TU LUA O PO MA AO

VAEGA 36

E faatalofa atu i le mamalu o le tatou aufaitau nusipepa i lenei taeao fou, taeao manuia, taeao toto’a.  Faamalo le onosa’i, faamalo le tauata’i.  Talitonu le faamoemoe o lo o faamalieina lau faitau I lenei auaunaga vaivai.  Ae ia se’e maia i ou se’etaga malu, se’i toe soso’o atu le tatou Fagogo.

****************************

Na gata mai le tatou fagogo i le aso ananafi, i le taimi o lo o nofonofo ai Tepora i fafo o le fale o lo o faia ai le pati tele a le nu’u, ma tau mafaufau se auala e ave’ese mai ai uso o lona tina o lo o i totonu o le pati, ma latou o ese atu ma le fale lea, e aunoa ma le iloa e i latou e se tagata e igoa ia Iosefa.

O Iosefa, o se alii na masani ai Tepora ma ona ‘Aunties’ mai i le latou nu’u na soifua mai ai Tepora.  Ma e silafia lelei e Iosefa le faalavelave na tupu i lea nu’u, ia Tepora ma lona auaiga, ma le mafua’aga na tu’ua ai e Tepora ma uso o lona tina ia le latou nu’u.

O le mea lea o lo o tinou ai Tepora e saili le ‘diary’ lea sa ia Rasela, le fafine lea ua maliu, ona o lo o tusia ai i totonu o lea ‘diary’ ia tala’aga o le mea na tupu ia Tepora ma lona aiga i lo latou nu’u moni, ma le mafua’aga na o latou tu’ua ai le nu’u.

O le loloto o mafaufauga o Tepora i se auala e mafai ai ona o latou tu’ua le fale lea o lo o faia ai le pati, na ia le lagona ai le savali atu o le tagata ma tu i ona luma.

“Tavita! Oka, koekiki pe lo’u faku se!” o le tala faateia lea a Tepora.  “Faafetai ua e sau.  Ua tupu le faalavelave.”

“Oka, ka’i kele ga mau faalavelave,” o le tala ata lea a Tavita.  Ae ua iloa lelei e Tavita le mafuaaga ua faapopole vale ai Tepora.  “O le a le mea ua tupu?”

“E manaomia ona faailoa atu i uso o lo’u tina, ua tatau ona o matou toe fo’i i le fale, e aunoa ma le iloa e se tagata,” o le tali mai lea a Tepora.

“Oka, oka.  Ua pei se tifaga leoleo,” o le tali ata atu lea a Tavita.

“Se aua e te ata!” o le tali atu lea a Tepora ma ona foliga ua suia i le ita.  “E manaomia ona matou o ese atu ma uso o lo’u tina mai i lenei nofoaga.  Ou te iloa ou te le’i faamatalaina atoa atu le tala o le mafuaaga o le matou tu’ua o lo matou nu’u moni ona ua tele le pisi i a ta suesuega ia o lo o faia.”

“Ae peitai, o lo o iai se tagata i totonu o le pati i le taimi nei, na mafua ai lea faalavelave, o lo o i totonu o le pati i le taimi nei,” o le faatopetope atu lea a Tepora.  “Afai ae ia iloa o lea matou iinei ma uso o lo’u tina, oka, ou te le iloa le mea o le a ia faia.”

“O lo o e talanoa mai e uiga ia Iosefa?” o le fesili atu lea a Tavita.

Ua tu Tepora ma tilotilo mai ia Tavita, “E faafefea na e iloa?” o lana fesili lea.

“Ou te le o malamalama i le tala atoa o le mea na tupu i le tou nu’u ma le mafuaaga na outou sosola ese mai ai ma nai uso o lou tina,” o le tali atu lea a Tavita. “Ae ou te iloa, e le o Tepora lou igoa moni.”

E FAIA PEA!