TALA I VAIFANUA

Fesiligia i suesuega tala o le tupe o le koviti ia taavale totogi a le Ofisa o le Soifua Maloloina

I se tasi o faamatalaga tusia i totonu o le Ripoti a le Ofisa Suetusi (TAO), le le i iai o ni maliliega na saunia mo ni taavale totogi i vaitaimi o le Koviti-19 mo le Ofisa o le Soifua Maloloina (DOH).  E silia ma le $14 miliona tupe feterale (CARES Act) sa mauaina e le DOH e faatino ai ana galuega i le vaitaimi o le Koviti-19.

I le vaega 4 o le ripoti a le Samoa News i suesuega a le Ofisa Suetusi i tala o le tupe a le DOH, i le vaega o Maliliega mo Taavale Totogi, na fa’aalia ai le atugalu o le vaega su’esu’e, ona o le leai o ni faamaumauga e faamaonia ai le iai o se maliliega tusia mo ni taavale totogi e fa’aaoga e le DOH.

E tusa ai ma ripoti a le TAO, e leai ni maliliega sa faaulu mai e kamupani taavale, e faamaonia ai sa latou mauaina ni tupe totogi mai i le DOH mo le fa’aaogaina o a latou ta’avale.  Na ta’ua e le TAO e faapea, na alagatatau le fa’aaluina o tupe mo taavale totogi e faatino ai tiute ma galuega a le DOH i le vaitaimi pisi o le Koviti-19, ae peitai, e leai ni faamaumauga e faamaonia ai le maliliega na faia ma kamupani taavale totogi.

E le gata i lea, e tatau ona iai faamaumauga mo so’o se tupe fa’aalu mo le totogiina o tagata taitoatasi ma kamupani se faia se tautua mo galuega faatino a le DOH, ma e tatau ona iai ni faamaumauga e faamaonia ai lea tulaga, aua e iloa ai le aofaiga atoa o le tupe sa fa’aaluina.

Na ta’ua i le ripoti tusia a le TAO e faapea, afai e leai ni faamaumauga, e ono sili atu ai le tupe fa’aalu nai lo le totogi sa’o o le taavale.   Ma o sa latou fautuaga mo nisi fuafuaga o le lumanai, ia tatau ona iai ni maliliega tusia ma faamaumauga mo le fa’aaogaina po o le fa’aaluina o le tupe.

I le tali mai a le Ofisa o le Soifua Maloloina (DOH), ua ta’ua ai e faapea, ona o le utiuti o le taimi ma le manaomia vave o lenei auaunaga, sa mafua ai ona tulai mai lea faafitauli.  Ae o le a o latou galulue faatsi ma le vaega ale Procurement ina ia faatulaga se fuafuaga mautu aua nisi faalavelave faafuasei e ono tula’i mai i le lumanai.

Na ta’ua foi e le DOH, ua galulue nei o latou tagata faigaluega ma ofisa eseese ina ia faamautuina le iai o maliliega ma konakarate mo so’o se taavale totogi e fa’aaoga e a latou ofisa, aua le agai i luma o la latou galuega.

Lokaina se alii na masalomia i le faaoolima ma le laulauvavale i se fale kalapu

O le faaiuga o le vaiso na lokaina ai se alii ona o se faalavelave na tula’i mai i le fale kalapu a le Flames i Tafuna.

Ua molia nei Lavea Loi i moliaga o le faatupu faalavelave i nofoaga faitele, ma le faitauga e tasi o le faaoolima.

E $300 le tupe na faatulagaina mo le toe tatalaina i tua o Loi ma ua faasaina o ia ona toe ulufale atu i totonu o so’o se fale kalapu i totonu o le teritori atoa ai ma le faasaina ona iai se feso’otaiga i le va o ia ma le na a’afia i lenei fa’alavelave.

FA’ALAVELAVE

E tusa ai ma faamaumauga a le faamasinoga, i se suesuega a le Ofisa o Leoleo, o lo o ta’ua ai e faapea, i le aso 29 o Aperila 2023 i le 11:29 i le afiafi, sa masalomia ai se alii o laulauvavale ma faaoolima i seisi tamaloa i le fale kalapu a le Flames i Tafuna.

Ina ua taunuu atu leoleo i le fale kalapu, na talanoa ai ma le na aafia i lenei faalavelave, ma sa faamatala e lea alii i leoleo, e foliga mai ua faasuaava ia le ua molia ma o lo o ia taumafai e toe fo’i i totonu o le fale kalapu, ae ua mae’a ona tuli i fafo ona o le faatupu faalavelave.

Na ta’ua e le na a’afia i le faalavelave, le fa’aauau pea ona palauvale le alii faatupu faalavelave ma i’u ina ona faaoolima ia te ia.

Sa aveina e leoleo ia le ua molia i le ofisa leoleo i Tafuna mo le fa’aauauina o a latou suesuega.  Na ta’ua e leoleo le malosi o le manogi o le ava malosi mai i le ua molia.  Na taua foi e leoleo i la latou lipoti, le iai o ni manu’a i foliga o le na a’afia i lenei faalavelave ae peitai, sa ia teena le aveina o ia i le falemai.

O le po lava lea na lokaina ai loa Loi i le toese i Tafuna e faatali ai lona tula’i i luma o le faamasinoga.

I le taimi sa iai Loi i le ofisa o leoleo, sa ia faamatalaina lona faaoolima i le na a’afia i le faalavelave i lea afiafi, e ala i lona tu’iina o le gutu o lea alii, ona o lona ita tele.