TALA I VAIFANUA

Pago Pago - AMERIKA SAMOA

TOAFA FANAU AOGA A LE TERITORI UA FAAMANUIAINA I SIKOLASIPI MAI I LE MCDONALD’S - AMERIKA SAMOA

O le Aso Faraile o le vaiaso ua tuanai, na faataunuuina ai se faatasiga fiafia i le faletalimalo a le Tradewinds i Ottoville, aua le tauaaoina atu o ni sikolasipi faaleaoaoga, e $56,000 lona faitau aofai, mai i le kamupani a le McDoanld’s a Amerika Samoa, mo nisi o fanau aoga e to’afa, e aofia ai le to’alua ua faauuina mai i le Kolisi Tuufaatasi a Amerika Samoa (ASCC) ma o le a faimalaga atu i atunuu i fafo e fa’aauau ai a la’ua aoaoga.

O i la’ua ia o Janella Musni ma Ualesi Mua.  O Janella o le a faimalaga atu e fa’aauau ana aoaoga i le Iunivesite o Portland ae o Ualesi o le a malaga atu e fa’aauau ana suesuega i le Iunivesite a Utah i Saute.

O isi fanau aoga ua faamanuiaina i sikolasipi mai le McDonald’s, e aofia ai Lahaina Mulitalo, lea sa fa’auina mai le aoga maualuga a Fagaitua ma o le a feagai nei ma aoaoga faa Tausi ma’i.  Faapea ma Misionare Feleti lea na faauuina mai i le aoga maualuga a Manumalo.

O lenei polokalama faasikolasipi a le McDonald’s sa faavaeina e le Pulesili o le faleaiga, le susuga Charlie Tautolo i le tausaga e 2016 ma ua $630,000 sikolasipi ua faamanuiaina ai fanau aoga e silia ma le to’a 50 a le teritori.

O le susuga i le Faafeagaiga ia Rev. Sanerivi Mulitalo ma le sui Peresetene o le McDonald, o ia foi o le Taitaifono a le McDonald’s, o Dolores Tautolo, na auai i le faatasiga i le aso Faraile lea na auai ai foi fanau aoga e to’afa ma o latou matua.

FAAMAMALUINA LE ASO TUTOATASI O AMERIKA I LE ASO A TAEAO, IULAI 4, 2023

I se fa’aaliga tusitusia mai i le afioga i le Kovana Sili, le susuga Lemanu P. S. Mauga, ua faalauiloa mai ai le faamamaluna o le Aso Tutoatasi o le Malo Tele o Amerika, i le aso a taeao, Aso Lua, Iulai 4, 2023 ma o le a faapea ona tapunia uma ai ofisa ma matagaluega a le Malo.

O lenei aso malolo, o le a faapea ona faamamaluina e le Malo Feterale, ma o le a tapunia ai foi ma ofisa o le malo feterale, i totonu o Amerika Samoa.

E tusa ai ma le fa’aaliga a le Kovana, sa ia u’unaia tagata uma o le teritori ina ia tomanatu i taulaga a tua’a sa faia ma tu’uina atu o latou ola, lea ua o tatou ‘ae’ae ai nei i ma’a o malie.

FAAFITAULI TAU TAAVALE I LUMA O LE FALEAIGA A LE CECILIA

O le afiafi o le Aso Lua o le vaiaso ua mavae, na tulai mai ai se faafitauli tau taavale, ina ua taia se taavale i le pa ma’a o lo o i le va o le faleaiga a le Cecilia’s ma le pamu kesi a Haleck’s lea o lo o fesaga’i ma le Cost-U-Less i Iliili, ma taavalevale atu ai le taavale aga’i i le nofoaga lea e faamama ai taavale.

I se ripoti na maua e le Samoa News, na ta’ua ai le faafeso’ota’iina e se tasi o le aufaigaluega a le Cecilia’s ia le Ofisa o Leoleo mo se fesoasoani i lea mataupu.

E tusa ai ma se ripoti mai i le ofisa a leoleo, e to’afa ni tagata sa i totonu o le taavale i le taimi na tupu ai le faalavelave – e toatasi se alii ma ni tamaitai se to’atolu.  Ae ina ua o’o atu leoleo ma le EMS, sa na o le avetaavale ma le pasese e toatasi o totoe i totonu o le taavale.  Ma na aveina atu i la’ua uma i le falemai mo se siaki a fomai.  Ma ua maea ona toe fo’i atu i la’ua i o la aiga.

Ua ripotia mai e leoleo le fa’aauauina o a latou suesuega i lenei mataupu ma e le o mautinoa po o a’afia ai ni Fualaau faasaina po o ava malolosi i lenei faalavelave.