Tuuaia e le USDOJ ia le DHSS i uiga taufa’amata’u i totonu o se ofisa faigaluega

Pago Pago - AMERIKA SAMOA

Ua iai nei se tagi ua faauluina e le Matagaluega o Faamasinoga a le Malo Feterale (USDOJ) e faasaga i le Matagaluega mo le Tautua ma Alagamanuia mo Tagata Lautele (DHSS), ua tuuaia ai le DHSS i uiga taufaamata’u i totonu o lo latou ofisa, e mafua mai i ni uiga na fa’aalia e le susuga Meki Solomona lea ua fa’ilagi nei le soifua, a’o avea o ia ma pule o le DHSS, e faasaga ia Simeonica Tuiteleleapaga.

E pei ona sa lomia e le Samoa News, na faauluina e le USDOJ la latou tagi e faasaga i le DHSS ia Me 11, i le faamasinoga feterale i totonu o Honolulu, Hawaii, e mafua mai ona o le tagi a Simeonica sa faauluina e faasaga i le DHSS, ona o uiga sa fa’aali atu ia te ia, a’o galue o ia i totonu o lea ofisa, i lalo o le taitaiga a Meki Solomona.  

E ui o lea fa’ato’a faaulu le tagi a le Matagaluega o Faamasinoga a le Malo Feterale, ae ua mae’a ona faaulu e le afioga a le kovana sili, le susuga Lemanu P.S. Mauga, se pili taufa’aofi i le Fono Faitulafono a Amerika Samoa, e aofia ai se tinoitupe e totogi ai le tagi a le USDOJ.

E 19 itulau o le tagi a le USDOJ, na mafua ona o le tagi sa faauluina e Simeonica Tuiteleleapaga – lea na galue i le DHSS i le va o le 1995 ma le 2022 – ia Ianuari 2017 i le Ofisa o le EEOC, lea e mataituina tulaga o le faatinoina o tiute ma galuega i totonu o ofisa ma matagaluega eseese.

Ua ta’ua i le tagi a le USDOJ e faapea, na pa’u i le Malo o Amerika Samoa, ona faasa’oina ia uiga mataga sa faia e Solomona e faasaga ia Tuiteleleapaga ma le le i faamalosia e le malo o Amerika Samoa ona tagata faigaluega, ina ia savavali e tusa ai ma tulafono ua maea ona faataatia e le EEO, e mataituina ai uiga ma amioga faapenei, e tutupu mai i totonu o ofisa ma matagaluega.

O lo o ua ta’ua foi i totonu o le tagi a le USDOH, e toatele ni supavaisa a le DHSS, e aofia ai ma le susuga John Suisala, na o latou nofo malamalama i taumafaiga a Solomona ina ia faafaigaluega Tuiteleleapaga ma seisi faafafine, i le polokalama o le ‘Adopt-a-school’, lea e tele ina faatinoina ona tiute e le itupa o alii.

E le gata i lea, e toatele nisi o supavaisa, e aofia ai ma Suisala, na o latou nofo malamalama i uiga fa’aalia e Solomona ia Tuiteleleapaga i se fonotaga na faia ia Novema 10, 2016, e aofia ai ma ni faamatalaga sa lafoina ia Tuiteleleapaga ona o ia o se faafafine.

O lo o ta’ua i le tagi a le USDOJ, e leai ma se supavaisa a Tuiteleleapaga na aoaoina e le malo o Amerika Samoa i auala e taulimaina ai mataupu faapenei, pe iloa le auala e ripotia ai amioga e pei ona fa’aalia e Solomona.  E le gata i lea, sa le’i fa’asa’oina e le Malo o Amerika Samoa lenei faafitauli ina ua tula’i mai, ina ia taofia ai le toe tupu foi.

(O le susuga Suisala lea o lo o avea nei ma Faatonusili o le DHSS.)

O lo o taofi foi le USDOJ, e pei ona ta’ua i totonu o lana tagi, sa le gata i le faafitauli na tulai mai i totonu o le fonotaga ia Novema 10, 2016, lea sa faamaasiasi ai e Solomona ia Tuiteleleapaga ona o lona tulaga faafafine, ae sa fa’apea foi ona te’ena e Solomona le faatagaina o Tuiteleleapaga ona auai i malaga a tagata faigaluega o le ofisa.

Ae le gata, sa le’i le fa’afitauli na tulai mai ma auala na taofia ai le kovana o Amerika Samoa i lena vaitaimi, le susuga Lolo M. Moliga, mai lona toe filifilia ma tofiaina, o Solomona e toe avea ma Faatonusili o le DHSS, ma pasiaina e le Fono Faitulafono.

Ona o nei tulaga nei, sa tele se a’afiaga o le soifuaga o Tuiteleleapaga, e pei ona ta’ua i totonu o le tagi a le USDOJ, e le gata i lona soifua faigaluega ae faapea foi lona olaga faaletagata.

Ua talosagaina nei e le USDOJ le toe totogiina atu o se vaega tupe, o le a faamautuina i luma o le faamasinoga, ia Tuiteleleapaga ma ia taofia le malo o Amerika Samoa mai i lo latou toe faia o ni uiga faasagatau ia Tuiteleleapaga.  E le gata i lea, ia faatonuina le malo o Amerika Samoa ina ia faamalosia ma faamautuina ni ofisa ma matagaluega faigaluega e leai ni uiga taufaamata’u, pe faailoga tagata, ma ia aoaoina uma tagata faigaluega a le malo i auala e mafai ona fofoina ai faafitauli faapenei, pe a tulai mai.

E $100,000 le tinoitupe ua taumafai nei le faigamalo a Amerika Samoa, e pasia mai e le Fono Faitulafono e fa’aagaga aua lenei tagi.