TU LUA O PO MA AO

VAEGA 60

E faatalofa atu i le mamalu o le tatou aufaitau nusipepa i lenei taeao fou, taeao manuia, taeao toto’a.  Faamalo le onosa’i, faamalo le tauata’i.  Talitonu le faamoemoe o lo o faamalieina lau faitau i lenei auaunaga vaivai.  Ae ia se’e maia i ou se’etaga malu, se’i toe soso’o atu le tatou Fagogo.

*****************************

Ua nofonofo le tamaitai o Tepora i luga o le moega ma faasolo ona mafaufauga i se auala e mafai ai ona ia sola ese mai i le fale o le alii lomitusi lea ua loka ai nei o ia.

Ae o le taimi lea ua agai atu ai Tavita i le fale o Iosefa ma toso mai i fafo Iosefa ma fai atu iai, e manaomia na la o e faasao mai Tepora.  

O le afiafi lea, o lo o fuafua e faia ai se fa’aaliga a le alii o Iosefa, e pei lava o fa’aliga lea sa masani ona fai e Rasela ma Tina ae le i maliliu.  O a la fa’aliga lea e fai mai e talatalanoa ai ma agaga o tagata ua maliliu, ae o le mea moni, o la e gaoi tupe a tagata.

Ua faapea atu nei Tavita ia Iosefa, “Ia aua ne’i alu ese le alii lomitusi mai i lau fa’aaliga.  Taofi ai iina ae se i o’u alu e su’e mai Tepora mai lona fale.”

Ae tali mai Iosefa, “Ae faapefea pe a le fia nofo umi le alii lomitusi i la’u fa’aaliga?”

“O le mea na e tatau ona faama’ai ai lou fai’ai, aua a tupu se faalavelave ia Tepora, ua le I’u lelei foi ma lau fa’aaliga,” o le tala lea a Tavita.

Ua savali atu nei Iosefa i le fale lea o le a faia ai lana fa’aaliga ma valaau mai ia Tavita, “Ia manuia au taumafaiga.”

Ua agai sa’o atu Tavita i le fale o le alii lomitusi ma tau mafaufau po o fea se vaipanoa o le fale o lo o lokaina ai e le alii lomitusi ia Tepora, aua ua le toe iai se masalosalo ia Tavita, i le mea o iai Tepora.

A’o savali atu Tavita i le fale o le alii lomitusi, sa ia tau mafaufau pe aisea lava ua ia lokaina ai ia Tepora.  

E fetaui lava le taunuu atu o Tavita i le tulimanu o le auala e tau atu i le fale o le alii lomitusi, ae ia vaaia loa le agai mai i fafo o le alii lomitusi ma oso i se taavale ma agai atu ai loa i le fale lea o le a faia ai le faaaliga a Iosefa.

Ua tu Tavita ma faasolo lana vaai agai i luga o le fogafale e tolu o le fale a le alii lomitusi.  Ma na pei o le vave o le emo o le mata, le oso o Tavita i luga o le pa lea o lo o siomia ai le fale a le alii lomitusi, ma savali faatopetope atu ai i le fale, ina ne’i iloa mai o ia e seisi.

Ia tatou liliu atu i le tamaitai o Tepora lea o lo o i totonu o le fale, pe ua maua se mea e mafai ona sola mai ai i fafo ma le potu lea o lo o loka ai.

Ua savali atu nei Tepora i se pusa tu e i tafatafa tonu lava o le faitotoa o le potu, ma ua oso i totonu ma taumafai e lafi ai.  Ua mafaufau Tepora, e mafai lava ona vave ana taga, pe afai ae toe foi mai le lomitusi i totonu o le potu.  E na o le oso mai lava i fao mai i le pusa tu ma uunai i lalo le alii lomitusi ma sola ese atu ai loa i le faitotoa.

Ua fai sina umi o lafi Tepora i totonu o le pusa tu.  Ua le minoi.  Ua le manava Tepora ina ua faalogo atu ua pa’o mai le u’amea o le faitotoa.  Ua na o le manavanava o Tepora ma faapea ifo, “Aua e te fefe, aua e te palaai.”

E FAIA PEA!