Fa’ailoa Peresitene o le Maota Maualuga, atugaluga i le toatele o tagata mai Asia i le teritori

Pago Pago - AMERIKA SAMOA

O le palotaga a le Senate i le taeao o le Aso Lua i lana tauaofiaga lea na fa’amaonia ai e afioga i senetoa le tofiga a le kovana sili, mo le afioga i le faipule ia Vailoata Amituanai e avea ma totino o le Komiti Fa’afoe o Femalagaaiga, o le itu lea na mafua ai ona fa’ailoa le fa’atupulaia o le aofa’i o tagata mai Asia i Amerika Samoa.

A’o le i faia le palota, na saunoa ai le afioga i le Peresitene o le Maota Maualuga ia Tuaolo Manaia Fruean, e fa’apea o le afioga i le senatoa ia Satele Aliitai Lili’o, o se tasi o totino o le Komiti Fa’afoe a le Femalagaaiga, ma fa’ailoa lona manatu i le to’atele o tagata Asia o lo o ulufale mai i le teritori, ma ua tau mafaufau ai lava, po’o le a le mea ua fai e le Komiti Fa’afoe i lea tulaga.

I le taimi o folafolaga, ae le’i ma’ea le tauaofiaga, na tali atu ai le afioga ia Satele i le saunoaga a Tuaolo e fa’apea, o lo o silafia e le latou Komiti Fa’afoe le tulaga mata’ina o le fa’atupulaia o le aofa’i o tagata Asia e ulufale mai i Amerika Samoa, peita’i e leai se mea e mafai ona latou faia ona o le tulaga fa’apitoa o le tulafono tau Femalagaaiga o lo’o i ai nei.

Na fa’afetaia e Satele le palota e fa’amaonia ai Vailoata e avea ma totino o le Komiti Fa’afoe o Femalagaaiga, ma fai mai o ia o se totino fou e mautinoa o le a fesoasoani i le fa’aitiitia o le fa’afitauli ua leva ona latou tauivi  ai.

Saunoa Satele e fa’apea, o le aiaiga fa’apitoa o lo o i totonu o le tulafono tau Femalagaaiga, lea e mafai ai e pisinisi i totonu o le atunu’u ona aumai tagata faigaluega e fa’atino galuega e le o i ai ni tagata faigaluega fa’apitoa i totonu o le atunu’u, ua matala ai le avanoa o lo o fa’aaoga e kamupani i totonu o le atunu’u.

“Matou te matua popole lava i tulaga o lo’o i ai i le taimi nei,” o le fa’aaliga lea a Satele. “O le fa’afitauli ona e leai se tapula’a o le aofa’i o tagata faigaluega e mafai ona latou aumai i totonu.”

“O le tele o pisinisi o loʻo talosaga e aumai tagata faigaluega mai isi atunuʻu, fai mai le mea lava e tasi - e le fia faigaluega tagata o le atunuʻu. O lea la ua amata ona maitauina o nei pisinisi ua amata ona aumai tagata mai atunuu mamao e pei o Indonesia ma e oo lava i Vietnam! Ma e le gata o pisinisi ua mautu ae e oo lava i pisinisi fou o lo o faia nei,” o le saunoaga lea a Satele.

Na ia ta’ua o lo’o taumafai le latou Komiti Fa’afoe e fa’atapula’a le aofa’i o tagata faigaluega e fa’atagaina mai isi atunu’u. Saunoa le alii senatoa e fa’apea, e masani ona latou fa’atagaina le to’alima i le to’asefulu tagata faigaluega i le taimi muamua.

Saunoa ia Satele, afai e fa’ataga tagata mai nei atunu’u i totonu o le Teritori e ono tula’i mai ai le tele o fa’afitauli tau le va fealoa’i i se taimi umi.

Na taua e le afioga i le ali’i senatoa i Vaifanua e fa’apea, e tatau i le Senate ona valaau le Loia Sili e fa’amalamalama auiliili le aiaiga fa’apitoa o le tulafono tau Femalagaaiga, ma pe afai e i ai se mea e mafai ona fai e fa’aitiitia ai lenei fa’afitauli.

Sa fautuaina e Tuaolo le tatau lea i le Komiti Fa’afoe ona fa’atapula’a le vaega fa’apitoa mo tagata faigaluega o fale tu’upa, ona o le tupe sili lea e maua mai ai tupe a le teritori.

E tatau ona fa’ailoa e le Samoa News, e le o se mataupu fou lea i luma o le Senate, ma o lo’o feso’ota’i fo’i le fa’ailoga lanu i lea mataupu.