Toe tauaofia Fono Faitulafono mo le tauaofiaga Lona Lua

Pago Pago - AMERIKA SAMOA

O le taeo ananafi na toe foi ai afioga i senetoa ma faipule mo a latou tauaofiaga mo le tatalaina aloaia o le Fono Tele lona lua a le Fono Faitulafono lona 38, ma o le mataupu e ave i ai le fa’amuamua mo le iloiloina ma le fa’amaoniaina, o le tupe fa’asoasoa lea ua fa’atulaga e le malo mo le tausaga tupe 2024, lea e amata i le aso 01 Oketopa o le tausaga nei.

Sa tauaofia le maota lava ia e tatala ai le tauaofiaga fou a le Fono Faitulafono. 

Ae le’i tatala aloaia le tauaofiaga fou, sa auai afioga i senatoa i se fonotaga fa’apitoa i le taeao, mo le fa’atautoina o le afioga ia Olo Uluao Letuli, o le senatoa fou mo le Itumalo o Fofo i le Maota Maualuga. 

O le taimi lenei o le tausaga, i le tauaofiaga a le Fono Faitulafono, o lo o ave i ai le faamuamua a le Fono i le paketi faaletausaga a le malo, ma o lo’o faamoemoe le Fono e vave tuuina atu e le Faigamalo le tala o le tupe faasoasoa mo le tausaga tupe fou o le 2024 ina ia lava le taimi e faia ai iloiloga.

O nisi o sui o le Fono ua fuafua e talosaga a o lei faia se iloiloga a le komiti, lipoti tau tupe a le Malo mo le tausaga faaletupe 2023 – aemaise o tupe maua ua aoina mai i le taimi nei. O lo'o fuafua fo'i e su'e lipoti su'etusi o fa'agaioiga a le malo ma vaega tumaoti o le malo.

O le tapulaa fou o le tala o le tupe a le ASG 2024 mo tupe maua lotoifale ua faatulaga i le 5% i luga atu o le tausaga faaletupe o lo o i ai nei ma le aso e gata ai le tuuina atu o paketi fuafuaina mo ofisa o le malo o le aso 22 o Me, e tusa ai ma le tusi sa tuuina atu i le kapineta mai ia Catherine D. Saelua le faatonusili o le Ofisa o le Tupe Faasoasoa a le malo.

Ma sa faailoa atu foi e Saelua i sui o le kapeneta e aua neʻi aofia i totonu o a latou fuafuaga o le paketi, a latou tupe mai le fetarale mo le COVID-19 ona tupe faʻameaalofa - o se alagatupe le tumau. 

E leai se isi fa'amatalaga mai le Faigamalo i le taimi nei i le tulaga o pili fou ua fuafua e tuuina atu i le Fono Faitulafono mo le loiloina

Peitai o se tasi o tulafono taufaaofi e taua na tuuina atu e le Faigamalo i le Fono ia Aperila o le tausaga nei - a’o malolo le Fono - o le pili tupe e $278,000 mo le fa’amoemoe e fa’amaea ai mataupu faasaga i le malo o Amerika Samoa i le fa’amasinoga fetarale ma le fa’amasinoga i Amerika Samoa.

O lea tulafono taufaaofi o lo’o aofia ai le talosaga e $100,000 mo le tagi mataupu a “Simeonica Tuiteleleapaga/ DOL v. ASG ma le DHSS, Consent Decree” o lo’o taoto nei i luma o le fa’amasinoga fetarale i Honolulu, i se tagi fa’asaga i le malo ma le Matagaluega o le DHSS.

E pei ona ripotia muamua e le Samoa News, ua mae’a ona faia se fa’aiuga a itu e fa’atatau i lenei mataupu, ma ua tuuina atu ai loa i le afioga i le ali’i fa’amasino o le feterale. 

Ae peitai na talosaga itu e lua ina ia taofia e le faamasinoga taualumaga o lenei mataupu, mo le 120 aso e mafai ai ona faamautu lenei mataupu i se taimi o i luma. Ma ua ma’ea talia lea talosaga. 

O isi fa’aiuga o tupe talosaga i le pili a le faigamalo e fa’atatau lea i mataupu o lo’o i luma o le fa’amasinoga maualuga a Amerika Samoa.