‘Iu ma le manuia fonotaga a Kovana Lemanu i Hawaii

Pago Pago - AMERIKA SAMOA

Ua fa’amae’a e le afioga i le kovana ia Lemanu P. S. Mauga ma le faletua ia Ella Mauga ni fonotaga fa’amanuiaina i Hawaii, e fa’atatau i le fa’amalosia atili o faiga-pa’aga ma maua ai le lagolago mo le atina’eina o Amerika Samoa i vaega taua eseese.

TA’ITA’I VAEGA MILITERI

I se pepa o fa’amatalaga mai le Ofisa o le Kovana, o lo’o fa’ailoa ai e fa’apea, o le aso 10 o Aukuso, na feiloa’i ai le afioga i le kovana ia Lemanu ma le Ta’ita’i o le vaega militeri o le 9th Mission Support Command (MSC) ia Brigadier General Mark W. Seikman i Fort Shafter, Honolulu, Hawaii. 

Na taula'i le talanoaga i vaega taua o le lagolago mo Amerika Samoa, e aofia ai fesoasoani fa'apitoa ma taumafaiga fa'atasi e foia ai fa'afitauli tetele o lo'o feagai ma le teritori. Na faaalia e Seikman lona naunautaiga e fesoasoani ia Amerika Samoa ma tuuina atu le faamautinoaga o le a tuuina atu e le MSC lona 9 lana lagolago e foia ai popolega ua faailoa mai.

Na taua e Kovana Lemanu lona agaga fa’afetai e tusa ai o le lagolagosua a le MSC lona 9, ma fa’amamafa ai le taua o le latou galulue fa’atasi i le fa’aleleia o le soifua manuia o tagata lautele o Amerika Samoa. 

“Ua fa’afetaia i matou i le ta’utinoga na fa’aalia e le susuga ia Brigadier General Seikman ma lana vaega, o lenei faiga-pa’aga e mautinoa lava e iai se aafiaga lelei i a tatou sini fa’atasi,” o le saunoaga lea a Lemanu.

I se fefa’ataua’iga mafanafana, sa tufa ai meaalofa i le va o Kovana Lemanu ma Seikman, e fa’ailoa ai le malosi o le so’otaga i le va o le malo o Amerika Samoa ma le ta’ita’i o le militeri.

IUNIVESITE O HAWAII

E le gata i lea, na asia e le afioga i le kovana ia Lemanu e le Peresetene o le Iunivesite o Hawaii David Lassner ma le mamalu o faiaoga ma le aufaigaluega i le Ofisa o le Malo o Amerika Samoa i Hawaii. Na taulaʻi atu talanoaga i fuafuaga o le lumanaʻi i le oganuu.

O se tasi o ia talanoaga o le faatuina lea o le polokalame o le UH Cohorts mo fanau aoga Amerika Samoa, ma le taulai i le faalauteleina o avanoa tau aoaoga i tua atu o aoaoga o le Education Degree (Tikeri tau aoaoga) e ono aofia ai ma isi matata eseese. 

O lenei taumafaiga e fa'amoemoe e maua ai avanoa sili atu mo tamaiti a'oga Amerika Samoa e tulituliloa a'oa'oga maualuluga ma saofagā i le tuputupu a'e o lo latou nu'u.

Na fa’aalia e Lemanu lona agaga fa’afetai i le Peresetene ia Lassner ma lana vaega, ona o lo latou fa’amaoni i le fa’aleleia o avanoa tau a’oa’oga mo Amerika Samoa. 

“E fa’afetaia le naunauta’iga a le Iunivesite o Hawaii i fanau aoga, o le galulue fa’atasi lea o le a mafai ai ona maua se lumana’i manuia mo mafaufau talavou, aemaise lava i latou e le mafai ona tu’ua aiga e fa’aauau a latou a’oa’oga”, o le saunoaga lea a Kovana Lemanu.

O le tele o fonotaga a le kovana i Hawaii ua iloga ai se la'asaga taua i luma i le fausia o faiga-pa'aga e a'afia lelei ai le atina'eina o Amerika Samoa i vaega eseese. O taumafaiga a le afioga i le ali’i kovana ia Lemanu e fa’amalosia so’otaga ma kamupani mai fafo, o lo o fa’amautu ai lona naunauta’i i le fa’aleleia atili o le teritori ma ona tagata. 

O le aso 14 o Aukuso sa toe taliu mai ai le kovana o Amerika Samoa.