Talosagaina kovana aloaia fautuaga e fa’afou ma fa’aleleia le falema’i o le LBJ

Pago Pago - AMERIKA SAMOA

O le vaiaso ua te’a sa fa’auluina ai se iugafono a le Maota Maualuga e fautuaina ai le Kovana ia Lemanu P. S. Mauga ma le malo o Amerika Samoa ina ia mulimulitai i fautuaga a fomai faalotoifale atamamai ma faasoa atoa le $300 miliona tupe mai le fetarale i lalo o le polokalame a le ARPA e fa’aleleia le falema’i o le LBJ, e pei o fautuaga a Inisinia a le Ami a le Iunaite Setete (USACE), ae aua le fausia se falema’i fou. 

O le lipoti a le USACE i le tausaga e 2019 o lo’o otooto mai ai a latou fa’aiuga i le ma’ea ai o a latou suesuega i le tulaga o le LBJ:

• Toe faaleleia fausaga o le fale o loo iai nei e aunoa ma se faaopoopoga i le tau e tusa ma le $161.4 miliona;

• Le fausiaina o le falemai fou e tele fogafale i le lotoa o le falemai LBJ o loo i ai nei e (150,000 sikuea futu) i le tau e tusa ma le $375 i le $425 miliona;

• Le fausiaina o le falemai fou e tele fogafale i le (370,000 sikuea  futu) i le nofoaga ua fautuaina i le itu i sisifo o le motu, i le tau e tusa ma le $700 miliona poo le faaluaina foi.

Ae pei ona lipotia e le Samoa News talu mai le amataga o lenei tausaga ua fa’alauiloa e le kovana sili, ana fuafuaga e fa’aaogaina lenei vaega tupe $300 mai le fetarale e fauasia ai se falema’i fou i Tafuna ae o se komiti fa’apitoa a le malo sa latou tuuina atu fautuaga i le kovana, mo le faaleleia o le LBJ, ae le o le fausia o se falema’i fou. 

I Iugafono a le Maota Maualuga, o lo’o taua ai o le Faatonu Sili o le Matagaluega o le Soifua Maloloina ia Motusa Nua ua tofia e fai ma taitaifono o le komiti faafoe e vaaia le Poloketi o le Falemai Fou. O le soaakomiti e fausia lea i fomai, ma tausi mai. O le matafaioi a lea komiti o le vaavaai lea i ripoti a le USACE ma fai ni fautuaga e fua i le silafia a le komiti ma ripoti mai. O le aso 3 o Aperila, 2023, sa tuuina mai ai le aotelega o otootoga a le Pulega. 

O lenei otootoga sa faamaonia e fomai e toa iva mai le LBJ ma le Matagaluega o le Soifua Maloloina ma tausi mai sinia e toafa. O loo taua i le ripoti ina ua maea nisi faatalatalanoaga, o le $300 miliona mai le ARPA ua fuafuaina mo galuega faaleleia, o tupe faavae, i se isi faamatalaga, o le falemai fou i le fanua i le paka liona o le a vaevaeina nei i le $100 miliona o loo faaagaga mo le faaleleia o le LBJ ma faalaulelei le auaunaga ma le $200 miliona e fausaia ai se falemai fou faapitoa e fasefulu moega e faatino ai auaunaga fou faafomai.

O loo taua foi e le soakomiti le faaiuga ina ia vaeluaina le tupe mai le ARPA e $100 miliona e alu i le LBJ ma le $200 miliona e fausia ai le falemai faapitoa e aunoa ma ni feutagaiga ma le soakomiti. E lei feutagai foi ma le komiti faafoe a le LBJ, faapea foi fomai ma tausi mai o le LBJ seia oo ina tuai le faagasologa. O le uluai talosaga sa fautuaina ai le fausia o se falemai e tutoatasi e fasefulu moega, e faaletonu, e le aoga, ma e le tumau foi.

O le soakomiti a fomai ma tausi mai ua ofoina mai se fautuaga mulimuli i lana ripoti: 

• Filifiliga A: ia faafoi le $200 miliona i le Falemai LBJ ma ia mulimulitai i fautuaga a le USACE ia faaleleia. O lenei filifiliga aiaia ai le maualuaga o faamanuiaga o le falemai mo tupe a le APRA. O le LBJ e mafai ona fausia ma pulea le tausia ma toe faaleleia le nofoaga o loo iai nei mo se tupe itiiti ma tuu atu le tausiga lelei i ona lava tagata mamai pe afai e latalata i le falemai o iai nei. O le soakomiti e ūna’ia le Malo o Amerika Samoa ina ia filifili lenei fautuaga. 

• Filifiliga E: ia fausia se falemai faapitoa, tumau/faaleleia pe afai o le filifiliga A e lei filifilia. O lenei faaiuga e faataga ai le LBJ ma le DOH e fai ni suiga talafeagai ma faalelei la latou auaunaga i se tupe faaopoopo ua faatulaga mo i latou. 

• Filifiliga I: o le fausiaina o se “Falemai Iititi-LBJ” O lenei filifiliga e le fautuaina. E le mafai ona fausia se “Falemai Ititi- LBJ” i totonu o le tala faaatatau o le tupe e $200 miliona, ona o le a faaluaina auaunaga faafomai, ma o le a tautuaina na o se vaega itiiti o le faitau aofai o Amerika Samoa. E le talafeagai ma e le fetaui. O le tau o le faagaoioiga e taugata tele. O le tausia o lea nofoaga o le a faaumatia ai a tatou punaoa. E leai se mea e faatupe ai le faaauauina o le faagaoiiga. 

I le Iugafono a le Maota Maualuga, ua fautua malosi atu le Senate i le Kovana Lemanu ma le Malo o Amerika Samoa ina ia mulimulitai i fautuaga a le soakomiti i le falemai fou ma ia faafoi le $200 miliona i le LBJ e faatino ai mea o loo manaomia ma faalelei mea ua fautuaina e le USACE. 

O le fautuaga a le Senete i lau afioga le Kovana Lemanu ia tausisia pea fautuaga a ō tatou fomai, tama fanau a le atunuu, ma tausi mai o loo feagai ma le faaaogaina o le falemai i aso uma. O le fautuaga a le Senate matou te le faamaimauina faamanuiaga tau tamaoaiga ua maua e ala i le polokalama a le ARPA, e le tumau, le talafeagai, le mafai e lenei “Falemai Ititi-LBJ”. 

“O le tiute o i tatou o le tausia o tupe a le feterale ua faamanuiaina ai i tatou. E le o manaomia se isi falemai ae o loo manaomia le toe faafou ma vaai lelei o le falemai o lo i ai nei,” ose vaega lea o le Iugafono sa fa’auluina e le Peresitene o le Senate ma lagolagoina e isi senatoa e to’asefulu.

O lo’o taoto lenei iugafono i luma o le komiti a le Senate mo iloiloga i se taimi o i luma.