TU LUA O PO MA AO

VAEGA 58

E faatalofa atu i le mamalu o le tatou aufaitau nusipepa i lenei taeao fou, taeao manuia, taeao toto’a.  Faamalo le onosa’i, faamalo le tauata’i.  Talitonu le faamoemoe o lo o faamalieina lau faitau i lenei auaunaga vaivai.  Ae ia se’e maia i ou se’etaga malu, se’i toe soso’o atu le tatou Fagogo.

*****************************

Na gata le tatou Fagogo i le aso ananafi, i le taimi o lo o su’esu’e ai e Tavita ia le alii o Iosefa, i totonu o lona fale, e uiga i le tusi po o le ‘diary’ lea na maua e Tavita i lalo o le moega a Iosefa.

Na toe fesili atu Tavita ia Iosefa po o fea le mea na ia maua mai ai le tusi lenei, ae na uma lelei ona laga e Tavita le fale o Rasela i le po na maliu ai, e na te le i mauaina ai le tusi.

“E le iloa e tagata, ae sa mafana le ma mafutaga ma Rasela, a o soifua o ia,” o le tali mai lea a Iosefa.  “Sa faaali mai uma lava e Rasela ia vaega uma o lona fale ma o iina na ou mauaina ai le tusi, i tua o se tasi o puipui o le fale, e mafai ona tatalaina.”

Ua ataata le alii o Tavita i le faamatalaga a Iosefa ma ia faapea atu, “Ua lelei tele lau vaai.  Na misi ia te au le puipui lena o le fale i le taimi na ou sueina ai le fale o Rasela.  Ae na faapefea ona e iloa, o la sa iai le tusi i tua o le puipui o le fale?”

“Sa ta’u mai e Rasela ia te a’u ma sa faamatala mai foil ana mea o le a fai i le tusi, o le fa’aaoga lea e faamalosi ai tagata o lo o tusia o latou igoa i totonu, ina ia maua ai ana tupe,” o le tali lea a Iosefa.

“Ae afai la na e mauaina le tusi, aisea na e le fa’aaogaina ai e pei o le mea lea na manao Rasela e fa’aaoga ai?” o le fesili lea a Tavita.

“Ina ua uma ona ou faitauina le tusi ma talaga o soifuaga o tagata na tusia i totonu, sa leai so’u mana’o e fai le mea lea na fai mai ai Rasela.  E le o a’u se vale.  O tagata ia o lo o tusia igoa i totonu o lena tusi, e vave ona ou oti ai pe a ou taumafai e faafefe latou.  Seia vagana ai oe ma Tepora, ona ua ou fiu lava e taumafai e taofi lua suesuega,” o le tali lea a Iosefa.

“Sa e taumafai e taofi ma’ua mai i le maua o le tusi?” o le fesili lea a Tavita.

“Leai, sa ou taumafai e taofi oulua, ina ne i te’i ua lua iloa la’u mea lea e fai i tama ma tina matutua o le nu’u,” o le tali mai lea a Iosefa ma lona ita tele.

Ua ata Tavita ma faapea atu, “E le o ma’ua o nit agata e faafefe gofie.  O lea la ua ou malamalama i le mafuaaga na e gaoia ai le tusi.  Ae aisea na e gaoia ai le pine ma le veli lea sa i luga o le tino maliu o Rasela?”

Na te’i Iosefa i le fesili a Tavita.  “O le a le pine ma le veli?  Ou te le iloa po o le a lena mea e te fesili mai ai.”

“O le veli lea sa ufiufi ai foliga o Rasela ma le pine lea sa pipi’i i lona ofu, i luga o lona fatafata.  Lea na iai le ata o se tamaitai talavou o lo o ofu sona ofu talaloa paepae ma se veli?” o le faamanino atu lea a Tavita.

“E moni lau faamatalaga?” o le fesili mai lea a Iosefa ma ona foliga ua sesega pei ua vaai i se aitu.

“Ioe, o le veli ma le pine sa pipi’i I le ofu o Rasela ina ua ou mauaina lona tino maliu i le po na maliu ai.  Ou te le iloa po o fea na aumai ai e Rasela le pine ma le veli,” o le tala lea a Tavita.

“O a’u lea fa’ato’a o’u sau mai i le fale o le alii lomitusi ma sa ou vaai ai i le ata o le tamaitai lena e te faamatala mai, o lo o tautau i totonu o lona ofisa,” o le tala lea a Iosefa.

“O le a le uiga o lau faamatalaga?” o le toe fesili atu lea a Tavita.

Ae ua fiu lava Tavita e fesili atu ia Iosefa, ae ua na o le sioa o Iosefa ma memumemu ona gutu.  Na soso atu Tavita e tau faalogo po o le a le tala lea o lo o fai mai ai Iosefa, ae na o le pau lava le upu sa ia lagonaina, o le igoa o TEPORA lea e ta’u mai e Iosefa.

E FAIA PEA!