Ripoti mai le Ofisa o Leoleo

Pago Pago - AMERIKA SAMOA

KONA VISESIO

O le 11:25 i le po o le Aso Faraile, Aperila 28, 2023 na taunuu ai se valaau i le Ofisa Leoleo i Leone, mai i se tina e faapea, o lo o fasi o ia e le uso o lona toalua, le alii o Kona Visesio.

Sa faamatalaina e lenei tina i leoleo, sa fo’i mai i le latou fale, o lo o fai se inuga pia a Visesio ma nisi o lo latou aiga, i luma o le latou fale.  Ma o le afiafi lea na sau ai se uo a lenei tina, o se alii, e piki atu se pusa pia sa i totonu o le taavale a le tina lea.

Sa faamatala e le tina, na alu i le taavale e aumai le pusa pia mo lana uo, ae na faate’ia o ia i le alu atu o Visesio ma tu’i le faamalama o le taavale a lana uo, ma palauvale i lana uo.

Sa ta’ua e le tina, sa ia taumafai e faamalamalama ia Visesio, ua na o se uo le alii lea, ae peitai, sa le fia faalogo Visesio ma amata ona palauvale atu ia te ia, ma faatonu o ia, e alu i totonu o le fale.

Ae ina fai atu iai le tina lea ia Visesio, e leai sona aia e palau atu ai ia te ia, na savali atu Visesio ma tu’i lona gutu ma kiki lona ulu, ina ua pa’u i lalo.

Sa valaau e lenei tina ia leoleo mo se fesoasoani.

Ina ua maea ona talanoa leoleo ma le tina sa aafia i lenei mataup, sa ia faasinoina iai le mea e mafai ona maua ai Visesio ma o iina na lokaina mai ai Visesio e leoleo ma aveina atu i le ofisa leoleo i Leone.

O lo o ua molia nei Visesio i le faatupu vevesi i nofoaga lautele, lea e mafai ona falepuipui ai o ia i le 15 aso po o se sala tupe e $300 po o faasalaga uma e lua.  O lo o molia foi o ia i le faaoolima i le tulaga e tolu, e mafai ona falepuipui ai o ia i le tausaga atoa po o se sala tupe e $1,000, po o faasalaga uma e lua.

E $300 le tupe ua maea ona totogi e Visesio e toe tatala mai ai o ia i tua.

JASON LAUMOLI

O le faaiuga o le vaiaso na se’i mavae atu nei, na lokaina ai e leoleo ia le alii o Jason Laumoli, ina ua le tu i le mea o iai faasino ala e tu ai taavale, i luma o le Memorial Stadium i Iliili.

Ina ua faatu e leoleo ia le taavale a Laumoli, sa ia oso mai i fafo o le taavale ma agai atu i le leoleo ma amata ona palauvale i leoleo ma faia uiga tau faamata’u.  Ma na ta’ua e leoleo i la latou ripoti, le manogi pia o Laumoli ma le faatosotoso o lana tautala.

Na taumafai leoleo e faato’afilemu le alii o Laumoli, ae peitai, na i’u lava ina auina atu o ia i le ofisa leoleo i Tafuna mo le fa’aauauina o suesuega a leoleo.

Ina ua taumafai leoleo e ave Laumoli i totonu o le latou ofisa, sa tulilima e Laumoli foliga o se tasi o leoleo.  E le o ta’ua i totonu o le ripoti a leoleo pe sa suesueina Laumoli pe na faasuaava pe leai, pe na molia foi i le faafoeina o se taavale ae o lo o faasuaava. E le i ta’ua ai foi pe na ‘ticket’ ia Laumoli i le le tu i luma o le faasino ala e taofi ai taavale, lea na mafua ai ona taofi e leoleo lana taavale.

Ua molia nei Laumoli i moliaga e fa, e aofia ai le faatupu vevesi i nofoaga faitele, o le faia o uiga faamata’u, palauvale i nofoaga faitele, ma le faaoolima.  O le moliaga o le tete’e atu a’o faia tiute a leoleo, e mafai ona faasala ai Laumoli i le falepuipui mo le tausaga e tasi, po o le sala tupe e $1000 po o faasalaga uma e lua.