TU LUA O PO MA AO

VAEGA 33

E faatalofa atu i si o tatou aiga i lenei taeao fou.  Tatou te si’i faatasi le mua ma le viiga faafetai i le Tapaau i le Lagi ona o Lana pule faasoifua, o Lana pule to, ua mafai ai ona tatou aulia mai lenei taeao fou, taeao toto’a, i le soifua maua ma le lagi e mama.  E faafetai atu foi ia te outou o lo o lagolagoina lenei auaunaga i vaiaso taitasi.

Ae saga’i mai loa, o le a toe soso’oina le tatou tala i le alii o Tavita ma le tamaitai o Tepora ma le tau sailiga o le ‘diary’ faitatala lenei ua fasiotia ai nai mafine o Rasela ma Tina.

*******************

Na gata mai le tatou fagogo i le vaiaso ua mavae, ina ua lagona e le alii o Tavita, i lana savalivaliga i luga o le alatele, le mulimuli atu o se tagata i ona tua.

O le taimi lea ua amata ona tagi alisi o le afiafi ma ua toe fo’i le la i lona nofoaga tumau o le afiafi.  Ma e ui lava ua amata ona pogisa ae o lo o iai lava sina malamalama teisi, o lo o mafai ai e Tavita ona fika leisi ana taga o le a fai.

Na ona mamao teisi atu lava o Tavita mai i le tagata o lo o mulimuli ia te ia, e pei o le emo o le mata, le faatafa i se faitotoa sa i lona itu taumatau, ma faagatasi ma le pou i se mea pogisa, e le iloa atu e seisi.  Na lagona e Tavita le o’o atu o le savali a le tagata lea na mulimuli atu ia te ia, ma tu faafuase’i, e foliga mai o lo o tau autilo po o fea ua nimo iai Tavita.

Na talotalo Tavita, o le a fa’aauau mai pea le savali a le tagata lea, ona o lo o ia fia iloa po o ai lea tagata, ma pe aisea foi o mulimuli mai ai ia te ia.

E le i umi na tu Tavita, ae tali ona manaoga, ina ua toe fa’aauau mai le savali a le tagata lea, i le mea o lo o ia tu faasasa’o ai i tua o le pou.

E na o na pasi teisi lava o le tagata lea ma le pou lea o lo o faamalo ai Tavita, ae puna atu loa ma Tavita ma sua i lalo.  Na alu ifo i lalo le ali’i lea sa mulimuli atu ia Tavita, pei o se fa’i ua gau ifo i lalo i le mamafa o le aufa’i o lo o tautau ai.  Na faalogoina e Tavita le tatagi o se mea na ma’amulu mai i le lima o le ali’i lea, ma na sa’o lelei le mate a Tavita, o se tama’i naifi.

O le liliu atu o Tavita e piki i luga le naifi, na ia iloa atu ai le tamo’e atu o seisi alii ma lana a’a, ana le vave le ‘alo a Tavita, e tau tonu lava i lona ulu.  Na fa’atafa le ali’i o Tavita i lona vae tauagavale, ae lele mai lona vae taumatau, ma nofo lelei lava i le manava o le ali’i lona lua lea, ma pa’u atu aga’i i se pa u’amea.  O le vavave o le gaioi a le alii o Tavita, e toe minoi mai le alii lona lua lea, ae tu’u atu ai e Tavita le tama’i naifi i lona ua ma faapea atu, “O leisi au taga, e te lua feiloai ai ma Kapilielu.”

Ua fesili atu Tavita, “Aisea ua lua osofa’ia ai a’u i lenei afiafi?”

Ua tali le alii lea, “Na ma o mai ma se feau mo oe.”

“Ae aisea ua lua osofa’ia ai a’u?” o le toe fesili atu lea a Tavita.

“O le vaega lena o le feau.  Ma ta’u atu ia te oe, e tu’u au suesuega na e fai.  Aua a le taofia au suesuega, o le a ave le tusi o lo o e sailia i se kamupani nusipepa,” o le tali lea a le alii lea o lo o taofi e Tavita le naifi i lona ua.  Ae o le taimi lea o lo o tofa lelei lava lana tama lea na ta’ita’ia le la osofaiga, i luga o le alatele, ina ua tau lona ulu i lalo i le malosi o le so’aina e Tavita i lana pu’e faalakapi.

“O le tagata lea na tuliina mai oulua, e fai’ava toe pi’o lona vae?” o le fesili atu lea a Tavita.

“Na faafefea ona e iloa?” o le tali mai lea a le alii lea o lo o taofiofi e Tavita i le naifi.

“Faafetai, o na ua e faamaonia mai o la e i le alii na fasiotia ia Rasela ma Tina ia le tusi lea ou te su’eina,” o la Tavita lea.

“E le iloa e ma’ua se mea e uiga i le fasiotia o ni fafine.  Na pau lava le mea lea na totogi ma’ua e fai, o le faao’o mai o le feau ia te oe, ma taumafai ina ia aua ne’i toe fa’aauauina lau suesuega,” o le tali lea a le alii lea o lo o fa’alala iai e Tavita le naifi.

E TOE FAIA PEA.