E FAI O LENEI AE O LENA

O LE FETU’U A LE AITU LONA 13

I aso a la ua leva, na iai se tupu ma se masiofo i se nu’u mamao lava.  O vaitaimi ia o iai faataulaitu ma aitu o le vao.  O se tupu ma se masiofo mau’oa tele.  Ae peitai, sa leai se la fanau.  Ma o se faanoanoaga sili lea i le tupu ma si ana masiofo.

O se tasi o aso, na savalivali ai le masiofo i tafatafa o se vaitafe.  Na faateia le masiofo ina ua vaai atu i autafa o le vaitafe, i luga o le palapala, o tau apata ai se i’a, ua pa’ulia.  Na tago atu le masiofo ma le alofa i le I’a, ma toe tu’u faalelei i totonu o le vaitafe.  Ua a’au fiafia le i’a ae na ia toe fo’i mai i le mea o tu atu ai le masiofo ma faapea atu i le masiofo, “Ou te iloa le manaoga o lou loto ma o le a e maua se pepe teine fou e tauia ai lou alofa.”

E le’i leva ae faamanuiaina loa le tupu ma le masiofo i se pepe fou.  O se pepe tamaitai.  E sili lona aulelei i lo o se tamaitai o le nu’u.  Ua fai se pati tele ma ua valaaulia e le tupu tagata maualuluga uma, o uo ma tuaoi, e o mai latou te fiafia faatasi.

Na faapea atu le masiofo i le tupu, “O le a ou valaaulia foi aitu o le vao ina ia mafai ona o latou faamanuiaina le ta pepe fou.”

E 13 aitu o le vao ae peitai, e na o le 12 ipu auro a le tupu ma le masiofo ma o lea, na o le 12 aitu o le vao sa valaaulia.  Ma ina ua mae’a le pati fiafia i lena afiafi, na faataali’o e aitu o le vao e 12 ia le purinisese ma o latou faamanuiaina o ia.  O leisi sa ia faamanuiaina le pepe fou i oa o le lalolagi.  O leisi, o le lalelei.  O leisi sa ia faamanuiaina le pepe fou ina ia agalelei ma agaaalofa i tagata uma.

E o’o loa le faamanuiaina i le aitu lona 11, ae lagona loa se pa’o leotele i totonu o le lotoa ma ua o’o mai le fa’aaliga i le tupu ma le masiofo, o lea ua sau le aitu lona 13 lea sa le’i valaauliaina.  Na gatete le tupu ma le masiofo on aua la iloa le toatamai o le aitu lona 13.  

Ina ua o’o mai le aitu lona 13 i luma o le pepe fou, sa ia faapea atu i le tupu ma le masiofo, “Ona ua oulua le valaauliaina a’u i le lua fiafia mo le lua pepe fou, o lea o le a ou fetu’uina ai o ia, i le 15 o ona tausaga, o le a tuia ai lona lima ma oti ai o ia.”

Ua toe tu’ua e le aitu lona 13 le faalapotopotoga ma ua tagi lotulotu le masiofo.  Ae manatua o lea e totoe ai le aitu lona 12, e le’i tuuina atu lana faamanuiaga.  Ma sa ia faapea atu ai, “E le mafai ona ou ave’esea le fetu’u a le aitu lona 13, ae e mafai ona ou suia faapea, e le oti o ia, ae o le a moe o ia, mo le selau tausaga.”

IA MANUIA FAAIUGA O LENEI VAIASO.