TU LUA O PO MA AO

VAEGA 50

tusia e 

E faatalofa atu i le mamalu o le tatou aufaitau nusipepa i lenei taeao fou, taeao manuia, taeao toto’a.  Faamalo le onosa’i, faamalo le tauata’i.  Talitonu le faamoemoe o lo o faamalieina lau faitau i lenei auaunaga vaivai.  Ae ia se’e maia i ou se’etaga malu, se’i toe soso’o atu le tatou Fagogo.

*****************************

Ua tau fai togi atu ulu o Mafa ma Tepora ia Tavita ma le maofa o la foliga, ina ua faapea mai Tavita, o Tina sa na ia fasiotia Rasela ona o lona fu a, ona ua masalosalo Tina, o lo o fai se la faigauo ma lana uo tama.

“E a lau tala?” o le fesili atu lea a Tepora.

“Na faafefea ona e iloa?” o le fesili mai lea a Mafa.  “Ou te le i tauina lava i seisi lena mea.”

“Aisea ua lua manatu ai o Tina na fasiotia Rasela?” o le fesili atu lea a Tepora ia Mafa ma Tavita.

Sa tali muamua Mafa, ma faapea mai, “O le po na maliu ai Rasela, na vave faamanavaina ai foi ’u e Tina.  Na ou manatu, ai foi o le a alu atu lana uo tama.  Ae ina ua ou usu atu i le taeao na soso’o ai, na ou iloa ai e le i alu atu le tamaloa.”

“Na faafefea na e iloa?” o le fesili atu lea a Tepora.

Na mimigi tau’au a Mafa ma faapea atu ia Tepora, “Ona ua leva ona ou galue i totonu o le fale a Tina, e ta te iloa lava mea e tutupu ma mea e le i tutupu ai.”

“O le masani a Tina ae e le i maliu o ia, o le faatasitasi ma fai a latou inuga uaina i po uma, ma talatalanoa ai lava seia o’o i le taeao e soso’o ai.  E faapena foi pe a asiasi atu lana uo tama.  Ae o le taeao lea na ou usu atu ai, le taeao lea na maua ai le tino maliu o Rasela, ina ua ou usu atu, e leai ni ipu uaina sa ou vaaia i totonu o le fale,” o le tali mai lea a Mafa.

“O le a ma seisi mea?” o le fesili lea a Tavita.

“Ou te usu atu i le taeao lea, o lo o ofu lava le ofu a Tna mai i le po muamua, e lei suia lona ofu, ae na ese ai foi la’u vaai, i ana taga sa faia.  E foliga mai pei e mate’ite’i i so’o se tala ou te fai atu iai, o se pa’o i totonu o le fale.  Na ou vaaia foi lona moega, e foliga mai e le i moe ai i le po, o lo o tulaga lelei lava ma mafolafola mea uma.  Ae o Tina, o se tagata e na te leiloa teu lona moega i taeao uma,” o le faamatalaga lea a Mafa.

“Ae o le mea pito sili na fefe ai lo’u loto.  O le mea lea na ou maua i totonu o lana pusa tu,” o le faaopoopo atu lea a Mafa.

“O le a?” o le fesili lea a Tepora.

“Se’i toe faasa’o atu la’u tala.  E le o se mea na iai, ae o se mea na misi mai totonu o lana pusa tu,” o le tali atu lea a Mafa.  “O lona ofu fou lava na fiafia lava iai Tina.  Ma o se ofu taugata lava.  O le ofu na faatau e lana manamea mo ia.  O ituaiga ofu faapena, e le te’i te’i lava nimo.”

“O le a sou manatu, o le a le mea na tupu ai?” o le fesili atu lea a Tepora.

“Na ou fesili ai ia Tina,” o le tali mai lea a Mafa.  “Na fai mai Tina na leaga ina ua pisia i se palapala.  Ma ua ia aveina atu i nofoaga ia o lo o ave iai ofu tuai e fesoasoani i aiga lima vaivai.  Ae na ou iloa e le moni lana faamatalaga. I le olaga atoa a Tina, e leai se taimi o o’u vaai, o tago foa’i se mea e tasi mo seisi tagata.  E o’o lava i nai tagata aisi i luga o le alatele.  Ona fai mai o ia, mo tagata pepelo ma taufa’ase’e.”

“Sa ou masalosalo, na tago nana le ofu i totonu o se tasi o potu lilo ia na te fa’aaogaina i taimi o ana fa’aaliga taufa’asese,” o le fa’aauauina lea o le faamatalaga a Mafa.  “Ma na moni lava o’u masalosaloga, aua na ou mauaina i totonu iina le ofu, ae na ou vaaia le pisia uma o le ofu, i le lanu mumu, ma sa ou iloa ai iina le mea na faia e Tina.”

E FAIA PEA!