TU LUA O PO MA AO

VAEGA 46

E faatalofa atu i si o tatou aiga i lenei taeao fou.  Tatou te si’i faatasi le mua ma le viiga faafetai i le Tapaau i le Lagi ona o Lana pule faasoifua, o Lana pule to, ua mafai ai ona tatou aulia mai lenei taeao fou, taeao toto’a, i le soifua maua ma le lagi e mama.  E faafetai atu foi ia te outou o lo o lagolagoina lenei auaunaga i vaiaso taitasi.

Ae saga’i mai loa, o le a toe soso’oina le tatou tala i le alii o Tavita ma le tamaitai o Tepora ma le tau sailiga o le ‘diary’ faitatala lenei ua fasiotia ai nai mafine o Rasela ma Tina

**********************************

Ua na o le tu o le tamaitai o Tepora ma sioa atu ia Tavita, a’o tu ma Tavita ma lona tua o lo o u mai ia Tepora.  Sa le i mautinoa Tepora pe sa a’o lana faalogo.  O lea sa fai atu lana faafetai ia Tavita mo le laveaaiina o ia mai faiga tau faaleaga a le alii o Iosefa, ae o lea e tali mai Tavita e la te faaipoipo.

“Ou te le o malamalama i le uiga o lau faamatalaga, Tavita.  Ou te iloa na e faia faamatalaga ia Iosefa, e faafefe ai ina ne’i toe alatu ma faasalalau atu i tagata mea ia na tutupu.  Ae le o se mafuaaga lea o le a faamo’i ai na mea,” o le tala a Tepora ma ataata.

Ua liliu mai le alii o Tavita ma faasaga mai ia Tepora ma faapea, “Ou te le o manao e te tau faafetai mai, e leai foi ni tupe po o ni ‘oa o ia te oe, e mafai ona e totogi ai a’u.”

Ua faateia Tepora i le leo o Tavita, e pei ua le fiafia.

“Ae e moni la’u tala sa fai ia Iosefa.  E na o le pau le auala e taofia ai Iosefa mai le toe faitatala atu i isi tagata, o le ta faaipoipo loa.  Aua a avea oe ma a’u ava, o le a le toe pa’i mai Iosefa ia oe.”

“Faipoipoga?” o le fesili lea a Tepora ma le ofo o lana pupula.

“E a? E te le fia faaipoipo mai ia te a’u?” o le fesili tau fa’aata lea a Tavita.

Ua tilotilo atu Tepora i foliga o Tavita.  O le mea moni, o lo o faatalitali Tepora, ona o lo o fia faalogo atu o faapea mai Tavita, “Ou te fia faaipoipo ia te oe, ona ou te alofa ia te oe.”  Aua o lea ua mautinoa e Tepora ona lagona alofa ia Tavita.

Ae paga lea, sa na o le ata o Tavita ma faapea atu, “O lea ua mafai ona tatou taofia Iosefa, mo sina taimi puupuu.  Ae a alu alu, ta te le nonofo, o le a faapea ona toe liliu mai faiga leaga a Iosefa ia te oe.  Mata o le a se mea e tupu i nai uso o lou tina, pe afai ae fulitua uma iai le nu’u ona o tala tau faaleaga a Iosefa?”

Ua leai se tali a Tepora i le faamatalaga a Tavita.  Ae ua na malamalama lelei lava i uiga ma le moni o faamatalaga a Tavita.

Ae e le i toe tali atu Tepora, na faate’ia i la’ua i le tu’itu’i mai o le tagata i le faitoto’a.

Ua savali atu Tavita ma tatala le faitotoa, o lo o tu mai ai sana ave feau.  Na o la talanoa tau musumusu ona toe alu ese atu lea o le tamaloa.

Ua liliu mai Tavita, ma na iloa atu e Tepora i ona foliga, e iai se mea ua tupu.

“O le a le mea ua tupu?” o le fesili atu lea a Tepora.

“O lea ua maua e la’u ave feau le mea o lo o iai le mafine lea na toalua ma Tina i le po lea na fai ai ana faiga taulaitu i lona fale, lea na ta auai atu ai,” o le tali mai lea a Tavita.

“O lea o le a ou alu e ma te talanoa, se’i tau saili ai le mafuaaga na fasiotia ai Tina.”

“Ta o,” o le oso atu lea a Tepora

“E leai, e nofo le fafine i se vaega o le a’ai, e le saogalemu,” o le tali mai lea a Tavita.

“E iai le mafuaaga na sola ai le fafine.  Ma afai ae e alatu na o oe, o le a toe sola foi le fafine.  Atonu o le a aoga lo’u iai, e mafai ona faalototele ai o ia ma maua mai ai se faamatalaga,”  le tali lea a Tepora ma tago atu lava i le u’u mai lana ato.

E TOE FAIA PEA!