TALA I VAIFANUA

Pago Pago - AMERIKA SAMOA

MALIU TAGATA FAIGALUEGA ILE NOFOAGA, MEATOSO-VAA I SATALA, TAIMI O AOAOGA I LALO O LE SAMI

O se tasi o tagata faigaluega a le nofoaga o meatoso-vaa a le Ronald Reagan Marine Railways i Satala sa faia aoaoga i lalo o le sami e maulu ina ua tulai mai se faalavelave, i le afiafi o le Aso Tofi na tea nei. E le o iloa poo le a le mea na tupu a o i ai o ia i lalo o le sami, pe o lona maliu o loʻo taʻua aloaia o se malemo, faʻafuaseʻi poʻo se isi mea.

Na talosagaina se fa’amatalaga mai le Matagaluega o Su’esu’e ma Lavea’i- Marine Patrol ma le EMS, atoa ai ma le falema’i a le LBJ e uiga i lenei fa’alavelave, peita’i na fa’ailoa i le Samoa News, o le mafua’aga o le maliu o lea ali’i talavou o lo o fa’aauau pea su’esu’ega i lenei fa’alavelave. 

Na maua se fa’atalatalanoaga a le Samoa News ma le Pule Sili o le nofoaga toso-va’a, Carlos Sanchez, lea na fa’ailoa ai lana tama faigaluega o Ricky Fa’amoana - sa maliu i le fa’alavelave. 

Na fa’ailoa e Sanchez i le Samoa News e fa’apea, “o se tasi o a matou tagata faigaluega talavou na maliu, e le o iloa le mafua’aga, i lalo o le sami, i tua tonu lava o le matou ofisa”.

Fai mai Sanchez, "sa ia te ia le faamoemoe maualuga e fesoasoani e fausia o ia (Fa'amoana) ia avea ma se tagata."

Na taua e Sanchez i le Samoa News e faapea, e to’atolu i latou sa auai i aoaoga maulu, ma o se tasi o i latou na maua mai ia Utulei ma sa ia fa’a faigaluega ai i le tusa o le tasi ma le afa tausaga talu ai. “Na manuia foi lena alii, tele taleni, e aofia ai ma le faiaoga maulu mo le aufaigaluega.

"O Ricky o se tasi o na alii, o le a alu, ae o le a le mea na tupu? Matou te le o iloa lava, "o lana tala lea. "Ae o le mea matou te iloa, sa i ai le ea i totonu o lana tane, ona o tagata mai le Marine Patrol na o mai iinei ma ave le tane, sa latou siaki le tane ma (o loʻo i ai) 1000PSI na totoe.

Faaalia e Sanchez, e lei atoa le lua itula o le maulu o le a‘oa‘oga ma ina ua o mai i luga tama, sa ia fesili, mo Ricky.

Fai mai a ia, o Ricky na amata o se tagata faigaluega le-tumau, ae faasolosolo malie lava ona avea ma tagata faigaluega tumau, o le aoaoga mo Ricky e avea ma seva e tasi pe lua vaiaso, i le loloto o le 21 i le 40 futu le loloto i le faaiuga o le aso.

Ina ua fesiligia e uiga i agavaa o le faia’oga maulu, na ta’ua ai e Sanchez, o ia o se tagata poto maulu. Peitai na ia maitauina e leai se tusipasi aloaia a le faiaoga, ma e leai foi se tusi faamaonia, “ona e le mafai ona e mauaina ni tusipasi iinei”.

E malamalama le Samoa News o le mataupu o le a su’esu’eina e le US Occupational Safety and Health Administration (OSHA), e pei ona masani ai i fa’alavelave uma – pe fa’alavelave po’o maliu — e tutupu i nofoaga o galuega.

E momoli atu ai le faamaisega a le Samoa News i le aiga o Ricky Fa’amoana, faapea ai ma le Pulega ma le Aufaigaluega a le Ronald Reagan Marine Railway i le toesea.

TALAFAASOLOPITO EKALESIA A IESU KERISO O LE AU PAIA O ASO E GATA AI I AMERIKA SAMOA, FAAMATALA I LE TUSI A TAMAITI

O se talafaasolopito o le taunuu mai o uluai faifeautalai o le Ekalesia a Iesu Keriso o le Au Paia o Aso e Gata Ai ma paionia o e na fesoasoani e faasalalau atu le faatuatuaga a lea Ekalesia  i Amerika Samoa, o loo i totonu o se tusi mo tamaiti ua taua o le  “Faatuatua, Faamoemoe ma Vavega” a faalauiloa i se sauniga faapitoa sa faia i le falelotu o le Ekalesia a Iesu Keriso o le Au Paia o Aso e Gata Ai i le motu o Aunuu, i le aso 10 o Iuni.

Ua tusia faapitoa mo tamaiti, o le tusi, na gaosia Pacific Area a le Ekalesia o loo faamatalaina ai tala moni mai le talafaasolopito o le Ekalesia Samoa.

O lo’o tusia i le gagana Samoa ma le Igilisi. O se tamaitiiti, o Lewis Elisara Lotoā, na faitau leotele mai le tusi le tala o le vavega o le oneone, lea na tupu i Aunu’u i le 1986.

Fai mai se  feau mai le Au Peresitene o le Pasefika Area: “I le 1863, na o mai ai uluai faifeautalai i motu o Samoa. Talu mai lena taimi, ua faatupulaia pea le faitau aofai o tagata ma le faatosinaga a le Ekalesia.

“Ua vaaia e Amerika Samoa le tele o vavega ua tutupu i olaga o tagata o le ekalesia iinei, aemaise o lo latou faaalia o le faatuatua i le mulimuli i le talalelei a Iesu Keriso. E taua le faasoaina atu o tala o nei Au Paia tuuto i le tupulaga e sili ona manaomia i latou o a tatou fanau laiti.

“O le faatuatua faigofie e faalauiloaina ai tala o tagata moni e mafai ona malamalama ma fesootai i ai tamaiti o le ki lea e fesoasoani ai ia i latou e atiina ae a latou molimau ia Iesu Keriso ma se lagona o le avea ai ma tagata o le Ekalesia.”

O Elder K. Brett Nattress, Fitugafulu Pulega Aoao ma le Peresitene o le Pacific Area a le Ekalesia, sa pulefaamalumalu i le sauniga.

Sa malaga faatasi Elder Nattress ma lona faletua, o Shawna Nattress; Elder Faapito Auapaau, Fitugafulu Eria; Peresitene M. Fred Purcell ma Sister Kylene Purcell o le Misiona a le Ekalesia i Samoa Apia. Sa auai fo’i i lea fa’amoemoe o Dr Melanie Riwai-Couch, Pule o Talafaasolopito a le Ekalesia mo le Eria o le Pasefika; Elder O. Vincent Haleck, Fitugafulu Pulega Aoao, ma lona faletua, o Sister Peggy Haleck.