Talisapaia e Samoa le valaaulia a Amerika Samoa

Pago Pago - AMERIKA SAMOA

Ua fetaui le taunuu o le au malaga mamalu a le malo o Amerika Samoa i Samoa Tutoatasi ile Aso 30 o Me, ma faafiafiaga taualuga ole 60 tausaga saoloto ole malo tutoatasi.  Ole aumalaga a Amerika Samoa, pei ona faailoa ele faamatalaga aloaia mai le ofisa o le Kovana, o ta’ita’ia ai e le afioga i le Kovana, Lemanu P. S.Mauga.

O molimauina le taunuu atu ole aumalaga i laueleele ma fanua o Samoa i le aso 30,  Me 2023 e tali faaaloalo ile valaaulia a le afioga ile Palemia o Samoa, Fiame Naomi Mataafa.

E le gata ina auai le aumalaga i faafiafiaga ole taualuga, ile Aso Lulu , ae o sauniga e tatala aloaia ai foi le faamanatuga o le atoaga o le 61 tausaga saoloto o Samoa, ile Aso Tofi, 1 Iuni 2023.

O sauniga ole aso faapitoa, e aofia ai le Sisiina o le Fu’a ole saolotoga, ole sauniga Lotu, o savali faaaloalo masani ai a faalapotopotoga, ma aoga.

O le faamatalaga aloaia mai le ofisa o le Kovana o Amerika Samoa, o le aumalaga a le Afioga ile Kovana e aofia ai le  Chief of Staff Loa Tuimavave Tauapai Laupola, Attorney General Fainuulelei Falefatu Alailima-Utu, Governor’s Chaplain Reverend Mageo Patolo Mageo, ma le Deputy Secretary of Samoan Affairs poo Mataupu tau Samoa, susuga Tauese Va’a Sunia.

O le Afioga i le Minisita o Fesootaiga, Communications and Information Technology (MCIT) Toelupe Poumulinuku Onesemo, Minister ma le afioga a  Peseta Noumea Simi, Pule sili o le Matagaluega o le Va i Fafo Chief Executive Officer Ministry of Foreign Affairs and Trade (MFAT ) sa o la faafeiloa’i aloaia ile afioga ile Kovana a le aumalaga.    

E ese mai le auvalaaulia a Amerika Samoa,  isi foi malo faaaloalogia mai motu o le Pasefika, ua latou molimauina taualuga o le 60 tausaga saoloto o Samoa , ae o le amataga o le Sisigafu’a lona 61 ile aso 1st Iuni 2023.

Peita’i ole valaaulia a Amerika Samoa, e le gata ina talisapaia e le malo tutoatasi, ae ole mitamitaga foi i aiga ma uo e aofia ai le taumafataga o le aoauli na aoo ia le afioga i le Faletua Sina Apineru Hunt ma le aiga, i le faletalimalo o le Orator Faleata.