Fa'apa'iaina faleteuoloa fou a le School Lunch i Ta'u, Manu’a

Pago Pago - AMERIKA SAMOA

I se pepa o fa’amatalaga mai le Ofisa o le Kovana, ua fa’ailoa ai e fa’apea o le faaiuga o le vaiaso ua te’a sa fa'apa'iaina ai le faleteuoloa fou a le Matagaluega o Aoga mo le polokalama o le School Lunch i Ta'u, Manu’a

O le afioga i le ali’i Kovana ia Lemanu P. S. Mauga, fa’atasi ai ma le mamalu o le auvalaaulia ma ta’ita’i o le atunu’u, sa ta’ita’ia le sauniga tele o le fa’apa’iaina o le faleteuoloa fou i Ta’u, i le Aso Faraile, Iuni 9, 2023. 

O lenei nofoaga, e pei ona fa’ailoa e le Ofisa o le Kovana, o se molimau i le naunautaiga o le Faigamalo a Lemanu-Talauega i aoaoga ma le unaia o le soifua maloloina ma le soifua manuia o fanau aoga i Amerika Samoa, o le a matua siitia ai le faatinoga o polokalame o le School Lunch i totonu o le Itumalo o Manu’a.

“O le muamua lenei o le tele o galuega i le lumana’i mo le Manu’atele; o lo’o iai atina’e tetele o lo’o fa’atulaga e pei o le toe fa’aleleia o alavai o le Malaeva’alele i Ofu, o faleaoga fou, o auala tetele, ma isi mea,” o le saunoaga lea a Kovana Lemanu.

Na taua e le afioga i le ali’i kovana ia Lemanu lona agaga fa’afetai ia i latou uma sa fesoasoani i le fa’atinoina o le maota fou. “O se fa’ailoga mata’ina lea mo le polokalame o le School Lunch i Manu’a ma e fai ma sui o le Lutena Kovana ia Talauega, e momoli atu ai le agaga fa’afetai ia i latou uma ua mafai ona fa’ataunu’uina lea tulaga,” ose vaega lea o le saunoaga a le kovana. 

“Ou te faamalo atu i ta’ita’i o itumalo ma afioaga i lo outou lagolagosua ma lo outou onosai i taumafaiga a le malo mo le Manu’atele,” o le saunoaga lea a Kovana Lemanu e pei ona fa’ailoa i pepa o fa’amatalaga a le malo.

Fa’aalia e le Ofisa o le Kovana, o le fausiaina o le fale sa faatautaia e le afioga Atuatasi Ieremia Seigafo, le pule o le Quality Paint. O le susuga i le Faife’au Toeaina Iosefa Autele sa fa’amanuiaina i le ootiina o le lipine e tatala aloaia ai faitoto’a o le maota. O le sauniga na fa'aalia ai foi le maimoaga i le faleteuoloa.

O lenei sauniga sa faia i le vaitaimi tonu lava o le fa’auuga a le Aoga Maualuga a Manu’a i le Aso Faraile ua te’a, lea sa auai le kovana sili ma nisi o sui ole malo.