TU LUA O PO MA AO

VAEGA 40

E faatalofa atu i le mamalu o le tatou aufaitau nusipepa i lenei taeao fou, taeao manuia, taeao toto’a.  Faamalo le onosa’i, faamalo le tauata’i.  Talitonu le faamoemoe o lo o faamalieina lau faitau i lenei auaunaga vaivai.  Ae ia se’e maia i ou se’etaga malu, se’i toe soso’o atu le tatou Fagogo.

*************************

Ua fiu lava Tavita e tau faanofo i lalo ia Tepora, ae ua le mafai, i le toatamai tele o le mafine i le alii faitatala o Iosefa.  Ua liliu atu nei Tepora ia Tavita ma fesili atu iai, “O e fia malamalama i le mea na tupu i lo matou nu’u? Aua ou te iloa o lea ua uma ona faamatala atu e le gutu umi lea o Iosefa lo’u igoa moni ma le nu’u matou te o mai ai.”

Ua ataata le alii o Tavita ma faapea atu, “Ia se’i faamatala mai.”

“Ae ia faamatala le mea moni na tupu,” o le faaopoopo mai lea a Iosefa, ae na vave ona toe soso ese ma filemu ina ua pulato’a atu iai Tavita.

E tau amata atu le faamatalaga a Tepora ae toe matala faafuasei la faitotoa o le potu ma ulufale mai uso o le tina o Tepora. 

“O le a foi au pepelo na ua faatumu ai taliga o Tavita?” o le fesili lea a loomatutua nei ma savavali faatasi atu lava agai ia Iosefa.  O Iosefa ua solomuli ma le fefe tele i foliga o uso o le tina o Tepora.

Ua oso atu Tavita ma taofiofi main ai loomatutua ma faapea atu, “O lua ava ia.  Aua e te lua popole fua I le alii lena o Iosefa,” ma tago atu lava Tavita ua taitai atu nai loomatutua i le nofoa ma faanofo la’ua.

“O le aiga o le alii lea o Iosefa,” o le amataga lea o le faamatalaga a Tepora, “E tele so latou fanua i fafo atu o lo matou nu’u.  Tolu tausaga talu ai, na manao ai Iosefa e faaipoipo ma na iloa uma e le matou nuu o lo o tau saili se toalua a le maula lea e maua mai ai nisi ‘oa ma nisi fanua e faaopoopo i ana fanua ma ana ‘oa o iai i le taimi lena.”

“Ma sa ia saili i tamaitai o le matou itumalo, e aofia ai le matou nu’u.  Ma sa iai se tamaitai, e igoa ia Aurora, na manao iai le alii o Iosefa, o se tamaitai e mau’oa.  Ae peitai, e matou te le iloa le mafuaaga na toe sui ai le mafaufau o Iosefa.”

“Leaga sa pepelo, e mativa le latou aiga,” o le oso mai lea a Iosefa ma toe mimigi atu ina ua pupula atu iai Tavita.  “Ae sa faamanuiaina a’u taumafaiga ina ua ma feiloai ma si a’u manamea o Elena.

“Ioe, lau manamea mau’oa ma le tele o fanua o Elena,” o le tali mai lea a Tepora ma toe amata ona savali mai ia Iosefa.  O le mae’a ona toe faato’ato’a o le tamaitai o Tepora, na toe fa’aauau ai lana faamatalaga.

“Ae o le mea ua tupu, ua galo ia Iosefa ia Aurora lea ua tia’i faafasifa’i e le alii lea.  E le i iloa e Iosefa, o Aurora, e le atoatoa le malosi o le mafaufau.  Ma ua pei o se tamaitai ua ulufia e temoni ia Aurora, ina ua le toe amanaia e le maula lea,” o le tala lea a Tepora/Fetu.

“Na ou musu e ta’u iai le igoa o le tamaitai lea ua fai ma a’u manamea, ina ne’i faasaga iai le toatamai o Aurora,” o le tala lea a Iosefa.

“Ua le ta’uina e lea mea pala’ai ia Aurora le igoa o Elena, ae ua ia ta’uina iai LO’U IGOA!” o le e’e leotele mai lea a Tepora/Fetu ma le ita tele.

E FAIA PEA.