Toe gaoia meatotino a le aiga na agalelei ia te ia

Pago Pago - AMERIKA SAMOA

Ua molia nei le alii o Tuuaifuaina Laki Va’apu’u po o Tony i le Faomea i le tikeri lona lua, faitauga e tasi i lona soli fanua e aunoa ma se faatanaga ma faitauga e valu o le Gaoi, ina ua ia osofaia le fale o se aiga na faauoina o ia ma tausi e pei o so latou lava aiga.

O le aso 30 o Me, 2023, na valaau atu ai le susuga David Savaii i le ofisa a leoleo, e lipotia le osofaia o lo latou fale e se gaoi.

Sa faamatala e Savaii, sa tietie mai i se pasi mai i Alofau e agai atu i Nu’uuli ae faatu e le alii lenei o Vaapuu ia le pasi i Avaio, i leisi itu auala o le 2-Dollar Beach.  Sa ta’ua e Savaii, o le fale o le latou aiga lea sa i leisi itu auala o le nofoaga lea na faatu ai e Vaapuu ia le pasi.

Sa taua e Savaii, ina ua oso atu Vaapuu i luga o le pasi, sa ia maitaua le amoina e Vaapuu o se ato faafafa lanu efuefu ae lanu paepae le pito i lalo, ae masae autafa, ma e tutusa lelei ma sana ato faafafa lea e masani ona teu i le latou fale.  Na oso le masalosalo i le loto o Savaii, ma ia tago pu’e le ata o Vaapuu.  Na ta’ua e Savaii, ina ua iloa mai e Vaapuu le pueina atu o lona ata, sa ia taumafai e nana ona foliga ma faatu loa le pasi ma oso i lalo, i Satala, i tafatafa o se faleaiga Saina.

Ina ua taunuu Savaii i lo latou aiga i Nu’uuli, sa ia faamatalaina le mea na tupu i lona tina, o Fuamatala Savaii, ma sa fa’aali iai e Savaii ata sa ia pueina ma ona masalosaloga.  Ae na faateia Savaii ina ua fai atu si ona tina, e na te iloa le tagata lea na pueina e Savaii lona ata, o se alii e igoa ia Tony, ma sa nofo i le latou aiga i aso o laititi o ia.

O le aso lava lea, na agai atu ai loa Savaii ma lona tina i lo latou fale i Avaio ma o la vaaia ai se tasi o faamalama o le fale, ua masae le uaea ma e foliga mai na oso ai se tagata i totonu o le fale.  O le maea o suesuega auiliili a Savaii ma lona tina i totonu o le latou fale, na faamaonia ai le gaoi o nisi o ula auro, tautaliga ma seti ma’ataua a le tina.  Na gaoia ai foi ma ni apa elegi se valu mai i se pusa elegi.

Na ta’ua foi e le tina ia Fuamatala le gaoia o se ‘laptop’ lanu uliuli ma se telefoni fou lava, atoa ai ma se ‘speaker’ o se ili fou ma se uati (Omega).  O le taumateina o le tau aofai o meatotino na gaoia, e pe a ma le $4,236.75.

Na ta’ua e le tina lona iloa o le tagata o lo o masalomia i le gaoiina o le latou fale, mai i ata sa pueina e lana tama, o Vaapuu, lea sa masani ona nofo i lo latou aiga, ma o latou tausi ia te ia, e pei lava o seisi o le latou fanau, ae ua fai sina leva ona alu ese lenei alii mai lo latou aiga.

O Iuni 3, 2023 na faafesootai ai e David Savaii ia le ofisa a leoleo ma faailoa iai le toe mauaina mai o lana ato fa’afafa lea na leiloa, mai i se ave taxi.  Sa ia faamatalaina i leoleo, e na te le i tatalaina le ato talu ona ia mauaina, ona sa ia manao e vaai muamua iai leoleo.

O le alii ave taxi lea na maua mai ai le ato fa’afafa, o le susuga Niu Tuimalatu, ma sa ia faamatalaina i leoleo e faapea, o le po o le aso 2 o Iuni, 2023, sa alu atu ai se alii i le latou laumua, lea e ta’ua o le Fetu Ao, ma sa fafaina atu e lea alii le ato fa’afafa lea ma sai lona ulu i se mitiafu, e foliga mai o lo o tau nana ona foliga.  Ae na iloa mamao atu lava e Tuimalatu, o le alii o Tony.

Na ta’ua e Tuimalatu, e mafua ona ia masani ia Tony, aua sa la galulue faatasi i se kamupani faufale.  Sa faatonuina e Tuimalatu ia Tony, e oso atu i le nofoa pito i luma ae peitai, na oso lava Tony i le nofoa pito i tua ma talosagaina le momoliina o ia i Avaio.

A’o la aga’i atu i Avaio, sa faamatala e Tuimalatu, le taumafai lava o Tony e nana mai ona foliga mai ia te ia, peitai, e le i iloa e Tony, ua leva na iloa o ia e Tuimalatu.

O le lata i le 12 i le po ae taunuu loa le taavale a Tuimalatu ma Tony i Avaio, ma sa talosagaina e Tony ia Tuimalatu ina ia paka i tafatafa o le $2 Beach ma faatali atu ai iina.  Sa ta’ua e Tuimalatu, sa manatu o ia o le a toe fo’i atu Tony ona o lea na alu ae tu’u lana ato faafafa i totonu o lana taavale.  Ae peitai, na toeititi atoa le afa itula, e le i toe fo’i ane lava ia Tony ma sa o atu se ulugalii e nonofo lata ane, ua su’esu’e le mafuaaga ua tu umi ai lana taavale i le leva o le po.  Ma o lea na ia alu ese ai loa.

O le aso na soso’o ai, na o’o atu ai David Savaii i le laumua a le Fetu Ao e saili ia Tuimalatu ma ia maua ai lana ato fa’afafa.  Sa faamatala e Savaii i leoleo, o le ulugalii lea e nonofo i tafatafa o le latou fale i Avaio, na pu’eina le ata o lana ato fa’afafa lea sa i totonu o le taxi, lea na lafoina atu ia te ia ata ma le igoa o le laumua o le taxi.

O le alii o Tony, sa molia muamua foi i le gaoi i le 2018 ma o lo o nofo vaavaaia o ia, mai lava i le 2018, seia o’o atu i le 2025.