TU LUA O PO MA AO

VAEGA 49

E faatalofa atu i si o tatou aiga i lenei taeao fou.  Tatou te si’i faatasi le mua ma le viiga faafetai i le Tapaau i le Lagi ona o Lana pule faasoifua, o Lana pule to, ua mafai ai ona tatou aulia mai lenei taeao fou, taeao toto’a, i le soifua maua ma le lagi e mama.  E faafetai atu foi ia te outou o lo o lagolagoina lenei auaunaga i vaiaso taitasi.

Ae saga’i mai loa, o le a toe soso’oina le tatou tala i le alii o Tavita ma le tamaitai o Tepora ma le tau sailiga o le ‘diary’ faitatala lenei ua fasiotia ai nai mafine o Rasela ma Tina.

********************************

Na gata mai le tatou tala i le vaiaso ua mavae, i le taimi na mafai ona maua ai e Tavita ma Tepora le auauna tamaitai a Tina, o le teine o Mafa, ma o latou talatalanoa i mea na tutupu ae e le’i tagatavaleina si mafine o Tina.

Na ta’ua e Mafa e faapea, o lo o iai sona talitonuga, na misa ia Tina ma lana uo tama faalilolilo, i le po na maliu ai Tina, ma o lo o ia masalomia le fasiotia o Tina e lana uo tama.

“Na faapefea ona e iloa sa le i fiafia Tina i lana uo tama, i le po na maliu ai?” o le fesili atu lea a Tavita ia Mafa.

“Ua loa tausaga talu ona ou galue mo Tina.  Ma ua ou masani i ona uiga ma ana gaioiga.  Ma sa mafana foi le ma mafutaga.  O nisi o taimi e ta’u mai ai e Tina mea ia te a’u, e na te le ta’uina i nisi tagata,” o le tali mai lea a Mafa.

“Na e fesoasoani foi ia Tina e faavalea tagata ma ave a latou tupe, e ala i le faia o ana polokalama lea e te lua faatalanoa ai agaga o tagata ua maliliu?” o le fesili atu lea a Tepora.

Ua na o le punou o le ulu a Mafa ma faapea mai i si ona siufofoga tau le lagona, “E te faia so’o se mea pe a o’o lou olaga i se tulaga le tagolima.”

“E te iloa le mafuaaga na le fiafia ai Tina i lana manamea?” o le fesili atu lea a Tepora.

Na ataata Mafa ma faapea, “Ia o le a foi le mafuaaga e ita ai se fafine po o se tamaitai i sana uo tama?”

Na pupula to’a atu Tepora ia Mafa ma faapea atu, “Ona ua le faamaoni i le la faiga uo.”

Na luelue mai le ulu a Mafa ma faapea mai, “Na masalosalo Tina, o lo o iai se mafutaga i le va o lana manamea ma Rasela.”

Manatua foi, o Rasela lea na muamua lava maliu i le amataga o le tatou fagogo.  Ma o lana masani foi lea, o le faia o mea e pei ona sa faia e Tina, o le faavalea o tagata e ala i le faia o fa’aaliga e faatalanoa ai agaga o tagata ua maliliu.

“Na ou vaaia le nofonofo o Tina i le tele o aso, ma tagi i lona potu,” o le tala lea a Mafa.  “Na ou iloa o lo o ia fuafua e talanoa i lana manamea e uiga ia Rasela.  Ae e leai so’u manatu o le a ia faia le mea na ia faia.”

“O le a lana mea na fai?” o le fesili atu lea a Tepora.

Na faateia le toalua lea i le tali mai o Tavita, “O lona fasiotia lea o Rasela!”

E FAIA PEA!