TU LUA O PO MA AO

VAEGA 47

E faatalofa atu i si o tatou aiga i lenei taeao fou.  Tatou te si’i faatasi le mua ma le viiga faafetai i le Tapaau i le Lagi ona o Lana pule faasoifua, o Lana pule to, ua mafai ai ona tatou aulia mai lenei taeao fou, taeao toto’a, i le soifua maua ma le lagi e mama.  E faafetai atu foi ia te outou o lo o lagolagoina lenei auaunaga i vaiaso taitasi.

Ae saga’i mai loa, o le a toe soso’oina le tatou tala i le alii o Tavita ma le tamaitai o Tepora ma le tau sailiga o le ‘diary’ faitatala lenei ua fasiotia ai nai mafine o Rasela ma Tina.

***********************

Na gata mai le tatou fagogo i le vaiaso ua tuanai ina ua sauni Tavita ma Tepora e o e vaai le fafine lea sa toalua ma Tina i le po na maliu ai o ia.  Manatua foi, o Tina o se tagata sa fiafia e fai ana faaaliga faataulaitu lea e talanoa ai i agaga o tagata ua maliliu.  Ae o le po lea na fai ai lana fa’aaliga lea sa auai atu ai Tavita ma Tepora, na fasiotia ai o ia, ae sola ai le fafine la lea o le a o Tavita ma Tepora e vaai.

O le igoa o le fafine lea, o Mafa ma ua leva na saili e le vaega a le tama o Tavita le mea o lo o lafi ai.  Ma na maua o ia i se fale e lata lava i le tuaoi ma leisi nu’u e soso’o i le mea o nonofo ai Tavita ma Tepora.

O le tu lua o po ma ao, ae taunuu loa Tavita ma Tepora i le nofoaga na faasino ifo e sipai a Tavita, lea o lo o nofo ai Mafa.  Sa fautuaina e Tavita lana vaega ina ia aua lava ne’i pa’o pe pisa seisi, ina ne’i iloa mai e Mafa, toe sola ese foi.

Ua kami atu i tua le toalua lea, i se auala pogisa e oso atu i tua o le fale.  E le’i umi ona lalafi Tavita ma Tepora i tua o le fale, ae o la faalogoina loa le pa’o atu o le taavale a le auauna a Tavita, ua uma ona faatonuina e oso atu i le pito i luma o le fale.  Na o la lagona le tuitui leo tele o le auauna a Tavita i le faitotoa i luma.

Na tau faalogo le au toalua lea e lalafi i le pito i tua, pe lagona atu se pa’o mai totonu o le fale.  E le’i umi lava ae lagona le tamo’e faatopetope o se tagata, aga’i i le faitoto’a pito i tua ma tatala.  Na iloa mai e Tavita ma Tepora, le faatopetope atu o se fafine agai i fafo mai i le faitoto’a i tua ma o la feosofi mai loa e faafetaui le fafine.

“Mafa?” o le valaau mai lea a Tavita.

Ua tu faafuase’i le mafine o Mafa ma le te’i tele.  Ua tau autilo solo po o fea se mea e sola agai iai, ae o le taimi lea ua o’o mai ia te ia ia Tavita ma u’u mau lona lima.

“Faamolemole tu’u a’u, e leai sa’u mea na faia,” o le tagi lea a Mafa ma taumafai e se’i lona lima.

“Ua lava lena Mafa.  E ma te le o manao e fai se mea leaga ia te oe,” o le oso atu lea a Tepora.  Ma o le lagona mai e Mafa o le leo o le fafine, na tu’u ai loa lona tafiti solo ma tau autilo mai i le mea o tu atu ai Tepora.

“Tepora, o oe lena?” o le fesili mai lea a Mafa ma le vaaia o ona foliga ua amata ona to’afilemu.

“O a’u lea,” o le tali atu lea a Tepora.  “O Tavita lena e u’uina lou lima, lea sa ma auai i le po o le fa’aaliga mulimuli a Tina.  O lea e ma te taumafai e saili le mafuaaga na maliu ai Tina.  E ma te mananao e fesoasoani ia te oe.”

“Ina ua ou lagonaina le tu’itu’i mai o le faitoto’a, sa ou le iloa po o leoleo po o ia lea,” o le tala lea a Mafa.

“Tatou o atu i totonu o le fale tatou te talatalanoa faalelei ai,” o le fautua mai lea a Tepora ia Mafa ma ia tago atu u’u mai le lima o Mafa ma toe faaulufale atu o ia i totonu o le fale.

E FAIA PEA.