TU LUA O PO MA AO

VAEGA 64

E faatalofa atu i le mamalu o le tatou aufaitau nusipepa i lenei taeao fou, taeao manuia, taeao toto’a.  Faamalo le onosa’i, faamalo le tauata’i.  Talitonu le faamoemoe o lo o faamalieina lau faitau i lenei auaunaga vaivai.  Ae ia se’e maia i ou se’etaga malu, o le toe vaega lenei o le tatou Fagogo.

******************************

Ua liliu atu le taitai leoleo ia Iosefa ma fesili atu iai, “O lau vaega la i totonu o lenei taupulepulega, o oe lea e fa’afeso’ota’ia ia nai loomatutua ma toeaiina pe a uma ona faatalanoa e le au tamaitai ia o Tina ma Rasela ia agaga o tagata maliliu o latou aiga?”

Ua leiloga se mea e minoi solo ai le alii o Iosefa.  Ae toe fesili atu le taitai leoleo, “E to’afia nit agata pei o Tina ma Rasela sa oulua fa’aaogaina e faia nei uiga taufa’avalea?”

Na tali Iosefa, “Ua e silafia lelei lau susuga i le malu o le malo, e le mafai ona ou ta’uina suafa o tagata e iai le tomai faapitoa faapea, i lalo o le tulafono.”  

“Ae ua ioe Iosefa o le a ia toe faafo’iina uma tupe a nai tama ma tina matutua sa ia gaoia, e le o le sa’o lea Iosefa?” o le oso atu lea a Tavita.

Na vaaia le emoemo o mata o Iosefa i le faamatalaga a Tavita ma ia taumafai e fai mai sana faamatalaga, ae na tasi lava lana vaai atu i foliga o le taitai leoleo, faapea atu loa, “E moni lava.”

Na aapa atu Tavita ua tu’u atu se tusi i luga o le laulau i luma o le taitai leoleo ma faapea atu, “O le tusi lea o le talaaga o le soifuaga (diary) a le alii lomitusi lea ua maliu.  Sa ou mauaina i totonu o lona fale ina ua taunuu atu leoleo ma fai a latou suesuega.  E foliga mai sa fiafia le alii lomitusi e fa’aaoga na o tamaitai i ana faiga taufa’avalea ma Iosefa.  Ma o lo o iai uma suafa o nei tamaitai i totonu o le tusi lea.”

“O lona toalua faaipoipo le tamaitai muamua lava sa taumafai lenei alii e fa’aaoga i ana faiga taufa’avalea ma le gaoi.  Ae sa ia fasiotia lona toalua faaipoipo i le po o le la faaipoipoga i totonu o le la potu moe.  Ma sa ia tusia uma i lalo ana gaioiga na faia i lena po,” o le tala lea a Tavita.

“Sa ia faaofuina lona toalua faaipoipo lea na ia fasiotia ma ave lona tino maliu ma lafoai i totonu o se paka lata mai i lo la fale.”

A o tilotilo se tasi o uso o le tina o Tepora i le ata o le alii lomitusi, sa ia faapea si ana tala, “E le o se alii aulelei po o se tagata amio tausa’afia foi, ae pe na faapefea ona ia faatosinaina loto o tamaitai uma ia sa fesoasoani i ana mea valea ia sa fai.”

Ua talie le vaega uma sa i totonu o le potu i le faamatalaga a le Aunty a Tepora.  Ae na tali mai Iosefa, “E leai seisi faatosina pito sili ona malosi nai lo le faatosina o le mea lea o le tupe.”

“Ioe, vaai i le malosi o le tupe lea o le a faafalepuipui ai le alii o Iosefa,” o le tali mai lea a Tavita ma ua atili ai ona leotele le talie a le vaega lea.  Ae ua vaaia foliga le fiafia o Iosefa.

“E tasi lava le mea na sasi ai Tina,” o le faaopoopo atu lea a Tepora.  “Ona ua manao e na o ia le fafine i le olaga o le alii lomitusi.  Ae ina ua na iloa o le a tiai o ia e le alii lomitusi mo Rasela.  Ma na iloa e Tina le ofu faaipoipo o le toalua muamua a le alii lomitusi ma sa tago gaoi.  O le po lava lea na ona fasiotia ai Rasela, sa ia tago ai i le faaofu ia Rasela i ofu faaipoipo a le toalua muamua a le alii lomitusi, ma teu Rasela e pei lava o le toalua muamua a le alii lomitusi.”

“Ae faafefea le uati lea sa taatia i autafa o Rasela?” o le fesili lea a le taitai leoleo.

“O le uati a Rasela sa faameaalofa atu iai e le alii lomitusi.  O le ita tele o Tina lea na tago ai tata’e le uati,” o le tali mai lea a Tavita. “O a’u lea na muamua ona ou taunuu i fale i le po na fasiotia ai e Tina ia Rasela ma sa va’aia mea uma ia na teu ai e Tina ia Rasela.  Ae ai na fai se tonu a le alii lomitusi ma Rasela i le po lena, ou te alu ese mai, ae atunuu atu o ia.  Ma ou te iloa, o ia na aveina le pine sa i le fatafata o Rasela.”

“Ma ou te iloa foi, na mateia lava e le alii lomitusi i le po lena le tagata na fasiotia ia Rasela.  Ma o ia foi na fasiotia Tina e taui ai le maliu o Rasela,” o le tala lea a Tavita.

“O lona uiga, ou te taunuu atu ua alu ese le alii lomitusi,” o le tala lea a Iosefa.

“E a? Sa e alu foi i le fale o Rasela i le po na maliu ai?” o le fesili mai lea a le taitai leoleo.

“Ioe, na ou faalogo ua taumafai le tamaitai e u’unai ese a’u mai le matou pa’aga ma le alii lomitusi.  Na ou alu iai e ma te talanoa,” o le tali mai lea a Iosefa.

“Ae na e alu ese ma e ave’esea se tusi mai totonu o le fale a Rasela, a ea?” o le fesili lea a Tavita.

Na faateia Iosefa i le fesili a Tavita .  “Ioe, ou te iloa, o oe lea e iai le tusi lea e ma te sailia ma Tepora.  Afai e te le ta’uina mai le mea o iai le tusi, o le a ou fai i le taitai leoleo e toe faaopoopo nisi tu’uaiga i ou moliaga lea ua iai nei.  O le a fai sina umi o e iai i le falepuipui.”

“O le a lea tusi?” o le fesili lea a le taitai leoleo.

“O le tusi o tala’aga o ma olaga,” o le tali mai lea a Tavita ma ia u’uina mai loa le lima o Tepora ma la o ese atu loa ma le ofisa a leoleo.

E FA’AMALO LE FAITAU.  IA TOE TULI TATAO MAI I LE VAIASO FOU I LE AMATAGA O LE TATOU FAGOGO FOU.