RIPOTI MAI OFISA A LEOLEO

Pago Pago - AMERIKA SAMOA

OSOFAIA LE FALEMELI A LE MALO I FAGATOGO 

Ua gafa nei le Ofisa a Leoleo ma le suesueina o le osofaiina faalua, o le falemeli a le malo i Fagatogo, i vaiaso ua tuanai.  Na mafai ona faamaonia mai e le susuga i le Taitai Leoleo ia Pouu’amea Tuaolo Sagapo le tupu o lenei faalavelave.

Ma na ta’ua e Pouu’amea, o leisi osofaiga, na tupu i le lua vaiaso ua tuanai ma ua maea ona faamaeaina suesuega o lea mataupu, ae peitai, ona o lea ua o’o atu i luma o le ofisa a le Loia Sili lenei mataupu, ua le mafai ai ona tuuina mai se faamatalaga auiliili.

Ae o le faalavelave lea na tulai mai i le po o le aso 29 o Iuni, na ta’ua e Pouu’amea, o lo o fa’aauauina pea suesuega a leoleo i lea mataupu.

Na ia ta’ua, o nei mataupu uma, o lo o faaooina atu i le ofisa a le Loia Sili aua le faataunuuina o ala o le tulafono.  

E fia fa’amautu atu e le Samoa News, ona o le falemeli a le malo o Amerika Samoa, e i lalo o le vaavaaiga a le Malo Feterale, o le mea lea, o a lava faafitauli ma faalavelave e tula’i mai ai, e agai uma atu lava i le vaega a le FBI mo a latou suesuega.

ATUGALU LE ALII KOVANA I LE SOSOLA SO’O O PAGOTA

I le Aso Faraile, Iuni 30, 2023 na faasalalauina ai se malelega tusia a le afioga i le Kovana Sili, e faatatau i se mataupu o lo o vaaia le tupu so’o i falepuipui a Amerika Samoa, o le sosola ese mai ai lea o pagota.

O le solaaga lata mai nei, sa tulai mai i le aso Lua, Iuni 24, 2023.  Ma e tusa ai ma faamaumauga a le faamasinoga, o lo o masalomia ai le sola ese o se pagota mai i le falepuipui i Tafuna, ma ua mafai ona toe maua o ia, ma ua molia nei o ia i lona sola ese mai i le falepuipui.

E tusa ai ma faamaumauga a le faamasinoga, o lo o te’ena e lea pagota le faaupuga e faapea sa ‘sola ese’ mai o ia mai i le falepuipui, ae sa ta’uina atu i sui malu o le malo na gafa ma le suesueina o lenei mataupu, sa aveina o ia i fafo ma le falepuipui, e se tasi o leoleo o le falepuipui, ina ia inisinia le taavale a le leoleo.

O lo o teena e le leoleo ia le faamatalaga a le pagota.

I le fa’aaliga mai i le Ofisa a le Kovana Sili, ua ta’ua ai le faamaualuga o le faatulagaga o le puipuiga ma le saogalemu o tagata o Amerika Samoa, i le afioga i le kovana sili, Lemanu P. S. Mauga ma o lo o ia galue faatasi ma le Faatonusili ia Tauanuu Semu Tauanuu faapea le Faauluuluga o le falepuipui, le susuga Papalii Marion Fitisemanu, ina ia faamautuina le mau o le lokaina o pagota i totonu o falepuipui.

MOLIA E LE MALO FETERALE IA LE PARAMOUNT BUILDERS

I se ripoti mai i le Ofisa o Galuega a le malo tele o Amerika, ua faailoa mai ai le moliaina o le kamupani fau fale a le Paramount Builders i moliaga e 22, i lo latou le tausisi i tulafono mo le puipuiga o le saogalemu o tagata faigaluega ma nofoaga o faia ai galuega, i ni asiasiga e 26 sa faia.

Ma ona o lea faatamala i le itu a le Paramount, na mafua ai ona tulai mai se faalavelave ia Me 2013, lea na pa’u mai ai se tasi o le aufaigaluega mai luga o se nofoaga maualuga sa faia ai se latou galuega, ma maliu ai.

O Ianuari 2023, na toe maua ai foi le solia e le Paramount o ni isi tulafono a le OSHA (Ofisa o Galuega) ma o nei solitulafono, e ono aafia ai le saogalemu ma ola o tagata faigaluega.