TU LUA O PO MA AO

VAEGA 48

E faatalofa atu i le mamalu o le tatou aufaitau nusipepa i lenei taeao fou, taeao manuia, taeao toto’a.  Faamalo le onosa’i, faamalo le tauata’i.  Talitonu le faamoemoe o lo o faamalieina lau faitau i lenei auaunaga vaivai.  Ae ia se’e maia i ou se’etaga malu, se’i toe soso’o atu le tatou Fagogo.

*****************************

Ua toe foi i totonu o le fale lea na oso mai ai i fafo ia le tamaitai o Mafa, ia Tavita ma Tepora ma taitai atu iai ia Mafa ma faanofo i luga o le nofoa.  Na vaaia le gatete o le tamaitai o Mafa, i le fefe.  Ua savali atu ia Tepora ma tu’u se tipoti vai i luga o le ogaumu e fai ai se ipu ti aua se taumafaiga e faato’afilemu le loto ma le mafaufau o Mafa.

“O na e te lua saili po o ai na fasiotia Tina?” o le fesili mai lea a Mafa.  

“Ioe,” o le tali atu lea a Tavita.  “Ua iai se tagata ua ma mafaufauina o ia se fasiotia Tina ma Rasela, ae peitai, o lo o tau saili ni faamaoniga.  Ma o lo o ma taumafai ia vave maua ni faamaoniga ma lokaina loa lea alii, ae na te le i fasiotia seisi tagata.”

“E te lua le malamalama,” o le tali mai lea a Mafa.

“Ia, taumafai e faamanino mai,” o upu faalototele mai lea a Tepora ia Mafa.  “E taua tele lou faamatala mai o le mea na e te iloa.”

“Aisea na e sola ese ai ina ua fasiotia Tina?” o le fesili atu lea a Tavita.  “Na e vaai i foliga o le tagata na fasiotia Tina?  O le mea lena ua e fefe ma sola ese ai?”

“E leai, ou te le i vaai i ona foliga,” o le tali mai lea a Mafa.  “Na ou usu atu i le taeao na soso’o ai, faato’a ou maua ai ua maliu Tina ae ua matua’i gasu uma totonu o le potu lea na faia ai le fa’aaliga a Tina i le po lena.  Ae na ou iloa lelei lava e le o se tagata gaoi sa faia lea tulaga, ona e leai ma se mea taugata a Tina sa gaoia.”

“Lelei tele lau vaai,” o le tali mai lea a Tavita.

Sa luelue atu le ulu o Mafa ma lona fiafia i le faamatalaga a Tavita ma sa avea lea ma tulaga na faalototele mai ai ia te ia.  “Ina ua ou maua atu Tepora i lena taeao, o lo o ia laei lava i ona laei sa faia i le po.  Ae o lo o matala le faitotoa pito i luma.”

“E foliga mai na iloa e Tina le tagata na alu atu i le po lea ma sa faatalitali mai foi iai i lea tagata,” o le tala lea a Mafa.

Ua tu sasa’o Tepora i le tala lea a Mafa, ua le migoi.  “O ai sa faatali mai iai Tina?”

“O lana manamea,” o le tala lea a Mafa.  “O po uma lava e iloa ai e Tina o le a asiasi atu lana manamea, e na te vave faamanavaina ai a’u mai a’u galuega i lona fale.  Na ou iloa foi i le po lena, ina ua mae’a lana fa’aaliga ae fai mai ua mafai ona ou alu, ae e le i uma ona tapena le fale, o la e faatali foi Tina i lana manamea.”

“O ai le manamea a Tina?” o fesili atu lea a Tavita.

“O la’u tala moni lava.  Ou te le iloa.  Ou te le i vaai foi iai i foliga o lea tagata.  E fai faalilolilo a la feiloaiga ma Tina,” o le tali mai lea a Mafa.

Ua tu’uina atu nei e Tepora le ipu ti i luma o Mafa ma na tago atu Mafa ma u’u lima lua mai le ipu ti ma faataupupula iai.  “O taimi uma lava e asiasi atu ai le alii lea ia Tina, e mana’o lava Tina ia ou vave alu ese mai i le fale.  E foliga mai o se faatonuga mai lana manamea,” o le tala lea a Mafa.

“E faafefea na iloa e Tina o lea o le a asiasi atu lana manamea?  E avatu se feau?  Po o se tagata e ta’u atu ia Tina?” o le fesili lea a Tavita.

“E pei ona ou fai atu, ou te le iloa taimi o tu’ugatala a Tina ma lana manamea faalilolilo lea.  Ae e iloa lava e Tina le taimi ua fuafua e asiasi atu ai,” o le tali mai lea a Mafa.  “Ma ou te iloa, na fuafua e asiasi atu tonu lava i le po lea na fai ai le fa’aaliga a Tina lea na lua auai atu ai.”

“Ou te manatua foi, sa le i fiafia iai Tina i lana manamea i le po lea, ma atonu na misa ma i’u ai ina fasiotia o ia e lana manamea,” o le toe faaopoopo mai lea a Mafa.

E FAIA PEA.