Tofia faipule ia Manumaua Wayne C. Wilson totino Komiti Fa’afoe o le DBAS

Pago Pago - AMERIKA SAMOA

I le aso 11 o Me i le tusitusiga i le kapeneta, na fa’ailoa ai e le afioga i le ali’i kovana ia Lemanu P. S Mauga le tofia o le afioga i le faipule ia  Manumaua Wayne C. Wilson e avea ma totino o le Komiti Fa’afoe o le Faletupe o Atina’e a Amerika Samoa (DBAS). 

O lea tofiga ua faia i lenei vaitau ae e le o tauaofia le Fono Faitulafono.

“O ia o lo’o malamalama lelei i galuega fa’alotoifale a le DBAS ina ua mae’a ona tautua i le tele o nofoaiga i le komiti tumau ma le va’ava’a a le maota mo le faletupe. O lona poto masani ma lana fa’amasinoga lelei o le a avea lea ma fa’aopoopoga taua i le Komiti Fa’afoe,” o le saunoaga lea a le ali’i kovana e no Manumaua.

Talu ai e le’o tauaofia le Fono Faitulafono i le taimi nei, na fa’amanino ai e le ali’i kovana e fa’apea, o se taimi malolo lea, e fa’amutaina i le fa’ai’uga o le isi fono masani poo le fono fa’apitoa a le Fono Faitulafono.

E le gata i lea, ua tuuina atu foi e le alii kovana le suafa o Manumaua i le Senate mo se faamaoniga.

I lalo o tulafono fa'alotoifale, e na'o le Senate e fa'amaonia sui o le Komiti Fa'afoe a le DBAS.

Mai le to’a 10 o totino o le Komiti Fa’afoe a le DBAS, e to’aiva i latou e tofia e le kovana ma fa’amaonia mai e le Senate, e tusa ai ma tulafono fa’alotoifale, lea fo’i o lo o taua ai e fa’apea, afai e tula’i mai se avanoa i so’o se mafua’aga, e mafai e le Kovana ona tofia se tagata e fa’atumuina. le avanoa seia oo i le isi tauaofiaga a le Fono Faitulafono.

E le gata i lea, o sui uma e tautua mo le lua tausaga. Ma o le Peresetene o le DBAS o se sui o le komiti faafoe e le palota. O le Peresetene, e filifilia e le to'atele o le Komiti Fa'atonu, e le mafai ona avea ma Ta'ita'ifono o le Komiti Fa'atonu.

E pei ona lipotia muamua e le Samoa News e fa’apea, sa avea muamua ma faipule o Vailiuama Steve Leasiolagi i le komiti fa’afoe, ma e le’i manuia lana talosaga mo le toe filifilia o ia i le masina o Novema 2022.

Mai le itu a le Senate, o lo o i ai i le Komiti Fa’afoe a le DBAS le afioga i le Senatoa o Manu’a, Malaepule Saite Moliga.