TU LUA O PO MA AO

VAEGA 61

E faatalofa atu i si o tatou aiga i lenei taeao fou.  Tatou te si’i faatasi le mua ma le viiga faafetai i le Tapaau i le Lagi ona o Lana pule faasoifua, o Lana pule to, ua mafai ai ona tatou aulia mai lenei taeao fou, taeao toto’a, i le soifua maua ma le lagi e mama.  E faafetai atu foi ia te outou o lo o lagolagoina lenei auaunaga i vaiaso taitasi.

Ae saga’i mai loa, o le a toe soso’oina le tatou tala i le alii o Tavita ma le tamaitai o Tepora ma le tau sailiga o le ‘diary’ faitatala lenei ua fasiotia ai nai mafine o Rasela ma Tina.

*************************

Na gata mai le tatou Fagogo i le vaiaso ua mavae i le taimi o lo o faapupu’u ai si teine o Tepora i totonu o le pusa tu i totonu o le fale a le alii lomitusi, ona ua fa’aona e le alii lea ia si teine ma loka i totonu o le potu moe ae alu i se fa’aaliga faataulaitu a le alii o Iosefa.

Ina ua fiu Tepora e saili se auala e sola mai ai i fafo, ae ua matuai tapunipuni uma e le alii lomitusi ia faamalama ma faitotoa o le potu, na oso loa Tepora i totonu o le pusa tu lea o lo o i tafatafa o le faitotoa ma lana fuafuaga, a savali mai le tagata i totonu, ona oso vave lava lea i fafo mai i le pusa tu ma tamo’e i fafo o le faitotoa.

Na fai sina leva ona faatu Tepora i totonu o le pusa tu ae leai lava seisi e sau i totonu o le potu.  Ae o le taimi lea ua toe fa’aali ai le oso pa a le alii o Tavita ma savali mai loa e saili se auala e ulufale mai ai i totonu o le fale a le alii lomitusi.

O le potu lea e loka ai Tepora, e i le fogafale lona lua o le fale a le alii lomitusi.  Ma na iloa lelei e Tavita le vaega tonu o le fale o lo o fuafua e agai atu iai.  Sa pei o se tamai apogaleveleve le tatope o vae a Tavita, ma lana pe’a i luga o le pa o le fale, ma oso i le polotito o le potu tonu lava lea e iai Tepora.

Na lagona mai e Tepora le matala atu o le potu moe, a o faamata ‘ivi mai i totonu o le pusa tu.

“Ua e sauni Tepora?” o le fesili lea a alii lomitusi, a o savali mai i totonu o le potu ma se moliga’o.  “Po o lena lava e te moe?  Talofa e, atonu ua malosi tele le vailaau na faamoe ai oe.  Po o lena e te faataga moe?”

E talatalanoa lava le alii lomitusi ma savali atu agai i le moega, lea na tago Tepora ua fatufatu ai aluga e faafoliga mai o lo o moe ai se tagata.

“Ou te le malamalama pe aisea ua e tu’u atu ai ia Tavita e faalata ia te oe, ua mafua ai ona e a’afia i lenei mataupu.  E te le manatu i tala a tagata e fai e uiga ia te oe ma Tavita?  Ua leai lava se eseesega o oe ma lo’u toalua o Sarai.  Ou te le tau faamatalaina atu ia te oe le mafatia o lo’u loto ma lo’u ita tele ina ua ou mauaina i le po o le ma faaipoipoga, e le o se tausala moni ia Sarai.  O le po lea na ou iloa ai ua maliu le alii sa la faauo muamua.  Ae na te le i ta’uina mai ia te a’u.  Ae o le aso o le ma faaipoipoga, sa ia ofuina ai se pine faamanatu i luga o lona ofu faaipoipo,” o faamatalaga a ia a le alii lomitusi ma toe fa’aauau ona savali atu agai i le moega.

“Oka so’u ita tele ina ua ou iloa mulimuli ifo o le mea na tupu ia Sarai.  Ou te iloa o se agaga leaga na uunaia a’u ou te tago e saisai lona ua i se sikafu ma titina…” Na faafuasei ona faamotu le faamatalaga a le alii lomitusi.  Ae ua toe faapea mai, “Sa ou lagona lava lo’u faanoanoa tele i la’u mea sa fai.  Ma na ou iloa, e tatau ona nanaina le tino o Sarai ina ia le iloa e seisi le mea na tupu.”

“Ae e le i tafa mai ata, sa ou faaofuina o ia i sona ofu lelei lava ma amoina o ia i leisi itu o le paka.  Sa ou aveina le pine faamanatu sa ia ofuina ma aveese le ata o lana manamea sa iai i totonu, ae tu’u iai le ata o Sarai,” e talanoa lava le alii lomitusi ma tilotilo i ona lima e pei o se tagata ua pulea e se agaga leaga.

Sa iloa mai e Tepora le aapa atu o le alii lomitusi i le aluga, ma fa’aauau lava ona talatalanoa toatasi. 

“Ae o oe lea sa ou faatali iai e te faafesootai ina ia Sarai i le lalolagi o agaga.  O lea ua ou mautinoa, a mafai ona e fesootai ma Sarai, o le a mafai ona ou faamalamalama atu ia te ia le mea na tupu i le po o le ma faaipoipoga, ma talosagaina o ia e faamagalo mai a’u ma tu’u loa a’u se’i o’u maua se toafilemu.”

E uma tonu lava le faaupuga lea a le alii lomi tusi ae tago loa toso ese le aluga mai luga o le moega.

E FAIA PEA!