Fa’amalosia tagata faigaluega faigamalo e ave o latou aso livi - mo malologa ma aiga

Pago Pago - AMERIKA SAMOA

Ua talosagainan e le afioga i le kovana sili ia Lemanu P.S Mauga fa’atonusili o lana kapineta i le lala Fa’amalosi Tulafono a le malo - Executive Branch - ina ia fa’amalosia a latou tagata faigaluega ina ia fa’aaoga a latou livi fa’aletausaga ma fa’aalu taimi e mafuta ai ma e pele, aemaise lava i le taimi nei ua latalata i masina o le taumafanafana.

O lea talosaga a le kovana sili na tauaaoina i le pepa o tusitusiga  o le aso 22 o Me, ua faaulutalaina “Livi Faaletausaga”. 

E fa’ailoa atu e le Samoa News, o se tasi lenei o mataupu ua leva ona finauina i le Fono Faitulafono i tausaga ua mavae, ma ua faailoa ai e faipule le tatau ona ave o tagata faigaluega a latou livi faaletausaga tusa ai ma tulafono faalotoifale.

Sa iai foi atugaluga a le au fai tulafono i le ova o livi faaletausaga a tagata faigaluega, lea na iu ai ina tapa e nisi o tagata faigaluega e totogi tupe i se taimi mulimuli ane.

“Ina ua o’o mai masina o le taumafanafana ma ua lata mai aso malolo, ua tatau ai i Fa’atonusili ma tagata faigaluega a le ASG ona fuafua lelei le fa’aaogaina o a latou livi fa’aletausaga,” o se vaega lea o le tusi a le kovana sili i fa’atonusili o lana kapineta. 

Na fa’amanino e Lemanu e fa’apea, e tatau i ta’ita’i o tagata faigaluega i matagaluega ma ofisa ta’itasi ona i ai ni meafaigaluega e siaki ai, ina ia mautinoa o lo o tausisia tulaga o aso livi i tausaga ta’itasi.

Ma sa toe faamanatu e le alii kovana i faatonusili ma tagata faigaluega e faapea i lalo o le tulafono faalotoifale - A.S.C.A. § 7.1203 - na'o le 60 aso o livi fa'aletausaga e le'i fa'aaogaina e mafai ona fa'asolo i le tausaga e soso'o ai.

O aiaiga o le tulafono o lo o taua ai i se vaega o aso malolo faaletausaga e le o faaaogaina e se tagata faigaluega e tatau ona faaputuputu mo le faaaogaina i tausaga o lumanai seia oo ina atoa se aofaiga e le sili atu i le 60 aso i le amataga o le uluai taimi atoa totogi ta’i lua vaiaso, poo le vaitaimi tutusa i le tulaga o le ose tagata faigaluega e le'i totogia i luga ole taimi ole totogi ta'ilua vaiaso, e tupu i so'o se tausaga.

E le gata i lea, o livi faaletausaga ua aiaia i lenei vaega, e aofia ai ma aso malolo e maua i soo se tagata faigaluega i totonu o le tausaga, e mafai ona tuuina atu i soo se taimi o le tausaga e pei ona faatonuina e faauluuluga o matagaluega ma ofisa eseese.

O le isi aiaiga o le tulafono o loo faamanino mai ai, “o le totogiina o tupe e sui ai aso malolo e le faatagaina sei vagana ua faamutaina galuega”.

“E tatau i Fa’atonusili ona fa’amalosia tagata faigaluega ina ia fa’aaoga a latou livi fa’aletausaga e fa’aalu ai taimi lelei ma e pele ma tausia ai le soifua maloloina lelei ma le soifua manuia,” o le tusi lea a le ali’i kovana i lana fa’amanatu ma fa’afetaia ai Fa’atonusili mo lo latou gauai atu i lenei mataupu.

Na siaki e le Samoa News ni isi o tagata faigaluega a le Ofisa o le faigmalo i le mulimuli ai lea i le fa’atonuga lata mai a le ali’i kovana. Ma na fa'ailoa e nisi tagata faigaluega, o le to'atele o i latou e masani ona fai livi fa'aletausaga, e malaga atu i motu aemaise lava i le taimi nei, e le toe iai ni fa'atapula'aina o le COVID-19, e pei ona sa faia i le tolu tausaga talu ai.