TU LUA O PO MA AO

VAEGA 32

E faatalofa atu i le mamalu o le tatou aufaitau nusipepa i lenei taeao fou, taeao manuia, taeao toto’a.  Faamalo le onosa’i, faamalo le tauata’i.  Talitonu le faamoemoe o lo o faamalieina lau faitau I lenei auaunaga vaivai.  Ae ia se’e maia i ou se’etaga malu, se’i toe soso’o atu le tatou Fagogo.

*****************************

“O le a le mea na tupu i le toalua a Sosene?” o le fesili lea a Tavita.

“Na fasiotia e se tagata i ni nai tausaga e le i leva tele atu,” o le tali mai lea a Luisa.  “Ou te le o malamalama tele i le mea na tupu ae na ta’ua e tagata, na maua le tino maliu o le faletua i se paka e le mamao tele ma le la fale.  Fai mai na alu le faletua e savalivali i ni nai aso, ina ua mae’a le la faaipoipoga ae osofaia ai o ia.”

“Na maua le tagata na fasiotia le faletua?” o le fesili lea a Tavita.

“E leai,” o le tali faanoanoa lea a Luisa.  “Atonu o le mafuaaga lea o lo o manao ai lava Tomasi e talanoa i le agaga o si ona faletua, o le fia iloa po o ai na faia lenei mea mata’utia ia te ia”.

“Ia o le eseesega na o tagata,” o le tala lea a Tavita.  “Ana o a’u, e le tau faatali e talanoa ma agaga o tagata maliliu, ae su’e lava i tagata o lo o ola mai i le taimi nei.”

Sa ata le tamaitai o Luisa ona o faaupuga a Tavita.

“Ae aisea e manatu ai Tomasi e mafai ona ia talanoa i lona toalua lea ua maliu?” o le toe fesili atu lea a Tavita.

“Ona sa ta’ua e tagata, o le faletua o Tomasi, e pei lava o Rasela ma Tina lea e fai mai e mafai ona talanoa i agaga o tagata maliliu.  Atonu o lo o manatu Tomasi, e mafai e lona toalua ona asiasi mai i le lalolagi o tagata feola,” o le tali atu lea a Luisa.

“A o soifua le faletua o Tomasi, sa masani foi ona fai ana ia fa’aaliga o le faatalatalanoa o agaga o tagata maliliu.  Ma e mauoa foi lona aiga.  E pulea e i latou se kamupani va’a la’u oloa,” o a Luisa lea.

Ua nofo Tavita ma mafaufau loloto i lenei faamatalaga a Luisa.

“Faafetai lava Luisa, ua tele lava sau fesoasoani i la’u mataupu,” o le tala lea a Tavita ma tula’i o le a alu ese.

Ua tu’ua e Tavita ia le fale o Luisa ma aga’i atu i lona fale.  Ona o le pisi o le alatele, sa ia le faatuina ai se taavale e alu ai, ae ua ia manatu, e manaia foi le afiafi e savalivali ai ma mafaufau i faamatalaga uma sa ia maua mai ai Luisa.

Ua alu le savaliga a Tavita i lona fale, ae peitai, sa toe liliu mai i luma o lona faitoto’a ma toe aga’i mai i le fale o Tepora.  Ua manatu Tavita, ua fia faasoa atu ia Tepora mea uma sa ia maua mai ia Luisa i lea afiafi.  

A o savalivali Tavita, sa le i malolo lona mafaufau ae le gata i lea o ona mata ma ona taliga, i le faalogologo ma le vaavaai solo i tagata feoai i luga o le alatele.  O le latalata atu o Tavita i le fale o Tepora, ae na faalogonaina le tutu o lauulu i lona tuaua.  Sa vave le gaioi a Tavita ma ia afe faatopetope i se magaala e masani ona lafi ai a’o laititi.

Sa faalogologo mai i le savali a le tagata lea o lo o mulimuli atu ia te ia.  Sa savalivali pea Tavita, e foliga mai e na te le o iloaina le tagata lea o lo o mulimuli atu i ona tua.  E savali a la Tavita, ae o lo o autilotilo solo i fale i tafatafa o le alatele po o fea se faitoto’a o le a ia afe iai.

E FAIA PEA