TU LUA O PO MA AO

VAEGA 52

E faatalofa atu i le mamalu o le tatou aufaitau nusipepa i lenei taeao fou, taeao manuia, taeao toto’a.  Faamalo le onosa’i, faamalo le tauata’i.  Talitonu le faamoemoe o lo o faamalieina lau faitau i lenei auaunaga vaivai.  Ae ia se’e maia i ou se’etaga malu, se’i toe soso’o atu le tatou Fagogo.

*****************************

“E mafai ona e ta’u mai le mea tonu lava na e vaaia, ina ua e usu atu i le taeao na maliu ai Tina?” o le toe fesili atu lea a Tavita ia Mafa.

“Na ou manatua le tele o le toto i le mea na taoto ai Tina.  Ma e foliga ma o le manu’a i lona ulu na maliu ai.  O lo o taoto Tina faasaga i luga.  O se uati e teu i totonu o le taga o le ofu o se tagata, na taatia i luga o le foloa o le fale, i ona tafatafa ma le mesi o totonu o le fale.  Na ou manatua le oso o lo’u manatu e faapea, e tutusa lelei ma le faamatalaga i totonu o le nusipepa, i le maliu o Rasela.  Ae na ou toe manatu i le uiga ese o lea tulaga, ona o lea ou te iloa, o Tina na fasiotia Rasela, ae le o le uo tama a Tina.  O le mea lea na ou le malamalama ai pe aisea, pe afai o le uo tama a Tina na fasiotia Rasela, sa ia taumafai ai e faatulaga le fale ma le tino o Tina, e pei o le maliu o Rasela,” o le faamatalaga lea a Mafa.

“Na iai seisi mea na e vaaia o taatia i tafatafa o le tino o Tina, sa ese i lau vaai?” o le fesili atu lea a Tavita ia Mafa.  “Po o se mama po o se veili faaipoipo?”

Na fai sina umi o tau mafaufau ia Mafa, ona faapea mai lea, “E leai.  E leai se mea faapea na ou vaai iai.”

“O la’u fesili mulimuli lava Mafa,” o le tala lea a Tavita.  “O oe lea na aveina atu le feau ia te a’u ma Tepora, e ma te o mai i le fale o Tina, i le taeao lea maliu ai Tina?”

“E leai.  E le i iai so’u taimi e aveina atu ai na feau, o la na ou pisi e saili se mea ou te sola e lafi ai,” o le tali mai lea a Mafa.

“Ia ua lelei Mafa.  Faafetai lava i lau fesoaoani.  Ae sau e alu e saili lelei seisi nofoaga e te faamautu ai, seia mae’a lelei le ma suesuega i lenei mataupu,” o le tala lea a Tavita ma tulai lava i luga ma taitai ese atu Tepora mai i le fale a Mafa.

Sa le’i gagana le toalua lea i totonu o le taavale, seia o’o lava ina taunuu i le fale o Tavita.  Sa tofu lava le tagata ma ona manatu ma ona mafaufauga ma sa fai sina umi o la nonofo ai lava faapena.

“Afai e moni faamatalaga a Mafa, o lona uiga e mo’i, o Tina na fasiotia ia Rasela ona o lona ita i le faigauo a Rasela ma lana uo tama,” o le tala lea a Tepora.

“Ioe, afai e sa’o le tala a Mafa, o lona uiga o Tina na faamauluina le veli a Rasela, tu’u ma le uati i lona fatafata ma le pine lea na maua i luga o Rasela.  Ae o le fesili la…Aisea?” o le tali mai lea a Tavita.

“Atonu e iai se uiga o na mea uma na maua i le tino maliu o Rasela,” o le tala lea a Tepora.  “Ae o ai la sa tago i le ave’ese ae e le i o’o atu leoleo?”

“O le uo tama a Tina?” o le fesili lea a Tavita.  “Ou te masalo, na alu atu le uo tama a Tina i le fale a Rasela ae ua ou alu ese i le po lena, ma ia vaaia ai mea uma na ou vaai ai, i luga o Rasela.  Ae na ia tago ave ina ne’i suesue e leoleo ma maua ai o ia.”

“Ua leva le po, e le toe iai se mea e mafai ona fai i le taimi nei.  E lelei le fai o se ta malologa, atonu e toe maua ni mafaufauga fou a taeao,” o le tali atu lea a Tepora.

E FAIA PEA!