TU LUA O PO MA AO

VAEGA 30

E faatalofa atu i le mamalu o le tatou aufaitau nusipepa i lenei taeao fou, taeao manuia, taeao toto’a.  Faamalo le onosa’i, faamalo le tauata’i.  Talitonu le faamoemoe o lo o faamalieina lau faitau I lenei auaunaga vaivai.  Ae ia se’e maia i ou se’etaga malu, se’i toe soso’o atu le tatou Fagogo.

*****************************

Ua aga’i ese atu nei ia Tavita ma Tepora mai i le ofisa lomitusi a le alii o Anitele’a.  Na liliu mai i tua Tepora ma fesili mai ia Tavita, “O le a le uiga o lau tala lea na fai ia Anitele’a?  Aisea na e lapata’ia ai Anitele’a e aua ne’i o ni ana tusitala e vaai Asotasi?”

“E foliga mai ua sui le alii o Asotasi ma ou te popole ina ne’i afaina se tasi e alu su’esu’e o ia,” o le tali mai lea a Tavita.

“O a uiga o Asotasi o lo o e iloaina?” o le toe fesili mai lea a Tepora.’

“O tala salalau o lo o ta’ua ai e faapea, sa le gata ina gafa le alii ma le lomia o tusi po o faailoga pepelo ae sa ia lomia foi ni tupe pepelo.  Ma a e vaai iai, e matua’i e le iloa lava le eseesega o tupe pepelo ia e lolomi e Asotasi, ma tupe mo’i,” o le tali lea a Tavita.

O le afiafi na soso’o ai, na asiasi atu ai Tavita i se tasi o ana uo mafana, o le tamaitai o Luisa.  Ma o lenei mafine, e iloa uma mea lilo o lea itu o le nu’u e nonofo ai.  Ma o le mafutaga a le toalua lea, na amata mai lava a’o talavou le alii o Tavita ae avea Luisa ma faatina ia te ia.  O lea la ua matua ifo lava Tavita, o lo o tumau pea le mafana o le la mafutaga ma e tele ina fesoasoani Luisa i galuega fai a Tavita.

“Se malo Tavita,” o le tala lea a Luisa.  “Ua fai sina leva e te le sau e asi mai a’u.  O a mai le aiga?”

“O lo o manuia lava, faafetai,” o le tali atu lea a Tavita.  Ia o lenei ua pisi foi i le faaipoipoga a le tamaitai laititi”.

“O lea na maua mai lau tusi, o lo o e manaomia se fesoasoani,” o le tala lea a Luisa.  “O lea la ua amata ona fai suesuega i le mea o lo o manao ai.  Ae e fai lava sina fefeu o le tatou mataupu”.

“A iai se tagata e na te mafai ona maua mai ia Pesi, o oe,” o le tali lea a Tavita.  “Ae e ese le mataupu lea ou te sau ai.  Ou te le i mana’o e aumai se tusi ne’i te’i ua iloa e se isi la’u mataupu.  O le mea lea ua ou sau ai”.

“Oka, ka’i faalilolilo ga makaupu,” o le tali ata lea a Luisa ma tilotilo atu i foliga a Tavita.  “Ia, se’i saunoa ia a’o faalogologo lau auauna.”

“Ou te mana’o e fa’ao’o atu se feau i le tatou uo o Asotasi.  O lo o lua talanoa lava ma lea tagata?” o le fesili atu lea a Tavita.

“Oi, ioe.  O lea e lelei lava le ma mafutaga ma Asotasi.  So’u fai iai o lena e te fia talanoa ia te ia,” o le tali mai lea a Luisa.

“Ia ua lelei.  Faafetai.  E na o le pau lena o le mafuaaga ua ou sau ai,” o le tala lea a Tavita. 

“E moni, e na o le pau lena?” o le toe fesili atu lea a Luisa.  Ua amata ona fia faitala Luisa.

“Ioe, na o le pau lena mo lenei taimi,” o le tali mai lea a Tavita.

“O lo o feavea’i tala e uiga i le maliu o nai mafine o Rasela ma Tina, e faapea, o agaga mai le tuugamau o lo o a’afia ai,” o le tala lea a Luisa.

Ua ata Tavita ma faapea, “Aua e te talitonu i na faamatalaga pepelo.  O tagata tino ma aano sa fasiotia nai tina na e toalua”.

E FAIA PEA!