TU LUA O PO MA AO

VAEGA 31

E faatalofa atu i si o tatou aiga i lenei taeao fou.  Tatou te si’i faatasi le mua ma le viiga faafetai i le Tapaau i le Lagi ona o Lana pule faasoifua, o Lana pule to, ua mafai ai ona tatou aulia mai lenei taeao fou, taeao toto’a, i le soifua maua ma le lagi e mama.  E faafetai atu foi ia te outou o lo o lagolagoina lenei auaunaga i vaiaso taitasi.

Ae saga’i mai loa, o le a toe soso’oina le tatou tala i le alii o Tavita ma le tamaitai o Tepora ma le tau sailiga o le ‘diary’ faitatala lenei ua fasiotia ai nai mafine o Rasela ma Tina.

*******************

Na gata mai le tatou fagogo i le vaiaso ua mavae, ina ua alu le alii o Tavita e saili se feiloaiga ma le tama faigata o Asotasi.  Manatua foi, o lea ua iloa lelei e Tavita le tagata na lomia tusi pepelo ia sa fa’aaoga e le tagata e faasese ai nai tina ma tama matutua o le nu’u, ae ave a latou tupe.

Ma o le tagata lenei o Asotasi, e le o se tagata faigofie.  Ua malamalama lelei Tavita i le lautele ma le pogisa o le malosi o le tagata lenei o Asotasi.  Ma e toatasi lava le tagata o lo o iloa e Tavita, e mafai ona maua ai se sootaga ma Asotasi, o le mafine o Luisa.

O Luisa ma Tavita, ua fai sina umi o masani.  Na tutupu faatasi ifo Tavita ma Luisa, o ni tamaiti matitiva e leai ni aiga, ae saili manuia i luga o le auala.  O le mea lea na faigofie ai ia Tavita ona faasoa atu ona manatu ia Luisa.

“O lea ou te tau sailia le tusi (diary) lea sa ia Rasela.  Sa taumafai Rasela e fa’aaoga le tusi lea e faamalosia ai a’u mo ni tupe, ae o lea ua maliu Rasela, ae le iloa po o ai ua avea le tusi,” o le faamatalaga lea a Tavita ia Luisa.  “O lo o tusia i totonu o le tusi lea le tala’aga uma o lo’u olaga ma lo’u tuafafine o Iulia.  A salalau nei tala ma o’o atu i le aiga o Tomasi, o lona uiga, o le a mumusu matua o Tomasi e faaipoipo Iulia ma Tomasi.”

“O lea ua ou masalosalo i le tagata lea e faia le amio valea lea o le ave o tupe a tama ma tina matutua, i se auala tau fa’asese.  Fai mai e pi’o lona vae ma e fai sana mata lanu auro.  Ae ou te iloa, ua na o ni laei taufa’asese ia.  Ou te masalomia o ia lena o lo o iai le ‘diary’,” o le tala lea a Tavita.

“Ae afai o ia ia le ‘diary’, aisea e le i faafeso’ota’i atu ai oe, pei o le mea a Rasela lea na fai?” o le fesili lea a Luisa.

“O le mea lena o lea ou te popole ai.  Po o le a le fuafuaga a le tagata lea o lo o faufau,” o le tali lea a Tavita.

“Ua sa’o le mate a le tagata lena.  Ou te talitonu, ua iloa lelei e le tagata lena ou uiga, ma o lo o fa’aeteete lava ina aua ne’i sasi sana faaiuga, aua e te vave maua ai o ia,” o le tala lea a Luisa.

“E fiu lava e lafi, ou te mauaina lava le tagata lea,” o le folafolaga lea a Tavita.

“Talu ona ou iloa oe Tavita, o oe o se tagata e le faataga faia se mea.  Ae ou te lapata’i atu ia te oe, ia e fai ma le fa’aeteete au gaioiga.  Ua toalua ni tagata ua maliliu ona o le ‘diary’ lea,” o le faufautua atu lea a Luisa i si ana uo o Tavita.

“E mafai ona e ta’u mai se mea e uiga i le Sosaiete lea sa auai ai Rasela ma Tina? Le sosaiete lea e fiafia e talanoa i agaga o tagata maliliu?” o le fesili lea a Tavita.

“E na o le pau le mea out e iloa, o le Peresetene o le Sosaiete, le alii o Sosene, ua maliu lona toalua ma o lo o iai sona naunautaiga e talanoa ma le agaga o lona toalua lea ua maliu,” o le tali mai lea a Luisa.

E FAIA PEA!