E FAI O LENEI AE O LENA

SUAMALIE

Sa iai se auuso e igoa ia Suamalie ma Fuarosa.  E matua ia Suamalie ia Fuarosa.  O le tamaitai o Suamalie, o se tamaitai amio lelei ma le tauagafau.  O se tamaitai loto alofa.  Ae o le teine laititi o Fuarosa, o le ta’i o le afi, e pei ona ta’ua e loomatutua ma toeaiina o le latou nu’u.  I lo la tuputupu a’e, sa faasagatau lava le teineititi laititi i lona uso matua.  A iai se ofu fou a Suamalie, e manao lava Fuarosa e ave ma ia.  A ai si teine o Suamalie, e taumafai lava Fuarosa e avatu le meaai ma ia.  E o’o lava i totonu o le aoga, e taumafai lava Fuarosa e ‘eu’eu ese si teine o Suamalie i taimi e latou te ta’a’alo ai ma a la uo.

Na iloa uma e tagata o le nu’u le eseesega o nei teine e toalua.  Ma ua avea ma tulaga, ua atili ai ona eseese uiga fa’aalia o tagata i nei teineiti.  O le toatele o tagata, e alolofa ia Suamalie ona o ona uiga tausaafia ma le loto maualalo.  Ae peitai, sa le’i avea lea eseesega ma tulaga na fa’aalia ai se alofa faapito o Evalina i lana fanau teine.  Sa tutusa lelei lana tausiga ia Suamalie ma Fuarosa.  E faapena foi Suamalie, sa le’i avea uiga fa’aalia o lona uso laititi ma tulaga na faaitiitia ai lona alofa ia te ia.

Ua matutua nei teineiti ma ua vaaia le tele o le eseesega o nei tamaitai.  O Suamalie, sa fa’aauau lana aoga ma i’u manuia mai i le Kolisi.  Ma ua maualuga lona tulaga i lana galuega.  Ae o le tamaitai o Fuarosa, na uma lava lana aoga maualuga, alu loa su’e lana galuega ona o lona naunau i le tupe.  I le galue malosi o Suamalie ma maua lona faaeaea i totonu o lana galuega, ona e le gata o le galue malosi, ae o ona uiga alofa e fa’aalia i so’o se tagata, sa molimauina e lo latou aiga, le ese o le alu a le teine o Fuarosa.  Ua na o le pati lava ma le sikaili solo e tau saili se tamaloa mau’oa e faaipoipo atu iai.

Ua alu foi Fuarosa i le nofo ma ana uo, ae o lo o nofo pea le teine o Suamalie i le fale o lona tina ma tausi ma le faamaoni ia si ona tina.

O le pule a le kamupani lea o lo o galue ai Suamalie, ua na vaaia uiga tausaafia ma le tauagafau o le tamaitai.  Ua tosina atu lona loto ia Suamalie ona o ona uiga alofa e fa’aalia i tagata uma.  Ma ua amata ona ia valaaulia Suamalie e la te faiaiga ma faamasani atu iai.  Ua mafana le mafutaga a Suamalie ma lana pule, o Iakopo.  Ua o’o lava ina ave e Iakopo ia Suamalie e feiloai atu i ona matua ma lona aiga.  Ua le iloa le mea e gata mai ai le fiafia o le tina ia Evalina.

Ua logotala foi le tamaitai o Fuarosa i le faiga uo a Suamalie ma le pule o le latou kamupani ma ua o’o i se tasi aso, ua faateia le tina ia Evalina i le tu atu o Fuarosa i le fale, ma fai mai o ia lea ua toe fo’i mai i le latou aiga.  Sa leai ni uiga le fiafia o Suamalie na fa’aalia, ua ia fa’aalia lona alofa ma le talia o le toe foi mai o le teine faamaumau ‘oa o Fuarosa.  Na va’aia e Fuarosa le fiafia o Suamalie ma sa ia feiloai atu foi i le tama o Iakopo.  Ua vaai Fuarosa i le tele o mea taugata e faatau e Iakopo mo Suamalie, e ui ina teena e Suamalie nei mea.  Ua momomo le loto o le teine faigata o Fuarosa i mea o lo o maua e Suamalie, ua manao e maua e ia le fiafia lea o lo o maua e Suamalie, ua o’o lava fo’i ia Iakopo, ua mana’ona’o iai le loto o Fuarosa.

Na faateia le aiga o le tina o Evalina i se tasi o afiafi, ina ua sau le faamalamalamaga a le alii o Iakopo.  Ua le iloa le mea e gata mai ai le fiafia o Evalina ma ia talia le faamalamalamaga a Iakopo.  Sa fa’aali atu foi e Suamalie ia le mama tele na tu’u e Iakopo i lona lima tu’umama.  Oka, o le taimi lea i le loto o le teine o Fuarosa, ua toeititi oso atu se’i ese mai le mama mai i le lima o Suamalie.

O se tasi aso, a’o talatalanoa Suamalie ma Fuarosa i totonu o le la potu, ua oso atu Fuarosa ma u’u mai le mama a Suamalie lea sa i luga o le laulau, ma tu’u i lona lima.  Ua tago atu i le ofu na fai e si teine o Fuarosa i le aso o le faamalamalamaga a Iakopo, ma ofu. Ua na o le ata o si teine o Fuarosa, ona e leai lava ni ona lagona ita i mea a lona uso laititi o lo o fai.

Ua faapea atu Fuarosa, ‘Ta o ta tietie, se’i o’u sikaili tasi i au teuga.  Aua e te faaipoipo loa, le toe iai se ta taimi faatasi faapea.”  Ua oso le tamaitai o Fuarosa i le nofoa avetaavale ma faapea mai i si ona uso matua, “So’u ave tasi lava i lau taavale”.

Ua alu le tietiega a le auuso ma e ui lava i le augani atu o Suamalie i le teine laititi e faamama lona vae i le foeina o le taavale, ae ua atili ai ona faamasau e Fuarosa le taavale.  Ma i’u ai lava ina lavea le la taavale.  Ua faatopetope atu nei tamaitai i le falemai.  E o’o atu Evalina ma lona aiga, faapea le alii o Iakopo i le falema’i, ua taooto mai tamaitai i luga o la moega ae ua saisai uma o la ulu.  O le tala a le foma’i, o le manu’a pito sili ona tuga i manu’a o nei teineiti, o o la fofoga.  

Ua le iloa e Evalina po o ai Fuarosa ae o ai Suamalie ona o lea ua fusi uma la ulu.  Ae peitai, na faapea atu Iakopo, “O Suamalie lea, ona o lea e i lona lima le mama sa ma faamau ai.”

IA MANUIA LE FAAIUGA O LE VAIASO!