TALA I VAIFANUA

Pago Pago - AMERIKA SAMOA

LIMA ASO TAPUNIA ALAVA’A O AUNU’U ONA O TULAGA FAALETONU O LE TAU

I se faamatalaga na salalau i luga o Aupega Tafailagi (Facebook) sa tusia ai e se tasi e aumau i Aunu’u, lona talosaga o se fesoasoani mo se va’a e ave atu ai ni mea taumafa i Aunu’u ona ua amata ona leai ni meaai i Aunu’u talu ai le le mafai ona toe feoa’i va’a laity i le va o Aunuu ma Tutuila, ona o le tulaga faaletonu na iai tala o le tau.

Na ta’ua i lea fa’asalalauga, ua atoa le 5 o aso, e le i mafai ona toe sao atu se va’a i Aunu’u mo le aveina atu o meaai ma sapalai e manaomia e tagata o Aunuu.

Na talosagaina e le na faia le faasalalauga pe mafai ona faia se fuafuaga mo se vaa mai i Tutuila e mafai ai ona ave atu ni meaai, pe mafai foi ona saofia atu se va’a e aumai tagata Aunu’u i Tutuila, e fai atu ni faatauga o mea o manaomia.

Na vaaia le toatele o tagata o le atunuu sa o latou faaooina atu lenei fa’aaliga i le ofisa o le kovana ma le KVZK aua se fesoasoani mot agata Aunu’u.

Na taumafai le sui o le Samoa News e faafesootai ia le Ofisa o le Kovana mo se faamatalaga e tusa ai ma lenei mataupu, ae peitai, e o’o mai i le lomiga o le Aso Faraile, e le i iai se tali mai a le Ofisa o le Kovana.

FILIFILIA TO’OTO’O’OLE’A’AVA E AVEA MA TAITAIFONO A LE REL O LE PASEFIKA

Ua laasia e le Kolisi Tuufaatasi a Amerika Samoa (ASCC) seisi laasaga taua i Aoaoga Maualuluga, e ala lea i le filifiliga o le susuga To’oto’o’ole’a’ava Dr. Evile Fa’atauao Feleti, lea o lo o faafoeina Mataupu tau Samoa i le Kolisi, ma Taitaifono o le Komiti Faafoe o le Regional Educational Laboratory (REL) a le Pasefika.  O lea komiti faafoe e galulue so’otauau ma le Ofisa o Aoga, aua le tomatauina o faamaoniga i le faatulagaga o tulafono ma matafaioi i totonu o le aoaoga o le Pasefika, o lo o i lalo o le vaavaaiga a le malo tele o Amerika.

E toatele nisi mai Amerika Samoa sa filifilia e galulue i le komiti faafoe a le REL i totonu o le Pasefika, ae peitai, o le uluai taimi lenei, ua filifilia ai se tasi mai i le ASCC e avea ma Taitaifono.

O isi motu pasefika o lo o iai o latou sui i totonu o lenei faalapotopotoga, e ese mai ia Amerika Samoa, e aofia ai le Atu Mariana, Micronesia, Guam, Hawaii, Palau ma le Atu Malesala.

O To’oto’o’ole’a’ava sa faau’u mai i le ASCC i le 2003 ma malaga atu ai i Hawaii mo le sailiga o lona Bachelors ma le lona Masters mai i le Iunivesite o Hawaii, i Manoa.  O lona faailoga faafoma’i o Aoaoga sa ausia mai lea I le Iunivesite o le NorthCentral.  I le 2006 na ia toe tali mai ai i le teritori ma avea ma se tasi o faiaoga i mataupu tau Samoa i le ASCC.

O lo o avea nei o ia ma Taitaifono o Aoaoga o Mataupu tau Samoa, faapena ma le avea o ia ma se faiaoga I totonu o le ASCC, ma se totino o komiti e lua a le Kolisi – General Curriculuma ma le General Assessment.

I totonu o lona tofiga fou, ua ta’ua ai e le susuga To’oto’o’ole’a’ava, lona maua o se avanoa e faamalosia ai le sootaga i le va o galuega a le REL Pasefika ma sini autu a le ASCC.

Na fa’aalia e To’oto’o’ole’a’ava lona agaga faafetai i nai ona matua, le susuga i le Faafeagaiga ia FA’atauao M. Feleti ma le faletua ia Fa’asili, ae le gata i lea, o le ASCC mo lenei la’asaga taua ua ia ausia.