofia faamalosi o se tagata.

E $75,000 le tinoitupe faatulagaina e mafai ona tatala ai le ua molia, mai i le falepuipui.

I le masina o Setema 2018, na ioe ai Muagututia i lona faia o ni uiga mataga i se fanau talavou.

FAAOOLIMA M ALE FAATUPU VEVESI I NOFOAGA FAITELE

Na agai atu leoleo i le afioaga o Fagasa ona o se ripoti e uiga i se alii o lo o faatupu vevesi i totonu o le nu’u, laulauvavale solo ma faaoolima i se fafine.  Ina ua taunu’u atu leoleo i Fagasa sa vaaia ni mafine se toalua i tafatafa o se taavale ma o le tasi o nei mafine lea sa a’afia i le faalavelave, ae o leisi na valaauina le ofisa a leoleo.

Sa faamatala e le tamaitai na valaauina leoleo, o lo o i totonu o le fale ia le alii faatupu faalavelave, le susuga Sepp Steffany, ae peitai, sa fiu leoleo e su’e lenei alii, ae ua le maua.

(E fia faamanino e le Samoa News, e ese Sepp Steffany le faipisinisi, ese le Sepp Steffany lea o lo o a’afia i lenei faalavelave).

Sa faamatala e le na a’afia i lenei faalavelave, fa’ato’a la manava mai galuega ma le toalua a lana tama tama (le tamaitai lea sa valaauina leoleo), sa ia vaaia ni palanikeke i luga o le fola o le latou fale, ma na ia fesiligia ai le ua molia po o le a le mea ua la’u mai ai i fafo mea mai lona potu, ae tali ita le alii, o lona potu.

Sa tago atu loa le na a’fia i lenei mataupu, o le tina matua a le alii ua molia, ma piki i luga ia palanikeke mai le fola o le fale, ae fa’ate’ia o ia, i le tu’i o ia, e le ua molia ma ia pa’u atu ai i lalo, ma tali mai le tatu’iina atu o ia e le ua molia.

Sa taumafai le toalua a le tama a le ua a’afia i lenei mataupu, e taofiofi mai le alii o Steffany, ae ua faasaga atu le alii o Steffany ia te ia, ma ina ua savali ese atu le ua molia i lenei mataupu, sa ia valaau mai o le a alu e su’e mai se naifi.

O le mea lea na o ese mai ai le tina matua ma le toalua a lana tama, mai totonu o le fale.  Na ta’ua e le tina matua, e le o se taimi muamua lea ua fasi ai o ia e le ua molia.

Na faapea ona faailoa atu e leoleo i le na a’afia ma le tamaitai sa valaauina leoleo, afai ae toe fo’i mai le ua molia, ia toe valaau atu latou.

Ma o le 5:50 i le afiafi lava lea, na toe maua ai e leoleo se valaau, o lea ua toe fo’i ifo le ua molia.  Ma na toe agai atu loa leoleo i Fagasa ma lokaina mai le alii o Steffany.

Ua molia nei lenei alii i faitauga e fa, e aofia ai le faatupu vevesi i nofoaga faitele ma le faaoolima.

E $1,000 ua faatulagaina e mafai ona toe tatalaina ai Steffany mai i le falepuipui.

FASI LE TINA A’O LO’O MOE I ONA TAFATAFA LANA PEPE

Sa o’o atu se tina i le ofisa a leoleo i Tafuna e faila sana tagi e faasaga i lona toalua, ona o moliaga i le faaoolima o lona toalua, ia te ia, a o moe lana pepe e valu masina le matua, i ona autafa.  Sa afaina foliga o le tina i manu’aga, faapea ona lima. 

Sa faamatala e lenei tina, sa vevesi ma lona toalua, ina ua tu’uaia o ia e lona to’alua i le faia o se la faigauo ma se tamaloa e la te galulue faatasi. 

Ma ina ua ma’ea le vevesi a lenei tina ma lona toalua, sa alu loa i le teu lana ato ma la o loa ma si ana pepe i le fale o lona tina i Nu’uuli.

Ae peitai, i le aoauli o le aso lava lea, a’o la momoe ma si ana pepe, sa faate’ia o ia ina ua tatu’i ona foliga e lona toalua, ma tago si’i atu le pepe ma la o ese ma le fale.

Na mafai ona maua e leoleo ia le ua molia i Pavaiai, lea na loka mai ai ma auina mai loa o ia i le ofisa a leoleo i Tafuna.

Sa faamatala e le ua molia, ua lelava i pepelo a lona toalua ma o lo o ia masalomia le faia o se uo a lona toalua ma e mafua ona masalosaloga ona o feau feavea’i le va o lona toalua ma le tamaloa lea.  Na faamatala foi e le ua molia, o le aso lava lea, o Setema 16, 2023, sa ia fesiligia ai lona toalua e tusa ai ma nei feau feavea’i le va o ia ma le tamaloa lea.  Ma o iina na la malilie ai o le a tete’a le la ulugalii ma o le mafuaaga lea na teu ai le ato a le fafine ma le la pepe, ma o i le fale o le tina a lona toalua.

Ae ina ua o ese atu le fafine ma lana pepe, sa ta’ua e le ua molia, lona vaaia o seisi foi feau mai i le tamaloa lea o lo o ia masalomia o fa’auo ma lona toalua, ma se faaupuga e faapea, “Ou te alofa ia te oe.”  Ma o le mafuaaga lea na alu ai loa i le fale o le tina a lona toalua ma faaoolima i lona toalua.

Ina o sauaina e le ua molia ia lona toalua, na tamo’e mai le tina o le fafine ma toso ese o ia.  Ma na tago atu loa le ua molia ma si’i mai le la pepe, ma alu ese loa ma le fale.

O lo o ua molia nei ia lenei alii i moliaga o le faatupu vevesi i nofoaga faitele, faaoo’olima i lona tulaga e tolu ma le tu’uina o se ‘alu’alutoto i se tulaga e ono afaina ai lona ola.

E $1,000 le tinoitupe faatulagaina e mafai ona tatala ai le ua molia, mai i le falepuipui.