TALA I VAIFANUA

Pago Pago - AMERIKA SAMOA

IUGAFONO AUFAATASI A LE SENATE E ALOAIA AI LE TAUTUA A LE AFIOGA SENATOA LAUIFI NUNU PAOPAO TAUILIILI

Na pasia e afioga Senate o le Maota o le Senate i le aso Gafua na sei mavae atu nei, ia se Iugafono Aufaatasi a le Senate, e momoli atu ai alofaaga ma faamaisega i le faletua ia Lise Ane Tauiliili faapea le aiga, ona o le tu’umalo a le afioga i le Senatoa Lauifi Nunu Paopao Tauiliili.

O lenei iugafono sa faaulufaleina e afioga Senatoa Ma’o Fa’auma Gogo ma Malaepule Saite Moliga, ma o lo o ta’ua ai e faapea, na soifua mai le afioga Senatoa Tauiliili Lauifi Paopao Tauiliili ia Oketopa 27, 1944 ia Tauiliili Lauifi Nunu Paopao o Fitiuta, Manu’a ma Vaipunalagilealofisau’otuimanu’a Tuifea Namulauti o Ta’u, Manu’a.

Sa amata mai ana aoaoga i le aoga Papatea ma faau’u mai i le aoga maualuga a Samoana.

O le amataga o le 1960 sa galue ai Tauiliili i totonu o le malo o Amerika Samoa i le polokalama a Faiaoga sa faasalalau i luga o televise.  Sa avea o ia ma faiaoga Tusiata.

I le 1969 sa ulufale ai o ia i totonu o le militeri a Amerika, i le vaega o Fuava’a (Navy) ma i le masina o Novema o lea lava tausaga, sa auai ai o ia i le taua i Vietnam.  E 23 tausaga na tautua ai le afioga Tauiliili i le malo tele ma sa tele ni ana faailoga na ausia i lana tautua matavela.

O le 1991 na litaea ai Tauiliili mai i le Navy ma toe foi ai i lana galuega faafaiaoga.  Sa auai o ia i le Kolisi a Fresno, lea sa ia ausia ai le faailoga o le AA i mataupu faaofisa (Business Administration).  Ae o le Iunivesite a Fresno sa ia ausia ai lona faailoga maualuga atu i galuega faaofisa.

Na galue o ia o se Suetusi i totonu o le IRS faapea foi ma Faatonusili i le kamupani a le Goodwill.  I le 1997 na ia toe taliu mai ai i Amerika Samoa ma amata ai lana tautua i totonu o ofisa ma vaega eseese o le teritori.

Sa le gata i lana tautua i totonu o nu’u ma afioaga, ae sa faapea foi ona avea Tauiliili ma totino o le Komiti Faafoe a le Kolisi Tu’ufaatasi a Amerika Samoa faapea le Humanities Council.

Sa avea foi o ia ma peresetene o le Asosi a Fitafita Tuai a Amerika Samoa faapea le Asosi o le Navy a Amerika Samoa.  Sa tautua foi o ia i totonu o le faalapotopotoga o le Disaster Planning a le teritori, ma avea ma sui mo le mamalu lautele i totonu o le matagaluega a le DHSS.

O le 2008 na paleina ai o ia i le suafa Tauiliili mai i Fitiuta, Manu’a.  O le afioga Tauiliili o se tagata e alofa tele i lona aiga ma sa fa’aaluina lona soifua atoa i le tautuaina o lona aiga, nu’u ma itumalo.

I le nofoaiga lona 37 ma le 38 na filifilia ai le afioga Tauiliili e lona afioaga e avea ma o latou sui i totonu o le Maota o le Senate.  Na filifilia foi o ia e le Peresetene o le Senate e avea ma Taitaifono o le komiti o Paka ma malae ta’alo, faapea ai ma le avea o ia ma totino o le komiti o Mataupu tau Samoa,  komiti Faasao o Gataifale ma le Vaomatua, faapea ma le komiti o Fefaatauaiga.

I lana tautua faalelotu sa avea o ia ma Tiakono i totonu o le Ekalesia Faapotopotoga Kerisiano a Amerika Samoa (EFKAS) i Fitiuta ma Iliili. 

Na faaipoipo atu o ia ia Lise Ane Mase Lealaimatafao mai i le afioaga o Iliili.  E toatolu si a la fanau ma fanau a la fanau e to’afitu.

Na maliu filemu le afioga Tauiliili ia Iulai 9, 2023 i le maota gasegase a le Tripler i Honolulu, Hawaii, i le 78 tausaga o lona soifua.  Ma o ia o le lona o totino o le maota o Senate ua tu’umalo i lenei tausaga.  

Ua saunia nei sui o le Fono Faitulafono mo le tauaaoina atu o le latou Iugafono Aufaatasi i le faletua ia Lise Ane, i toe sauniga o le afioga i le Senatoa lea ua fuafua e faataunuuina i le Fale Laumei i Utulei.

TAUNUU MAI TAUSI MA’I MAI THAILAND

O le aso Gafua na sei mavae atu nei, na taunuu mai ai mai le malo o Thailand ia ni tausimai se toatolu, ae o lo o faatalia leisi toatolu e taunuu mai i le Aso Gafua o le vaiaso fou, ma le toatolu mulimuli e taunuu mai i le Aso Faraile, Setema 1.

E to’a 32 atoa le faitau aofai o tausimai mai Thailand o lo o fuafua e galulue i le LBJ.  E ese mai i tausimai mai Filipaina lea o lo o faatali e kilia mai e le Ofisa o Femalagaiga.

Na saunoa le Faatonusili o le LBJ, le alii fomai ia Dr. Akapusi Ledua, e 16 isi tausimai ua maea ona faatalanoaina.  

Na ta’ua e Dr. Ledua le toatele o tusi apalai ua o latou maua mai i tausimai mai fafo o lo o fia galulue i le falemai i Faga’alu, ma o lo o iai le faamoemoe e o’o atu i le faaiuga o Oketopa, ua iai se faaopoopoga i tausimai i le falemai.  Ae o lo o iai foi se faamoemoega e o’o atu i le faaiuga o le tausaga ua atoa le to’a 50 o tausimai a le LBJ.

Na saunoa Dr. Ledua, o se fofo lata mai lea o lo o latou galulue ai, ae o le fofo tumau o lo o latou tausinio iai, o le siitia lea o tulaga o aoaoga mo tausimai i totonu o le teritori.  

TUUA E DR. GEBHARD MA LE FALETUA IA LE TERITORI

O le aso faraile ua mavae na faia ai se aiga faamavae mo le alii fomai mai Amerika, le susuga Dr. James Gebhard ma le faletua ia Helen.

O Dr. Gebhard ma le faletua o ni fomai mai i le Ekalesia a Iesu Keriso o le Au Paia o Aso e Gata Ai ma ua lata i le lua tausaga talu ona o la malaga mai i Amerika Samoa, mai i Colorado, mo le la misiona.  O le la tomai faapitoa faafomai e i ponaivi (M.D. Orthopedic & Spinal Surgeon).

Sa ta’ua e Dr. Gebhard, o se tasi o faafitauli na feagai ma le la galuega, o le utiuti o risosi i totonu o Amerika Samoa e faatino ai le la galuega, ae toatele le mamalu o le atunu’u o lo o manaomia le fesoasoani.  Ae i le 17 masina na o la galulue ai i le falemai i Faga’alu, na mafai ona o la aumaia le tele o masini ma risosi eseese  e fesoasoani i le la galuega ma o nei risosi uma, o le a mafai ona fa’aauauina ona fa’aaoga e le falemai.

Sa tele ni taotoga sa mafai ona faatinoina e le alii fomai ia Dr. Gebhard ma sa ia fa’aalia lona agaga fiafia ma le faafetai mo le avanoa ua o la maua ma lona faletua, e fesoasoani ma tautuaina ai tagata o Amerika Samoa.

O le afioga i le Lutena Kovana, ia Talauega E. V. Ale, na avea ma sui o Amerika Samoa, e momoli atu ai se faafetai ia Dr. Gebhard ma le faletua ona o le la auaunaga le totogia ua mafai ona faamanuiaina ai tagata o le atunu’u.