TU LUA O PO MA AO

VAEGA 34

E faatalofa atu i le mamalu o le tatou aufaitau nusipepa i lenei taeao fou, taeao manuia, taeao toto’a.  Faamalo le onosa’i, faamalo le tauata’i.  Talitonu le faamoemoe o lo o faamalieina lau faitau I lenei auaunaga vaivai.  Ae ia se’e maia i ou se’etaga malu, se’i toe soso’o atu le tatou Fagogo.

*****************************

Ua fiu Tepora e fa’aauau le tusiga o lana tala faasolo mo lana tusi fou lea o lo o fa’atalitali mai ai le kamupani lomitusi, ae e ese lava le mea o lo o a’u ai lona mafaufau.  Sa faate’ia o ia I lona faalogo mai o tu’itu’I atu se tagata i le faitoto’a.  Ua tau mafaufau Tepora po o ai o le a alu atu i lona fale i le leva o le po.  O uso o lona tina, o lo o asiasi atu i ni uo i seisi nu’u ma e fa’ato’a fo’I mai i le taeao e soso’o ai.  Ae o lana teu fale, ua leva ona tu’umuli atu i lona potu mo malologa o le afiafi.

Ua savali atu Tepora ma susu’e teisi i tua le ie faamalama lea e iloa atu ai le polotito o lona fale, ma tilotilo faamata tasi atu i fafo, po o ai lea e i fafo o lona faitoto’a.

Na faate’ia o ia i lona va’ai atu, o Tavita lea e fa’alagolago mai i le pa o le polotito o lona fale.

Ua tatala e Tepora le faitoto’a ma fesili atu, “Aisea ua e sau ai i le leva o le po?”

“E mafai ona ou alu atu i totonu?” O le fesili mai lea a Tavita.

“Oi, susu mai,” o le tali lea a Tepora ma soso ese ma le faitoto’a.

Na va’aia e Tepora, pei e tau to’oto’o le savali a Tavita.   “E iai se mea na tupu?” o le fesili atu lea a Tepora.

Sa le’i tali mai Tavita, ae ua savali sa’o atu lava i le nofoa i totonu o le potu malolo ma taumafai e ave’ese lona peleue.  Na vaaia e Tepora, e pei e faaletonu gaioiga a Tavita, e pei o se tagata o lo o manu’a.

“E iai ea se mea na tupu? O le toe fesili atu lea a Tepora.

“Ua ou iloa nei i lenei afiafi, ou te le o toe talavou,” o le tali mai lea a Tavita, ma ia saofa’i ifo i luga o le nofoa.

“O le a le uiga o lau faamatalaga?” o a Tepora lea ma ona foliga popole.

“O le afiafi ananei, na fa’ao’o mai ai se feau taua, e ni ali’i se to’alua, sa manana’o e fa’aaoga o la lima e fa’ao’o mai ai le feau.  Ua fai mai le e ana le feau, a le taofi a’u suesuega o lo o faia e uiga i taumafaiga taufa’asese ma le ave faamalosia o tupe a tama ma tina matutua, faapea ai ma le tau sailiga o le tagata na fasiotia Rasela ma Tina, o le aveina loa le tusi o tala’aga o tatou olaga, i se fale lomitusi e lolomi ai e faitau ai tagata o le nu’u,” o le tala lea a Tavita.

“Oka oka e Tavita, semanu oe e faamanu’alia oe, pe e te maliu i lenei afiafi,” o le tala alofa lea a Tepora.

“Aua le popole, o lea lava e maua le malosi e tali ai ituaiga osofaiga faapenei,” e ata lava Tavita ma fai lana faamatalaga.  “O la ua toe fo’i le aualii le la ma la’u fo’i feau mo le pule”.

Ona o le leva o le afiafi ma le vaivai tele o Tavita, na taoto ifo ai lava i luga o le nofoa ma malolo ai loa.

O le afiafi o le aso na soso’o ai, na auai atu ai Tavita ma Tepora i se fiafia tele sa faia i le fale o se tasi o a la uo.

I le ogatotonu o le pati, na savali ese atu ai Tavita mai i le motu o tagata ae aga’i atu i se tasi o potu tu’ufua o le fale.

Na ona ulufale atu lava o Tavita, faapea loa ma lana tala.  “O lea ua ou maua lau feau.”

E TOE FAIA PEA!