TALA I VAIFANUA

Pago Pago - AMERIKA SAMOA

TUUINA ATU I LE OFISA O LE KOVANA E MATAITUINA FAIGAMALAGA MO TAGATA FAIGALUEGA A LE OFISA O AOGA

Ua ave’esea nei mai i le Ofisa o Aoga a le malo ia le aia e mataituina ai femalagaiga a ona tagata faigaluega, ae ua tuuina atu nei i le Ofisa o le Kovana Sili, e pei ona fa’amaoti mai i se fa’aaliga mai i le afioga i le kovana sili, Lemanu P. S. Mauga, i le aso 7 o Iuni.

O le masina o Aukuso o le tausaga ua tuanai, na faalauiloa mai ai i se fa’aaliga mai i le kovana sili e faapea, o le a amataina ia Oketopa 1, 2022 ona maua mai i faatonusili o matagaluega ma ofisa taitasi, a le malo, ia faatagana mo femalagaiga a ona tagata faigaluega.  E mafai foi e faatonusili ona faatagaina taitoalua ma fanau a tagata faigaluega faakonakarate, ona aofia ai i ia femalagaiga.

Ae peitai, i le fa’aaliga mai i le kovana i le aso 7 o Iuni, 2023, na ia ta’ua ai le taua tele o le mataituina o alagamanuia po o lisosi a le Malo o Amerika Samoa ma o le tiute a tagata uma ona mataala i auala e fa’aaluina ai tupe.  Ma o le mafuaaga lea, o le a tu’uina atu ai i le ofisa o le kovana, e mataituina so’o se faigamalaga mo tagata faigaluega a le Ofisa o Aoga.  Ae o lo o tumau pea isi ofisa i le tulaga e pei ona sa faalauiloa mai ia Aukuso o le tausaga ua tuanai.

E leai se faamalamalamaga na tu’uina mai i le mafuaaga ua faia ai lenei suiga fou mo le Ofisa o Aoga.  Ae sa ta’ua e le faauluuluga o le Ofisa o le Kovana, le susuga Loa Tuimavave Tauapa’i Laupola, e faigata i le kovana ona faia se faaiuga mo mataupu eseese e patino i le Ofisa o Aoga, pe afai e fiu e saili taitai o lea matagaluega e tali fesili ma faia ni faaiuga.

Aemaise o lea ua o’o mai i le faaiuga o le tausaga faaletupe o le 2023 ma le faataatiaina o fuafuaga mo le tausaga fou.

E tusa ai ma le fa’aaliga a le kovana sili na matu’u mai ia Aukuso 2022, sa ta’ua ai e faapea, e na o faatonusili lava ma i latou e le o ni tagata faigaluega o le malo, e pei o aiga a le o lo o galuega faakonakarate mo le malo, faapea ma i latou o lo o faatupeina e le malo a latou faigamalaga, e pei o fanau o lo o mauaina sikolasipi mai i le malo, e na o le kovana e mafai ona aumai ai le faatagana mo tupe fa’aalu mo a latou femalagaiga.

MALAGA MAI SUI MAI AMERIKA E FAATALANOA TAGATA O LE TERITORI I POLOKALAMA A LE OFISA O LE ENETIA

Ua iai nei i Amerika Samoa nisi o le aufaigaluega mai i le Malo Feterale, mai i le Matagaluega mo le Tautua ma Alagamanuia mo Tagata Lautele (USDHHS) e pu’eina ata ma faatalanoaina nisi o aiga o le teritori o lo o agava’a mo se polokalama a le Ofisa o le Enetia.

E pei ona sa fa’ailoa mai e le faatonusili o le Ofisa o le Enetia, le susuga Misipati Salanoa, o iuga o nei faatalanoaga atoa ai ma ata o aiga o le teritori, o le a faapea ona tauaaoina atu ia i latou o lo o fa’auluulu iai a latou polokalama e patino mo aiga lima vaivai.

I se faamatalaga mai i le Ofisa o le Kovana i le vaiaso ua tuanai, ua ta’ua ai e faapea, o le auai mai o le aufaigaluega a le ofisa mo le Tautua Lautele, lea o lo o i lalo o le faamalumaluga a le Matagaluega a le HHS mai Amerika, e mo le faamaumauina lea o ni faamatalaga e faatatau i polokalama tau Enetia, e fesoasoani i aiga lima vaivai.  O nei polokalama e patino mo fesoasoani tau i le suavai (LIHWAP) ma le eletise (LIHEAP).

O nei polokalama uma e lua, o lo o mataituina e le Ofisa o le Enetia, i lalo o le taitaiga a le susuga i le faatonu sili ia MIsipati Salanoa.

O le 5 o Me, na maua ai e Caroline Boyd ma Rachel Kelling, mai i le Salt Lake City, Utah, se avanoa e feiloai ai ma le susuga i le Lutena Kovana Talauega E. V. Ale. 

Ma o le susuga foi ia Talauega na faafeiloaia le toa’i taunu’u mai o lenei faigamalaga, i laufanua o Amerika Samoa.

Mo nisi faamatalaga auiliili i nei polokalama, e mafai ona valaau le Ofisa o le Enetia i le 699-1101.

AUMAIA E LE ‘LAUMUA O FAAMOEMOEGA’ A LE SVSG IA FAAMOEMOEGA I E O A’AFIA I SAUAGA

O lo o fa’aauau pea ona tuluia mai e nisi o aiga mai i Amerika, nisi o aiga ma tagata o Samoa, o e o lo o aafia i sauaga eseese, i le faamoemoe mo le lumanai.

O se tasi o i latou nei ua faamanuiaina i nei auaunaga, e aofia ai se tamaitai e 24 tausaga, e suafa ia Lautoofa, ma o lo o iai nei o ia i lalo o le puipuiga o le faalapotopotoga a Samoa o lo o tulai malosi mo tagata ua sauaina (SVSG), i le Laumua o Faamoemoega.

O Lautoofa na o’o mai lalo o le puipuiga a le SVSG, i le 10 o ona tausaga ma ua atoa nei le 6 tausaga o iai o ia i lenei polokalama ma o lea ua maua nei sona aiga tumau e tausia lelei o ia, i le setete o Utah i Amerika.

Ma i le 24 o ona tausaga, na mafai ona toe asiasi mai lenei tamaitai ma si ona toalua, o si a la fanau e to’alua, ma matua o lona toalua, i ona aiga i Samoa.

O le 16 o tausaga o Lautoofa na asiaisi mai ai se ulugalii mai Amerika, ma o la vaetamaina ai o ia ma aveina atu ai loa o ia I Amerika ma fa’aaoga ai o ia.

Ma ua iu manuia ana aoaoga ma mauaina lona fa’ailoga o le ‘Bachelor’ i galuega i le matagaluega o le Criminal Justice.  O le taimi nei, o lo o ia galue ina ia mafai ona avea o ia ma se totino suesue i totonu o le vaega su’esu’e a le malo o Amerika (FBI).

Na saunoa le susuga i le peresetene o le SVSG, ia Siliniu Lina Chang, o le mafuaaga lea o le taua o lenei polokalama o le SVSG i totonu o Samoa.  Na ia ta’ua le pogisa o le olaga o Lautoofa ae o lenei ua i’u manuia ma ua ola fiafia o ia i Amerika.

Tau ona taunuu Lautoofa i Samoa, sa fa’aaluina le tele o lona taimi e nofonofo ma pesepese faatasi ma ona uso ma tuagane i totonu o le SVSG i lo latou Laumua.

E lata i le to’a 100 i latou o iai nei i lalo o le puipuiga a le SVSG, o tagata ua a’afia i ituaiga sauaga eseese, ma o nisi sa sauaina e tagata e latalata ia i latou.

I le tausaga ua tuanai, na mua’i aofia ai i totonu o le paketi faaletausaga ale malo o Samoa ia se paketi mo le SVSG, e $500,000 e fesoasoani i le faatinoina o la latou galuega fesoasoani.

Ma ona o le siitia o le fuainumera o tina ma fanau sauaina, o lea ua toe pasia ai e le faigamalo ia le aofaiga tupe e tasi, mo le paketi a le SVSG.

O le aso 8 o Iuni na toe tu’ua ai e Lautoofa ia Samoa mo Amerika, i le mea o avea ai o ia ma Amepasa mo le SVSG.