Faataunuu iloiloga a Faipule i le mafuaaga o le sosola so’o o pagota

Pago Pago - AMERIKA SAMOA

O le aso lona fa o tauaofiaga a le Maota o Sui, na feagai ai afioga Faipule o le Komiti o le Puipuiga Lautele ma se iloiloga, lea na auai atu iai taitai o le falepuipui I Tafuna (TCF), aua atugaluga a afioga i Faipule i le mafuaaga o le toatele o pagota e sosola mai i le falepuipui, ma le tulaga ua o’o iai le pa o le fale puipui lea e tu’uaia e le toatele, o le mafuaaga e faigofie ai ona sosola mai i tua ia pagota.

O le susuga i le pule o le TCF, le afioga Papali’i Marion Fitisemanu, faapea le Faatonusili o le ofisa o lo o mataituina falepuipui a le malo, le susuga Tauanu’u Semu Faisiota Taunu’u atoa ai ma le Faatonusili o le Galuega Lautele ia Faleosina Voigt, na auai i lenei iloiloga.

Sa amataina le iloiloga i le faaleoina e le afioga i le Faipule ia Fetu Fetui Jr. ia le pagota na sola lata mai nei lava, le alii o Joeita Fa’aliga, atoa ai ma le a’afia o le saogalemu o soifua a tagata o le atunu’u.  Ina ua mae’a ona fa’aalia le toatamai o le afioga i le Faipule, sa ia fesiligia Fitisemanu ma Tauanuu pe aisea ua mafua ai ona mafai e lenei pagota ona sola ese so’o mai, mai i le falepuipui.

 Na saunoa Tauanu’u, o lo o ia iloa o lo o faatatau le saunoaga a le Faipule ia Joeta Fa’aliga ma sa ta’ua e Tauanu’u, o lea pagota, ua fai ma ia le masani a oso lona fia ‘ai, pe ua le lava mea’ai, ona sola ese mai lea mai i le falepuipui. 

Sa ta’ua foi e Tauanu’u, i a latou suesuega sa faia i totonu o le sela (cell) a Fa’aliga, na maua ai ni ‘rebars’ lea sa fa’aaoga e lenei pagota, e tatala ai loka o le falepuipui ma sola mai ai i fafo.  Ma sa ta’ua e Tauanu’u, ua la fiu ma le susuga Papali’i e sui loka o le falepuipui, pe faatau loka fou, ae e mafai lava e lenei pagota ona tatala ma sola mai ai i fafo.

Na saunoa foi Tauanuu, o lo o iai foi nisi o le atunu’u o lo o fesoasoani i lenei pagota, i ana solaaga, lea foi na maua i leisi taimi o fai sana faatauga pia.

Na tali mai le afioga i le Faipule ia Fetui i le faamalamalamaga a Tauanua, o latou vaitaimi, a fai se mea faapea a le pagota, e iai ni faasalaga e fai i le pagota.  Na fesili Fetui po o iai ni filifili lea e loka ai vae, o fa’aaoga e loka ai pagota ua sola so’o mai i le falepuipui.

Sa tali le susuga Fitisemanu, o lo o iai filifili e loka ai vae o pagota, ae fa’ato’a fa’aaoga pe a aveina atu pagota i fale o faamasinoga i aso taitai, ma e le lava nei filifili.  Ae na ta’ua foi e Fuimaono, e latou te le fa’aaogaina filifili o vae pe afai ua i totonu o sela ia pagota.

Sa ta’ua foi e Fitisemanu, o se tasi o faafitauli o lo o tulai mai e mafua ona faafaigata ona taofiofi pagota i totonu o falepuipui, ona e 326 pagota o lo o lokaina nei i totonu o le falepuipui, ae na o le 12 leoleo o lo o galulue i le sifi e tasi.

Na saunoa Fitisemanu, e iai po e le mafai ona galulue ai nisi o leoleo ona o faalavelave faafuasei faaleaiga ia po o gasegase, ma a tupu tulaga faapea, o nisi taimi e na o le to’atolu pe to’afa leoleo i le sifi e tasi.

Na ta’ua foi e Fitisemanu, e to’a 202 pagota o lo o faatalitali nei faaiuga o a latou faamasinoga ma a faatusatusa lea fuainumera i le fuainumera o leoleo o lo o tiute i le falepuipui, e le talafeagai.  Afai la e na o le toatasi le leoleo o lo o tiute i le mea o iai pagota o lo o faatalitali faaiuga o a latou faamaisnoga, ae manaomia ona aumai i fafo lea pagota ma toe faafoi atu i totonu o lona sela, e faafaigata i le leoleo lea e tasi ona vaaia uma pagota.

E le gata i lea, sa ta’ua foi e Fitisemanu, o isi o leoleo o tamaitai, o latou ia e gafa ma falepuipui o taofia ai tamaitai ma tina, e atili ai ona laititi le fuainumera o leoleo e sifi i falepuipui o iai alii.  Sa fa’aauau le faamatalaga a Papalii, e na o le toatasi lava le leoleo e mafai ona faataunuuina le faitauina o le fuainumera o pagota i aso taitasi.  Afai la o iai nisi tiute e manaomia ona faataunuu e le toatasi lea, o se avanoa lea e potopoto ai pagota ma taupulepule auala e latou te sosola ese ai mai le falepuipui.

Na fesiligia e Fetui ia le Faatonusili o le DPW pe ua o’o atu se talosaga mai i le Ofisa o Falepuipui mo le toe faaleleia atili o le pa o le falepuipui.  Na tali Voigt, ua maea ona faaooina atu le latou paketi i le ARPA, ma o le a fa’aaogaina lea e fausia ai le pa ma le totogiina o leoleo o le falepuipui, ma o le taimi nei, o lo o latou faatalitali mo se tali mai i le ARPA.

Na fa’aalia e le afioga i le Faipule ia Sauasetoa le tele o le a’afiaga o itumalo a le Ituau faapea le Tualauta ona o le sosola so’o o pagota, e aofia ai le osofaia e nei pagota ma gaoia fale ma ofisa.  Sa tapaina e Sauasetoa se fa’aamaoniga o lo o maua e pagota ni fesoasoani mai i le mamalu lautele, e sosola ai mai i le falepuipui.

Na saunoa Tauanu’u, ua o latou maua ni ripoti ma ua faataunuuina foi ni a latou suesuega, o lo o faamautu ai le iai o ni taavale e masani ona paka i fafo o le pa, e latou te masalomia o lo o maua ai e pagota se fesoasoani ae le gata i lea, o le aveina nana atu i totonu o telefoni feaveai ma meaai mo pagota.

Na ta’ua foi e Tauanuu, ua maea ona faatutuina ni mea pu’eata i totonu o le falepuipui ma le nofoaga lea e fai ai asiasiga a aiga, e taumafai e fesoasoani e saili po o ai o lo o fesoasoani i pagota e sosola.

Na fesili Sauasetoa pe le i maua se faamaoniga o nei tagata o lo o fesoaosani i pagota, sa tali Tauanua, e latou te le i mafai ona faamaonia pe lokaina foi i latou ia.  Ma o lea na talosagaina ai e Sauasetoa le susuga Tauanuu mo le sailia o se auala e fofoina ai lea mataupu.

Na saunoa Tauanu’u, na talu mai lava le masina o Oketopa, o faia ni gaioiga faalilolilo a lana aufaigaluega ma o lo o fesoasoani mai iai foi nisi leoleo, mo le mataituina o taavale ma i latou ia o lo fesoasoani i pagota ma aveina atu faanana mea o lo o faasaina, i totonu i pagota. 

Na ta’ua foi e Tauanuu, ua faalua ona faia ni a latou suesuega ma le Ofisa o Galuega Lautele, i le pito i tua o le pa o le falepuipui, ia Tesema 8, 2022 ma i se imeli na maua i le vaiaso ua tuanai, na faamaonia ai le tauaaoina e loia a le ARPA ia la latou talosaga mo se paketi e $40,000 e mafai ona fesoasoani e toe faaleleia ai lea vaega o le pa, faatasi ai ma le tosoina o ni pa uaea maai.

(O lea faaleleiga, o le a aofia ai foi ma le toe faaumi teisi o le pa, lea o lo o lipotia mai, e fai sina maualalo ma e faigofie ai ona feosofi ai i luga pagota, ma sosola ese ai.)